(កំពង់ស្ពឺ)៖ មន្ទីរការងារ និងបណ្តុះបណ្តាលវិជ្ជាជីវៈ ខេត្តកំពង់ស្ពឺ បានសហការជាមួយរដ្ឋបាលខេត្តកំពង់ស្ពឺ នៅព្រឹកថ្ងៃទី៨ ខែឧសភា ឆ្នាំ២០២៦ បានរៀបចំពិធីសំណេះសំណាល អបអរសាទរខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ១ ឧសភា ២០២៦ នៅរោងចក្រ ស៊ុយយ៉ាត អេ (ខេមបូឌា) ឯ.ក មានអាស័យដ្ឋានផ្លូវជាតិ លេខ៤៤ ភូមិបូរីកម្មករ សង្កាត់ច្បារមន ក្រុងច្បារមន ដែលមានកម្មករ-និយោជិត ចូលរួមចំនួន១,២០០នាក់។

ការប្រារព្ធពិធីនេះ ស្ថិតក្រោមអធិបតីភាព លោក យឹម សុខុម ប្រធានក្រុមប្រឹក្សាខេត្ត លោកមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ។

ក្នុងឱកាសនៃការប្រារព្ធពិធីអបអរសាទរនេះ លោកបណ្ឌិត អភិបាលខេត្តកំពង់ស្ពឺ បានសួរសុខទុក្ខបងប្អូន កម្មករ-និយោជិត នៅតាមច្រវ៉ាក់ផលិតកម្ម និងបានជួបសំណេះសំណាល ជាមួយតំណាងនិយោជក ដើម្បីជាការលើកទឹកចិត្ត ដល់វិនិយោគិន ព្រមទាំងទទួលយកសំណូមពរ និងដោះស្រាយក្តីកង្វល់នានារបស់និយោជក។

លោកបណ្ឌិត ជាម ច័ន្ទសោភ័ណ បានលើកឡើងថា បងប្អូនកម្មករនិយោជិត នាពេលនេះយើងទាំងអស់គ្នា បានចូលរួមអបអរសាទរក្នុងឱកាសខួបអនុស្សាវរីយ៍លើកទី១៤០ ទិវាពលកម្មអន្តរជាតិ ជាមួយបងប្អូនកម្មករនិយោជក និងបានធ្វើការណែនាំសូមឲ្យ និយោជក សហជីព និងបងប្អូន កម្មករនិយោជិត សូមធ្វើការងារជាមួយគ្នា ចេះយោគយល់អធ្យាស្រ័យគ្នា សូមធ្វើយ៉ាងណាឲ្យកន្លែងការងាររបស់បងប្អូនប្រែក្លាយទៅជា «សហគ្រាសមួយក្លាយជាសហគមន៍សុខសាន្តមួយ» ស្រមតាមអនុសាសន៍របស់ សម្តេចអគ្គមហាសេនាបតីតេជោ ហ៊ុន សែន ដើម្បីទទួលបានអត្ថប្រយោជន៍រួមទាំងអស់គ្នា។

លោកបណ្ឌិត បានបន្តថា ក្រោមការដឹកនាំប្រកបដោយគតិបណ្ឌិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជានិងក្រោមយុទ្ធសាស្ត្រទាកម៉ូយ បានធ្វើឱ្យខេត្តកំពង់ស្ពឺ មានការអភិវឌ្ឍន៍ រីកចម្រើនគួរឱ្យកត់សម្គាល់ ពិសេសគឺវិស័យឧស្សាហកម្មកាត់ដេរ។ បច្ចុប្បន្នខេត្តនេះមានរោងចក្រ សហគ្រាសប្រមាណជាង១៦០០កន្លែង និងមានកម្មករ កម្មការិនី កំពុងបម្រើការប្រមាណជាង៣៣ម៉ឺននាក់។

ជាមួយនិងកំណើនឥតឈប់ឈរនៃរោងចក្រ សហគ្រាសនេះដែរ បានប្រែក្លាយជីវភាពរបស់បងប្អូនប្រជាពលរដ្ឋ ដែលកន្លងមកធ្លាប់តែគេមើលងាយមើលថោក ហើយចំអកឡកលើយថា ជាខេត្តប៊ុមប៊ឺ ឱ្យមានជីវភាពធូរធារីកចម្រើន និងស៊ីវិល័យតាមរយៈការងារនិងតំលៃអចលនទ្រព្យ។

លោកបណ្ឌិត បានបញ្ជាក់ដោយសង្កត់ធ្ងន់ថា បងប្អូនកម្មករ និងនិយោជិតកុំមានការអាក់អន់ស្រពន់ចិត្តក្នុងរង្វង់ការងារជាមួយគ្នា ធ្វើយ៉ាងណារិះរកគ្រប់មធ្យោបាយដើម្បីដោះស្រាយ មិនត្រូវនាំគ្នាប្រមូលផ្តុំ និងធ្វើបាតុកម្ម ឬ កូដកម្មនោះទេ នាំគ្នាជួយការពារឆ្នាំងបាយរបស់ខ្លួនឯង និងក្រុមគ្រួសារ ហើយកុំជឿលើការញុះញង់ របស់ក្រុមណាមួយដែលចង់បំផ្លាញស្ថិរភាពរោងចក្រ និងសង្គម៕