(ស្វាយរៀង)៖ លោក បណ្ឌិត សម តារា តំណាងរាស្ត្រមណ្ឌលស្វាយរៀង បានថ្លែងថា ការចូលរួមបំពេញកាតព្វកិច្ចយោធា ត្រូវបានចាត់ទុកថា ជាកិច្ចការងារយ៉ាងសំខាន់មួយរបស់ពលរដ្ឋគ្រប់រូប នៅក្នុងប្រទេសជាច្រើនជុំវិញពិភពលោក។

ការថ្លែងលើកឡើងបែបនេះរបស់បណ្ឌិត សម តារា ក្នុងឱកាសដែលលោកបណ្ឌិត និងក្រុមការងារបានចូលរួមជួបសំណេះសំណាល លើកទឹកចិត្តតម្រង់ទិសការសិក្សា និងចំណាប់អារម្មណ៏គាំទ្រច្បាប់កាតព្វកិច្ចយោធា នាថ្ងៃទី៧ខែឧសភា ឆ្នាំ២០២៦ នៅវិទ្យាល័យស្វាយរៀង ក្រុងស្វាយរៀង។

លោកបណ្ឌិត សម តារា បានគូសបញ្ជាក់ថា តាមរយៈប្រវត្តិសាស្ត្រ ប្រទេសជាតិខ្លាំង តែងពឹងលើកម្លាំងយុវជន។ កម្លាំងរបស់យុវជនគឺជាមូលដ្ឋានគ្រឹះនៃវឌ្ឍនភាព និងនិរន្តរភាពជាតិ។ កម្លាំងពិតរបស់យុវជន គឺកម្រិតគុណភាពនៃសំណុំចរិតលក្ខណៈសីលធម៌ វិន័យ ការអប់រំ ភាពធន់ សមត្ថភាពបញ្ញា ទំនួលខុសត្រូវសង្គម និងស្មារតីជាតិ។ គុណភាពទាំងនេះជួយយុវជនឲ្យក្លាយជាពលរដ្ឋមានតម្លៃ មានភាពថ្លៃថ្នូរ មានឱកាសចូលរួមក្នុងការងារការពារ និងការកសាងប្រទេសជាតិរបស់ខ្លួន។

បន្ថែមលើសពីនេះច្បាប់កាតព្វកិច្ចយោធា មានសារៈសំខាន់ខ្លាំងណាស់សម្រាប់ជាតិ និងសម្រាប់យុវជន។ សម្រាប់ប្រទេសជាតិ ជាការពង្រឹងសមត្ថភាពការពារអធិបតេយ្យភាព ទឹកដី និងប្រជាជនរបស់ខ្លួនលើកកម្ពស់ស្មារតីសាមគ្គីជាតិ និងថែរក្សាស្ថិរភាពនយោបាយ ដើម្បីសន្តិភាព និងការអភិវឌ្ឍសេដ្ឋកិច្ចជាតិ។ សម្រាប់យុវជន កាតព្វកិច្ចយោធា ជាថ្នាលពង្រឹងវិន័យ សីលធម៌ ផ្តល់ការអប់រំ ការបណ្តុះភាពជាអ្នកដឹកនាំ ភាពធន់ ការពង្រឹងសុខភាពរាងកាយ និងផ្លូវចិត្ត លើកកំពស់ស្មារតីស្នេហាជាតិ និងជាឱកាសដើម្បីអភិវឌ្ឍខ្លួនឯងឱ្យក្លាយជាពលរដ្ឋមានសមត្ថភាពពិតប្រាកដ និងការទទួលខុសត្រូវ។

លោកបានបន្ថែមថា នៅក្នុងពិភពលោកដែលកំពុងផ្លាស់ប្តូរយ៉ាងលឿន និងពោរពេញដោយភាពមិនច្បាស់លាស់ ប្រទេសជាតិត្រូវការយុវជនដែលបានត្រៀមខ្លួនរួចជាស្រេច មិនត្រឹមតែបញ្ញានោះទេ ត្រូវត្រៀមទាំងសុខភាពរាង្គកាយ ស្មារតី និងសីលធម៌ផងដែរ។ វិស័យការពារជាតិរបស់ប្រទេសត្រូវតែខ្លាំង ដើម្បីទប់ស្កាត់ពីការគំរាមកំហែងខាងក្រៅ ឬអស្ថិរភាពផ្ទៃក្នុង។ ប្រទេសដែលមានប្រជាពលរដ្ឋទទួលបានការបណ្តុះបណ្តាល និងមានការរៀបចំការងារកាព្វកិច្ចយោធាបានល្អ នឹងអាចការពារសន្តិភាព និងស្ថិរភាពបានជាយូរអង្វែង។

លោកបណ្ឌិតបានបញ្ជាក់ថា ការចូលរួមក្នុងកាតព្វកិច្ចយោធារបស់យុវជនបង្ហាញថា ប្រទេសមានកម្លាំងបម្រុងច្បាស់លាស់ដែលមានវិន័យ និងជំនាញ អាចឆ្លើយតបបាននៅពេលមានស្ថានភាពបន្ទាន់ ដូចជា សង្គ្រាម ភេរវកម្ម ការវាយប្រហារតាមអ៊ីនធឺណិត គ្រោះមហន្តរាយធម្មជាតិ ឬវិបត្តិមនុស្សធម៌ ហើយក៏ជាសកម្មភាពដែលបានបង្ហាញពីមនសិកាចូលរួមកិច្ចការការពារជាតិ ការលះបង់យ៉ាងថ្លៃថ្នូរ និងទឹកចិត្តស្នេហាជាតិយ៉ាងស្មោះស្ម័គ្ររបស់យុវជនផងដែរ។

សូមបញ្ជាក់ថា នៅក្នុងឱកាសនោះលោកបណ្ឌិត សម តារា បានឧបត្ថម្ភដល់លោកគ្រូ អ្នកគ្រូ និងសិស្សានុសិស្សនូវថវិកាមួយចំនួនផងដែរ៕