(បន្ទាយមានជ័យ)៖ លោកបណ្ឌិត ប៉ាន់ខែម ប៊ុនថន នាយករងខុទ្ទកាល័យសម្ដេចមហាបបរធិបតី ហ៊ុន ម៉ាណែត នាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត នៅថ្ងៃទី០៦ខែឧសភាឆ្នាំ២០២៦ បានទទួលអំណោយគ្រឿងឧបភោគបរិភោគនិងសម្ភារៈមួយចំនួន ពីលោក សង្វាត សិលា និងក្រុមគ្រួសារ ព្រមទាំង SMB group សម្រាប់ជូនដល់បងប្អូនកងកម្លាំងដែលកំពុងឈរជើង នៅតាមបន្ទាត់ព្រំដែនជួរមុខ។

ក្រុមគ្រួសារលោក សង្វាត សិលា និង SMB group បានបញ្ជាក់ថា ក្នុងនាមប្រជាពលរដ្ឋនៅក្រុងប៉ោយប៉ែតដោយបានឃើញសកម្មភាពរបស់ លោកបណ្ឌិត ប៉ាន់ខែម ប៊ុនថន និងក្រុមការងារបានតស៊ូលះបង់កម្លាំងកាយ កម្លាំងចិត្ត មិនគិតពីសុវត្ថិភាពផ្ទាល់ខ្លួន ហ៊ានប្ដូរផ្ដាច់ នៅរួមសុខរួមទុក្ខជាប់ជានិច្ចគ្រប់ពេលវេលារួមជាមួយបងប្អូនកងកម្លាំង នៅតាមបន្ទាត់ព្រំដែនជួរមុខសមរភូមិជោគជ័យ ព្រៃចាន់ និងការរួមសុខរួមទុក្ខជាមួយប្រជាពលរដ្ឋក្រុងប៉ោយប៉ែត មិនថាយប់ឬថ្ងៃ ដើម្បីរៀបយុទ្ធសាស្ត្រ គ្រប់គ្រងស្ថានការណ៍ ក្នុងការការពារទឹកដី នៅពេលដែលសត្រូវ ចូលមកឈ្លានពាន លើទឹកដីកម្ពុជាយើង។

ឆ្លើយតបនឹងទឹកចិត្តសប្បុរសរបស់ក្រុមគ្រួសារលោក សង្វាត សិលា និង SMB group លោកបណ្ឌិត ប៉ាន់ខែម ប៊ុនថន បានថ្លែងអំណរគុណយ៉ាងជ្រាលជ្រៅដល់ក្រុមគ្រួសារលោក សង្វាត សិលា និង SMB group ព្រមទាំងសប្បុរសជនផ្សេងទៀត ដែលតែងតែចូលរួមគាំទ្រដល់បងប្អូនជួរមុខជានិច្ច ទាំងនេះគឺជាការបង្ហាញឱ្យឃើញយ៉ាងច្បាស់នូវស្មារតីស្នេហាជាតិ សាមគ្គីភាព ក្នុងបុព្វហេតុរួមជាមួយគ្នារបស់ប្រជាជនកម្ពុជាទាំងអស់ទាំងនៅជួរមុខនិងនៅជួរក្រោយ ដើម្បីរួមគ្នាការពារបូរណភាពទឹកដី និងដែនអធិបតេយ្យភាពជាតិកម្ពុជារបស់។

ក្នុងឱកាសនោះដែរ លោកបណ្ឌិត ប៉ាន់ខែម ប៊ុនថន បានរំលេចអំពីវីរភាពរបស់បងប្អូនវីរកងទ័ពជួរមុខ ដែលមានឆន្ទៈមោះមុតក្លាហាន និងឈរយ៉ាងរឹងមាំការពារបូរណភាពទឹកដី ដូច្នេះយើងទាំងអស់គ្នាត្រូវតែបន្តស្មារតីជាតិនិយមនិងបន្តគាំទ្របងប្អូនវីរកងទ័ពកម្ពុជាឱ្យបានខ្លាំងក្លាជានិច្ច៕