(ព្រៃវែង)៖ មហាឧបាសកពុទ្ធសាសនូបត្ថម្ភក៍ អៀង សុធារ៉ា ជាអាជីវករតាមបែបព្រះពុទ្ធសាសនា និងជាពាណិជ្ជករ ល្បីឈ្មោះមួយរូបនៅកម្ពុជា បានស្នើដល់ប្រជាពលរដ្ឋ ដែលបានសិក្សាឈ្វេងយល់អំពីរមណីយដ្ឋានភូមិសុខារាវី ក្នុងការធ្វើជីសរីរាង្គ និងដាំដំណាំបែបធម្មជាតិ ហើយមានទិន្នផលខ្ពស់ និងលក់បានតម្លៃនៅក្នុងទីផ្សារ ពេលត្រឡប់ទៅវិញត្រូវធ្វើយ៉ាងណាឱ្យភូមិនីមួយៗក្លាយជាភូមិសរីរាង្គ គ្មានសារធាតុគីមីពុល។

ការស្នើបែបនេះរបស់លោកមហាឧបាសក អៀង សុធារ៉ា ក្នុងឱកាសប្រជាពលរដ្ឋមកពី ៣ភូមិ នៅក្នុងស្រុកស្វាយអន្ទរ ក្នុងនោះក៏មានភូមិបឹងវែង ស្ថិតនៅក្នុងឃុំដំរីពួន ដែលជាភូមិគំរូជាប់ចំណាត់ថ្នាក់ផ្កាយ២ ដែលដឹកនាំដោយ លោក ឡុក វុឌ្ឍី ប្រធានមន្ទីរអភិវឌ្ឍន៍ជនបទខេត្តព្រៃវែង ចុះសិក្សាឈ្វេងយល់អំពីការធ្វើជីសរីរាង្គ និងការដាំដំណាំនៅរមណីយដ្ឋានភូមិសុខារាវី ស្ថិតនៅក្នុងស្រុកកំពង់ត្របែក ខេត្តព្រៃវែង នាព្រឹកថ្ងៃទី ៧ ខែឧសភាឆ្នាំ ២០២៦នេះ ។

លោកមហាឧបាសក អៀង សុធារ៉ា បានបញ្ជាក់ថា​ ការធ្វើឲ្យភូមិនីមួយៗក្លាយជាភូមិសរីរាង្គ មានសារៈសំខាន់ដូចជា (១) យើងទទួលបានសុខភាពល្អ ប្រសើរជាងមុនបន្ថយ ជំងឺដង្កាត់ផ្សេងៗ ទាំងជំងឺភ្លាមៗដូចជាពុលចំណីអាហារ ជំងឺរ៉ាំរ៉ៃមានជំងឺមហារីក ទឹកនោមផ្អែមបានថយចុះ ជាពិសេសអ្នកភូមិដែលប្រើជីសរីរាង្គគឺថយជំងឺមុនគេ (២) អ្នកទទួលប្រើប្រាស់នេះ គឺពួកគាត់បានអាហារដែលល្អ ប្រៀបដូចយើងបានធ្វើបុណ្យ សម្រាប់ខ្លួនឯងផង និងសម្រាប់អ្នកប្រើប្រាស់ផង ហើយបើយើងធ្វើទៅបានល្អ មានទាំងបច្ចេកទេសត្រឹមត្រូវ មានបរិមាណច្បាស់លាស់ យើងមានទីផ្សារ គឺមានអ្នកចាំទិញ ដូច្នេះមានលក្ខខណ្ឌតែពីរទេបើយើងធ្វើដោយប្រើសារធាតុគីមីពុល គេមិនទិញនោះទេ តែបើយើងធ្វើតាមបែបសរីរាង្គវិញគេនឹងទិញ ទិញដោយមានបរិមាណផ្គត់ផ្គង់ច្បាស់លាស់ទៀតផង។

មហាបាសក អៀង សុធារ៉ា បានគូបញ្ជាក់ថា ការធ្វើផែនការច្បាស់លាស់វានាំឲ្យយើងសម្រេចបានជោគជ័យ ហើយពួកយើងនឹងអាចទិញបានខ្លះ និងសហការជាមួយបរទេសក្រៅស្រុកទៀត ដើម្បីជួយទិញពីប្រជាពលរដ្ឋយើងយកទៅឱ្យគេប្រើប្រាស់ យើងអ្នកបានថវិកា និងបានសុខភាពល្អមកវិញផងដែរ។

មហាឧបាសកអៀង សុធារ៉ា បានបន្ថែមថា លោកធ្លាប់បានជជែកជាមួយនឹងក្រុមហ៊ុនជប៉ុនធំមួយដែរ ហើយខាងជប៉ុនក៏សុំឲ្យយើង ទី១៖ ធ្វើឲ្យទៅជាសិរីរាង្គ ទី២៖ យើងត្រូវសន្យាថា មានផលិតផលគ្រប់គ្រាន់ដែលគេចង់បាន ហើយពាក់ព័ន្ធពីការងារទាំងអស់នេះ នៅតែបន្តដោះស្រាយគ្នាជាបន្តបន្ទាប់មកទៀត ទាំងបច្ចេកទេស មូលនិធិគាំទ្រ ការគាំទ្រផ្នែកទីផ្សារ យើងនិងមានជជែកគ្នាជាមួយលោកប្រធានមន្ទីរអភិវឌ្ឍន៍ជនបទខេត្ត ដើម្បីផ្សព្វផ្សាយ ធ្វើឲ្យភូមិនីមួយៗក្លាយជាភូមិគំរូយ៉ាងពិតប្រាកដ។

សូមបញ្ជាក់ថា នៅរមណីយដ្ឋានភូមិសុខារាវី មានការដាំបន្លែសរីរាង្គ និងផ្លែឈើហូបផ្លែ ចិញ្ចឹមសត្វពាហនៈ និងត្រីជាច្រើនប្រភេទផងដែរ៕