(ហ្វីលីពីន)៖ ក្នុងឱកាសអមដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចូលរួមកិច្ចប្រជុំកំពូលអាស៊ានលើកទី៤៨ នៅកោះសេប៊ូ សាធារណរដ្ឋហ្វីលីពីន អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា នាល្ងាចថ្ងៃព្រហស្បតិ៍ ទី៧ ខែឧសភា ឆ្នាំ២០២៦ បានដឹកនាំគណៈប្រតិភូសភាពាណិជ្ជកម្មកម្ពុជា ជួបពិភាក្សាការងារ និងអាហារពេលល្ងាច ជាមួយគណៈប្រតិភូធុរកិច្ចហ្វីលីពីន ដែលដឹកនាំដោយ លោក ជូត អាហ្គីឡា (Jude Aguilar) ប្រធានសភាពាណិជ្ជកម្ម និងឧស្សាហកម្មហ្វីលីពីន។

ជំនួបពិភាក្សានេះ រៀបចំឡើងក្នុងគោលបំណងពង្រឹងទំនាក់ទំនងរវាងស្ថាប័នទាំងពីរឱ្យកាន់តែជិតស្និទ្ធ ព្រមទាំងជំរុញសកម្មភាពពាណិជ្ជកម្ម និងការវិនិយោគទ្វេភាគីរវាងកម្ពុជា និងហ្វីលីពីន។

ក្នុងឱកាសនេះផងដែរ ធុរជននៃប្រទេសទាំងពីរ បានជួបប្រាស្រ័យទាក់ទងគ្នាដោយផ្ទាល់ ដើម្បីពិភាក្សា និងស្វែងយល់ពីលទ្ធភាពនៃកិច្ចសហប្រតិបត្តិការ លើវិស័យសក្តានុពលជាច្រើន រួមមាន៖ វិស័យហិរញ្ញវត្ថុ និងការវិនិយោគ កសិកម្ម និងឧស្សាហកម្មកែច្នៃម្ហូបអាហារ វិស័យទេសចរណ៍ អចលនទ្រព្យ និងសំណង់ ឧស្សាហកម្មអេឡិចត្រូនិក និងវិស័យសំខាន់ៗដទៃទៀត៕