(ភ្នំពេញ)៖ និយ័តករបរធនបាលកិច្ច (ន.ប.ធ.) ដែលជាអង្គភាពអនុវត្តគម្រោងប្រកួតប្រជែងខ្សែច្រវាក់តម្លៃ និងលើកកម្ពស់សុវត្ថិភាពកសិកម្មសម្រាប់សមាសភាគទី១ (ACSEP-PIU1) ក្នុងក្របខណ្ឌក្រសួងសេដ្ឋកិច្ចនិងហិរញ្ញវត្ថុ (ក.ស.ហ.វ.) នៅថ្ងៃទី០៨ ខែឧសភា ឆ្នាំ២០២៦នេះ​ បានរៀបចំវគ្គបណ្តុះបណ្តាលស្តីពី «នីតិប្រតិបត្តិហិរញ្ញប្បទានខ្សែច្រវាក់តម្លៃកសិកម្ម គម្រោងប្រកួតប្រជែងខ្សែច្រវាក់តម្លៃ និងលើកកម្ពស់សុវត្ថិភាពកសិកម្ម» ក្រោមអធិបតីភាពលោក សុខ ដារ៉ា អគ្គនាយកនៃនិយ័តករបរធនបាលកិច្ច និងជាប្រធានគ្រប់គ្រងគម្រោង ACSEP-PIU1 នៅសណ្ឋាគារភ្នំពេញ។

កម្មវិធីនេះ រៀបចំឡើងក្នុងគោលបំណងផ្តល់ចំណេះដឹងដល់មន្រ្តី នៃគ្រឹះស្ថានហិរញ្ញវត្ថុ និងធនាគារលើនីតិវិធីប្រតិបត្តិហិរញ្ញប្បទានខ្សែច្រវាក់តម្លៃកសិកម្ម, ផ្តល់ចំណេះដឹងដល់មន្រ្តី នៃគ្រឹះស្ថានហិរញ្ញវត្ថុ និងធនាគារលើការបំពេញទម្រង់ព័ត៌មានគ្រប់គ្រង ផលប៉ះពាល់បរិស្ថាននិងសង្គម ដើម្បីជួយដល់មន្រ្តីឥណទាន ក្នុងការពិនិត្យ និងការរៀបចំឯកសាឥណទាន ដល់អតិថិជនគោលដៅរបស់គម្រោង។

កម្មវិធីនេះ មានការចូលរួមដោយ សមាជិក/សមាជិកា និងទីប្រឹក្សារបស់ ACSEP-PIU1, តំណាងអង្គភាពគ្រប់គ្រងគម្រោងមកពីក្រសួងកសិកម្ម រុក្ខាប្រមាញ់ និងនេសាទ, តំណាងសាជីវកម្មធានាឥណទានកម្ពុជា (CGCC), គ្រឹះស្ថានហិរញ្ញវត្ថុ និងធនាគារទាំង ៥ រួមមាន៖ ធនាគារប្រៃសណីយ៍កម្ពុជា, ធនាគារហ្វីលីព ភីអិលស៊ី, គ្រឹះស្ថានមីក្រូហិរញ្ញវត្ថុ អិលអូអិលស៊ី (ខេមបូឌា) ភីអិលស៊ី, គ្រឹះស្ថានមីក្រូហិរញ្ញវត្ថុ អេអឹមខេ ភីអិលស៊ី និងគ្រឹះស្ថានមីក្រូហិរញ្ញវត្ថុអម្រឹត៕