(ភ្នំពេញ)៖ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នារសៀលថ្ងៃទី០៨ ខែឧសភា ឆ្នាំ២០២៦ បានអនុញ្ញាតឱ្យលោក RAM Kishan នាយកអង្គការភ្លែនអន្តរជាតិប្រចាំតំបន់អាស៊ី និងប៉ាស៊ីហ្វិក និងសហការី ចូលជួបសម្តែងការគួរសម និងពិភាក្សាការងារ នៅទីស្តីការក្រសួងអភិវឌ្ឍន៍ជនបទ។

ក្នុងកិច្ចជំនួបនេះ លោករដ្ឋមន្ត្រី បានសម្តែងការស្វាគមន៍ចំពោះលោកនាយក និងសហការីដែលបានអញ្ជើញមកនាឱកាសនេះ ក៏ដូចជាសម្តែងការអបអរសាទរចំពោះលោក RAM Kishan ដែលទើបទទួលបានតួនាទីជានាយកអង្គការភ្លែនប្រចាំតំបន់អាស៊ី និងប៉ាស៊ីហ្វិកផងដែរ។ លោករដ្ឋមន្ត្រី បានជម្រាបជូនប្រតិភូ អំពីការអភិវឌ្ឍប្រទេស ក្រោមម្លប់សន្តិភាព ក្រោមការដឹកនាំដ៏ឈ្លាសវៃ និងត្រឹមត្រូវរបស់ សម្តេចអគ្គមហាសេនាបតីតេជោ ហ៊ុន សែន បិតាសន្តិភាពនៃកម្ពុជា អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា និងក្រោមការដឹកនាំបន្តវេនប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈការដាក់ចេញនូវយុទ្ធសាស្ត្របញ្ចកោណដំណាក់កាលទី១ សំដៅសម្រេចឱ្យបានចក្ខុវិស័យកម្ពុជាឆ្នាំ ២០៥០ ជាប្រទេសដែលមានប្រាក់ចំណូលកម្រិតខ្ពស់។

លោករដ្ឋមន្ត្រីក៏បានបន្តលើកឡើងអំពីសមិទ្ធផលនានាដែលសម្រេចបាននាពេលកន្លងមករបស់ក្រសួងអភិវឌ្ឍន៍ជនបទ ក្រោមចក្ខុវិស័យ «កសាងសង្គមជនបទកម្ពុជាឱ្យមានវិបុលភាពប្រកបដោយបរិយាបន្ន សមធម៌ និងចីរភាព» ស្របតាមគោលនយោបាយជាតិស្ដីពី ការអភិវឌ្ឍជនបទ ឆ្នាំ២០២៥-២០៣៥ ដែលបានដាក់ចេញនូវកម្មវិធីអាទិភាពរបស់ខ្លួនចំនួន៥ ផងដែរ។

បន្ថែមពីនេះ លោករដ្ឋមន្ត្រីក៏បានគូសបញ្ជាក់បន្ថែមផងដែរថា សមិទ្ធផលទាំងអស់នេះ បានមកពីការចូលរួមចំណែករបស់ដៃគូអភិវឌ្ឍន៍ អង្គការមិនមែនរដ្ឋាភិបាលនានា ដែលក្នុងនោះក៏មានអង្គការ Plan Internationalផងដែរ ដែលជាដៃគូយ៉ាងជិតស្និត ក្នុងការអនុវត្តកម្មវិធីយុទ្ធសាស្ត្ររបស់ក្រសួង ពិសេសលើកម្មវិធីទី២ ដែលផ្តោតលើការងារទឹកស្អាត និងអនាម័យនៅជនបទ ដែលអាចជួយឱ្យក្រសួងសម្រេច បានតាមគោលដៅឆ្នាំ២០៣០ ជនបទនៅកម្ពុជាទទួលបានអាត្រាគ្របដណ្ដប់នៃទឹកស្អាត និងអនាំម័យកម្រិតមូលដ្ឋានមានអត្រា១០០%។ សូមបញ្ជាក់ថានៅក្នុងឆ្នាំ២០២៥ កន្លងនៅនេះ កម្ពុជាត្រូវបានប្រកាសទទួលស្គាល់ជាប្រទេសបញ្ចប់ការបន្ទោបង់ពាសវាលពាសកាល (ODF)។

ជាមួយគ្នានេះ លោកនាយកអង្គការភ្លែនប្រចាំតំបន់អាស៊ី និងប៉ាស៊ីហ្វិក បានសម្តែងការកោតសរសើរ និងវាយតម្លៃខ្ពស់ចំពោះការអភិវឌ្ឍក្នុងសន្ទុះមួយដ៏លឿនរបស់កម្ពុជា។ លោកនាយកក៏បានសម្តែងការអបអរសាទរចំពោះសមិទ្ធផលនានា ដែលក្រសួងអាចសម្រេចបាននាពេលកន្លងមក។ លោកបានសម្តែងសេចក្តីរំភើប និងត្រេកអរ ចំពោះការលើកឡើងរបស់លោករដ្ឋមន្ត្រី ដែលបេសកកម្មរបស់អង្គការភ្លែនអន្តរជាតិស្របជាមួយនឹងផែនការយុទ្ធសាស្រ្តរបស់ក្រសួងអភិវឌ្ឍន៍ជនបទ។ លោកបានសម្តែងការប្តេជ្ញាចិត្តយ៉ាងមុតមាំក្នុងការចូលរួមសហការជាមួយក្រសួងអភិវឌ្ឍន៍ជនបទបន្តទៀតដើម្បីសម្រេចបានផែនការយុទ្ធសាស្រ្តជាតិស្តីពីការផ្គត់ផ្គង់ទឹកស្អាត និងការលើកកម្ពស់អនាម័យនៅជនបទឆ្នាំ២០២៦-២០៣៣។

ឆ្លៀតក្នុងឱកាសនេះដែរ រដ្ឋមន្ត្រី បានសម្តែងសេចក្ដីរីករាយ និងថ្លែងអំណរគុណចំពោះ លោកនាយក និងសហការី ដែលបានបង្ហាញអំពីការប្តេជ្ញាចិត្តបន្តកិច្ចសហប្រតិបត្តិការ ជាមួយក្រសួងអភិវឌ្ឍន៍ជនបទ លោករដ្ឋមន្ត្រីក៏បានបង្ហាញអំពីឆន្ទៈធ្វើអោយកិច្ចសហប្រតិបត្តិការនេះសម្រេចបានជោគជ័យផងដែរ៕