គណៈបញ្ជាការឯកភាពខេត្តប៉ៃលិន បន្តដាក់គោលដៅរឹតបន្តឹងសន្តិសុខ ត្រួតពិនិត្យអាវុធជាតិផ្ទុះ គ្រឿងញៀន និងជនបរទេសខុសច្បាប់ ដើម្បីធានាដល់សន្តិសុខសណ្តាប់ធ្នាប់ជូនប្រជាពលរដ្ឋ
08-05-2026 21:22
(ប៉ៃលិន)៖ នាត្រីថ្ងៃទី០៨ ខែឧសភា ឆ្នាំ២០២៦ គណៈបញ្ជាការឯកភាពខេត្តប៉ៃលិន បានចាត់តាំងកម្លាំងសមត្ថកិច្ចចម្រុះ ដាក់គោលដៅត្រួតពិនិត្យដោយគ្មានកំណត់ពេល នៅតាមដងផ្លូវជាតិលេខ ៥៧ និងលេខ ៥៩។ យុទ្ធនាការនេះធ្វើឡើងក្នុងគោលបំណងស្វែងរកសារធាតុញៀន អាវុធជាតិផ្ទុះ និងទប់ស្កាត់ការលួចចូលស្នាក់នៅខុសច្បាប់របស់ជនបរទេស ជាពិសេសបង្ក្រាបបទល្មើសបច្ចេកវិទ្យា (Online Scam) ដើម្បីធានាសន្តិសុខ សណ្តាប់ធ្នាប់សង្គម ស្របតាមវិធានការម៉ឺងម៉ាត់របស់រាជរដ្ឋាភិបាលក្នុងការលុបបំបាត់បទល្មើសទាំងនេះឱ្យអស់ពីកម្ពុជា។
ការបន្តយុទ្ធនាការនេះ គឺដើម្បីរឹតបន្តឹងការអនុវត្តច្បាប់ សន្តិសុខសង្គម និងសណ្តាប់ធ្នាប់សាធារណៈនៅក្នុងខេត្តទាំងមូល។ រដ្ឋបាលខេត្តបានយកចិត្តទុកដាក់ខ្ពស់លើការគ្រប់គ្រងសុវត្ថិភាពតាមទីតាំងស្នាក់នៅប្រមូលផ្តុំ ទីតាំងកាស៊ីណូ និងការស្នាក់នៅរបស់ជនបរទេស ដើម្បីបង្ការ និងបង្ក្រាបបទល្មើសនានាឱ្យមានប្រសិទ្ធភាពខ្ពស់ ដូចជា ការជួញដូរគ្រឿងញៀន ការប្រើប្រាស់អាវុធខុសច្បាប់ ការជួញដូរមនុស្ស និងការចាប់ជំរិត។
ការអនុវត្តច្បាប់ដ៏តឹងរ៉ឹងនេះ ធ្វើឡើងក្រោមការដឹកនាំប្រកបដោយឆន្ទៈមោះមុតរបស់រាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។ កន្លងមក សមត្ថកិច្ចបានឃាត់ខ្លួនឧក្រិដ្ឋជន និងអ្នកពាក់ព័ន្ធនឹងករណីឆបោកអនឡាញជាបន្តបន្ទាប់ រួចបញ្ជូនទៅតុលាការដើម្បីផ្តន្ទាទោស និងបណ្តេញចេញពីកម្ពុជា ព្រមទាំងបានសហការផ្តល់ព័ត៌មានពីបណ្តាញមេខ្លោងទៅកាន់បណ្តាប្រទេសក្នុងតំបន់ និងអន្តរជាតិជាច្រើនករណីផងដែរ។
