(បន្ទាយមានជ័យ)៖ លោកឧត្ដមសេនីយ៍ត្រី អុី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ នៅថ្ងៃទី០៧ ខែឧសភា ឆ្នាំ២០២៦នេះ បានចាត់ឱ្យក្រុមមន្ត្រីជំនាញ ទទួលពលរដ្ឋខ្មែរចំនួន ៦៧នាក់ ក្នុងនោះស្រី ២៤នាក់ កុមារ ០១នាក់ ដែលអាជ្ញាធរថៃចាប់បញ្ជូនត្រឡប់មកវិញ ក្រោយពួកគេឆ្លងដែនដោយខុសច្បាប់ទៅប្រទេសថៃ។

ជាមួយគ្នានោះ មន្ត្រីនគរបាលអន្តោប្រវេសច្រកទ្វារព្រំដែនអន្តរជាតិប៉ោយប៉ែត ក៏បានចែកនំប៉័ង ទឹកសុទ្ធ ទឹកក្រូច ក្នុងម្នាក់នំប៉័ង ០១ដើម ទឹកសុទ្ធ ០១ដប ទឹកក្រូច ០១កំប៉ុង គ្រប់ៗគ្នា និងជួយដឹកជញ្ជូនពួកគាត់ទៅមជ្ឈមណ្ឌលសំចតថែមទៀតផង ។

ក្នុងនោះផងដែរលោកឧត្ដមសេនីយ៍ត្រី អុី ចំរើន បានបញ្ជាក់ឱ្យដឹងថា ការអនុវត្តតាមការណែនាំរបស់​លោកឧត្តមសេនីយ៍ទោ ប្រធាននាយកដ្ឋានច្រកទ្វារទី១ ពលរដ្ឋទាំងអស់បានធ្វើសម្រង់សាវតា និងថតរូបតម្កល់ទុកជាឯកសារបន្ទាប់មកប្រគល់ជូនទៅមជ្ឈមណ្ឌលសំចតប៉ោយប៉ែត ដើម្បីអនុវត្តនីតិវិធីបន្ត ចប់សព្វគ្រប់នៅថ្ងៃដដែល៕