កម្លាំងនគរបាលរាជធានីភ្នំពេញ តាមឃាត់ខ្លួនក្មេងទំនើងប្រុសស្រី៤នាក់ ដែលបង្ហោះម៉ូតូ និងបង្កភាពអនាធិបតេយ្យតាមទីសាធារណៈនៅលើស្ពានអាកាសផ្សារដីហុយ (Video inside)

(ភ្នំពេញ)៖ ក្មេងទំនើងមួយក្រុមមានគ្នា៤នាក់ (ប្រុសតែងស្រី៣នាក់) ដែលជិះម៉ូតូបង្កភាពអនាធិបតេយ្យ តាមផ្លូវសាធារណៈបង្កឲ្យប៉ះពាល់សណ្តាប់ធ្នាប់សាធារណៈ ត្រូវបានកម្លាំងជំនាញនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ តាមឃាត់ខ្លួនយកមកសួរនាំ។

ការឃាត់ខ្លួនធ្វើឡើងនៅយប់ថ្ងៃទី៧ ខែឧសភា ឆ្នាំ២០២៦ ដោយការិយាល័យនគរបាលព្រហ្មទណ្ឌកម្រិតស្រាល បាននៅចំណុចស្ពានជ្រោយចង្វារ សង្កាត់ជ្រោយចង្វារ ខណ្ឌជ្រោងចង្វារ រាជធានីភ្នំពេញ ពាក់ព័ន្ធករណីក្មេង ទំនើងបើកបរម៉ូតូបង្កភាពអនាធិបតេយ្យ នៅតាមផ្លូវសារធារណៈប្រព្រឹត្តនៅចំណុចស្ពានអាកាសផ្សារដីហុយ សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីយប់អាធ្រាត្រថ្ងៃទី៥ ខែឧសភា ឆ្នាំ២០២៦។

ក្មេងទំនើងទាំង៤នាក់ ដែលត្រូវបានឃាត់ខ្លួន រួមមាន៖

ទី១៖ ឈ្មោះ សឹម ច័ន្ទរតន៍ កើតឆ្នាំ២០០៨
ទី២៖ ឈ្មោះ ថន ច័ន្ទដារ៉ា កើតឆ្នាំ២០០៨
ទី៣៖ ឈ្មោះ កឹម គន្ធី ភេទស្រី កើតឆ្នាំ២០០៨
ទី៤៖ ឈ្មោះ ជា មករា កើតឆ្នាំ២០០៨។

ពួកគេទាំង៤នាក់ បានទទួលស្គាល់កំហុសឆ្គងរបស់ខ្លួន និងចេញវីដេអូសុំទោសជាសាធារណៈចំពោះសកម្មភាពកំហុសឆ្គងដែលខ្លួនបានប្រព្រឹត្ត បង្កប៉ះពាល់សណ្តាប់ធ្នាប់សាធារណៈ និងជូនសារកុំឲ្យយុវជនយកគំរូមិនល្អនេះ ធ្វើតាមពួកខ្លួន។

ក្រោយអប់រំ និងធ្វើកិច្ចសន្យាបញ្ឈប់សកម្មភាពនេះ, ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានអនុញ្ញាតឲ្យពួកគេត្រឡប់ទៅវិញ ដោយមានការធានាពីអាណាព្យបាលយកពួកគេ ទៅអប់រំបន្តនៅផ្ទះ៕