រោងចក្រពីរនៅខណ្ឌដង្កោ និងស្រុកអង្គស្នួល សង្ស័យបង្ហូរសំណល់រាវមិនសំអាត ចូលទៅប្រឡាយ តែមិនអនុញ្ញាតឱ្យមន្ត្រីអធិការកិច្ចផ្នែកបរិស្ថានចូលពិនិត្យ
08-05-2026 17:37
(ភ្នំពេញ)៖ រោងចក្រចំនួនពីរជារោងចក្រដំណាប់ស្វាយ និងបោកគក់ ស្ថិតនៅភូមិសាស្ត្របឹងធំ ខណ្ឌដង្កោ រាជធានីភ្នំពេញ និងឃុំក្រាំងម្កាក់ ស្រុកអង្គស្នួល ខេត្តកណ្តាល ត្រូវបានដាក់ការសង្ស័យថា បង្ហូរកាកសំណល់រាវមិនទាន់សំអាតមានពណ៌ខ្មៅ និងក្លិនស្អុយ ចូលក្នុងទឹកប្រឡាយសាធារណៈ។ នៅពេលមន្ត្រីអធិការកិច្ចរបស់ក្រសួងបរិស្ថាន ចុះទៅពិនិត្យមិនត្រូវបានអនុញ្ញាតឱ្យចូលនោះឡើយ ដោយភាគីរោងចក្រលើកហេតុផលថាមិនបានជូនដំណឹងជាមុន។ មន្ត្រីអធិការកិច្ចតបថា បើជូនដំណឹងមុន តើរោងចក្ររក្សាភស្តុតាងដែរទេ?
យោងតាមរបាយការណ៍បានឱ្យដឹងថា នៅថ្ងៃទី៨ ខែឧសភា ឆ្នាំ២០២៦នេះ ក្រុមការងារអធិការកិច្ចរបស់ក្រសួងបរិស្ថាន ដោយមានការចូលរួមសហការពីមន្ត្ទីរបរិស្ថានរាជធានីភ្នំពេញ រដ្ឋបាលខណ្ឌកំបូល រដ្ឋបាលស្រុកអង្គស្នួល និងរដ្ឋសង្កាត់បឹងធំ បានចុះត្រួតពិនិត្យនៅតាមរោងចក្រ ដែលពាក់ព័ន្ធការបង្ហូរសំណល់រាវមានពណ៌ខ្មៅ និងក្លិនស្អុយ ចូលក្នុងប្រឡាយទឹកសាធារណៈនៅភូមិសាស្ត្រនៃសង្កាត់បឹងធំ ខណ្ឌកំបូល រាជធានីភ្នំពេញ និងឃុំក្រាំងម្កាក់ ស្រុកអង្គស្នួល ខេត្តកណ្តាល។
ការចុះពិនិត្យ បានរកឃើញថា មានសំណល់រាវផ្ទុកដោយពណ៌ខៀវក្រម៉ៅ និងក្លិនស្អុយ បានបង្ហូរចេញពីតំបន់ទីតាំងរោងចក្រប្រមូលផ្តុំ ស្ថិតនៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ចូលក្នុងប្រឡាយទឹកសាធារណៈ និងដីវាលទំនាប។
ក្រុមការងារអធិការកិច្ចបានកំណត់មុខសញ្ញាប្រភពបញ្ចេញសំណល់រាវខាងលើចំនួន២ទីតាំងរួមមាន៖ ទី១) រោងចក្រផលិតដំណាប់ស្វាយ (ពុំមានឈ្មោះ) និង២) រោងចក្របោកគក់ជំរះក្អែល ឈ្មោះ Kniteracy Asia Company Limited Garment, Knitting។
របាយការណ៍បានបញ្ជាក់ថា ដោយមានការសង្ស័យបែបនេះ ក្រុមការងារអធិការកិច្ច បានទៅកាន់រោងចក្រទាំងពីរ ប៉ុន្តែពុំអាចចូលត្រួតពិនិត្យបាននោះឡើយ។ នៅទីតាំងរោងចក្រស្វាយ បានចាក់សោរទ្វារខាងមុខរោងចក្រជាប់ មិនអនុញ្ញាតឱ្យចូលឡើយ ដោយមានការអះអាងថា អ្នកគ្រប់គ្រងរោងចក្រជជនជាតិចិនពុំនៅ ហើយរោងចក្រពុំមានការងារធ្វើទេ។
ដោយឡែករោងចក្រ Kniteracy Asia Company Limited Garment, Knitting. តំណាងរោងចក្រ មិនអនុញ្ញាតឱ្យក្រុមការងារចូលត្រួតពិនិត្យនោះឡើយ ដោយលើកហេតុផលថា ពុំមានដាក់លិខិត ឬជូនដំណឹង មករោងចក្រឲ្យដឹងមុន។
យោងតាមក្រមបរិស្ថាន និងធនធានធម្មជាតិ មាត្រា៨១៥ បានចែងថា មន្ត្រីអធិការកិច្ចរបស់ក្រសួងបរិស្ថាន ទទួលបន្ទុកវិស័យបរិស្ថាន និងធនធានធម្មជាតិ មានតួនាទី និងភារកិច្ច ធ្វើអធិការកិច្ច តាមដាន ស្រាវជ្រាវ ត្រួតពិនិត្យ និងជំរុញការអនុវត្តបញ្ញតិនៃក្រមពាក់ព័ន្ធនឹងកិច្ចការពារបរិស្ថាន និងកិច្ចគាំពារបរិស្ថាន ក្រោមសមត្ថកិច្ចរបស់ក្រសួងទទួលបន្ទុកវិស័យបរិស្ថាន និងធនធានធម្មជាតិ។
យោងតាមក្រមបរិស្ថាន និងធនធានធម្មជាតិ ក៏បានចែងដែរថា រោងចក្រ សហគ្រាសទាំងអស់នៅកម្ពុជា ក៏មានកាតព្វកិច្ចទទួលខុសត្រូវលើផ្នែកបរិស្ថាន និងធនធានធម្មជាតិ។ ដូច្នេះរោងចក្រ សហគ្រាសទាំងឡាយ ត្រូវតែចូលរួមសហការជាមួយមន្ត្រីជំនាញលើកិច្ចការពារបរិស្ថាន និងធនធានធម្មជាតិ៕
