(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ ព្រមទាំងថ្នាក់ដឹកនាំ និងមន្ត្រីរាជការក្រសួងទេសចរណ៍គ្រប់លំដាប់ថ្នាក់ បានអញ្ជើញចូលរួមបរិច្ចាគឈាម ក្រោមប្រធានបទ «ចូលរួមបរិច្ចាគឈាមជាមួយមហាគ្រួសារវិស័យទេសចរណ៍ក្នុងរដូវកាលបៃតង» ដើម្បីចូលរួមអបអរសាទរខួបទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៦ និងខួបលើកទី៧១ឆ្នាំកាកបាទក្រហមកម្ពុជា ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។

កម្មវិធីនេះមានការចូលរួមសម្របសម្រួលដោយលោកស្រីវេជ្ជបណ្ឌិតឯកទេស ហេង សុខចំរើន អនុប្រធានមជ្ឈមណ្ឌលជាតិផ្តល់ឈាម តំណាងលោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម និងលោកគ្រូ អ្នកគ្រូពេទ្យក្នុងវិស័យសុខាភិបាលជាច្រើនរូប។

រដ្ឋមន្ត្រី ហួត ហាក់ បានគូសរំលេចអំពីការចូលរួមរបស់ក្រសួងទេសចរណ៍ ដើម្បីអបអរសាទរទិវាកាកបាទក្រហមពិភពលោក និងកម្ពុជា (៨ ឧសភា ២០២៦) ខាងលើនេះតាមរយៈសកម្មភាពគោលចំនួន២ ៖ ទី១៖ ការនាំយកនូវអំណោយជាគ្រឿងឧបភោគ បរិភោគ និងសម្ភារៈប្រើប្រាស់ មានជាអាទិ៍៖ អង្ករ ២តោន, មី ១០០កេស, ទឹកសុទ្ធ ៥០០កេស/យួរ, មុង ចំនួន៣០, ភួយ ចំនួន៣០ និងឃីតសម្លៀកបំពាក់ ចំនួន៥០ឃីត ប្រគល់ជូនកាកបាទក្រហមកម្ពុជា កាលពីថ្ងៃទី៤ ខែឧសភា កន្លងទៅថ្មីៗនេះ និងទី២៖ នៅថ្ងៃនេះ មហាគ្រួសារវិស័យទេសចរណ៍ រួមគ្នាជាមួយមជ្ឈមណ្ឌលជាតិផ្តល់ឈាម ស្ម័គ្រចិត្តបរិច្ចាគឈាមដើម្បីសង្គ្រោះជីវិត ស្របពេលដែលក្រសួងទេសចរណ៍ខិតខំជំរុញឱ្យមានព្រឹត្តិការណ៍ និងកម្មវិធីនានាក្នុងរដូវកាលបៃតងនៅកម្ពុជា។

សូមបញ្ជាក់ថា នេះជាលើកទី២ហើយ ដែលក្រសួងទេសចរណ៍ បានរៀបចំឱ្យមានកម្មវិធីសប្បុរសធម៌នេះឡើង ដើម្បីជួយសង្រ្គោះជីវិតមនុស្សផង ចូលរួមធ្វើអំពើល្អផង និងដើម្បីសុខុមាលភាពរបស់មន្រ្តីរាជការផង សំដៅកសាងសេចក្តីស្រឡាញ់ និងការចែករំលែកនូវអំណោយជាតំណក់ឈាមដែលជាទានដ៏ល្អប្រពៃ មានតម្លៃលើសអស់អំណោយទាំងពួង៕