(វៀតណាម)៖ ដោយបានការអនុញ្ញាតពីលោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា បានដឹកនាំគណៈប្រតិភូនៃវិទ្យាស្ថានទំនាក់ទំនងអន្តរជាតិនៃកម្ពុជា ទៅបំពេញទស្សនកិច្ចការងារនៅរដ្ឋធានីហាណូយ នៃសាធារណរដ្ឋសង្គមនិយមវៀតណាម តបតាមការអញ្ជើញរបស់វិទ្យាស្ថានទំនាក់ទំនងអន្តរជាតិការពារជាតិនៃក្រសួងការពារប្រទេសវៀតណាម ចាប់ពីថ្ងៃទី៦ ដល់ថ្ងៃទី៩ ខែឧសភា ឆ្នាំ២០២៦។

ក្នុងដំណើរទស្សនកិច្ចការងារនេះ បណ្ឌិត គិន ភា និងសហការីបានចូលរួមសិក្ខាសាលា និងពិភាក្សាទ្វេភាគីជាមួយថ្នាក់ដឹកនាំនិងមន្ត្រីនៃវិទ្យាស្ថានទំនាក់ទំនងអន្តរជាតិការពារជាតិ នៃក្រសួងការពារប្រទេសវៀតណាម លើប្រធានបទពាក់ព័ន្ធនឹងទំនាក់ទំនងទ្វេភាគីរវាងកម្ពុជា និងវៀតណាម និងបញ្ហាតំបន់ និងអន្តរជាតិ ជាពិសេសបញ្ហាសន្តិភាព ស្ថិរភាព វិបុលភាព និងកិច្ចសហប្រតិបត្តិការរវាងបណ្តាប្រទេសក្នុងអនុតំបន់មេគង្គ។

ក្នុងឱកាសនោះដែរ វិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា ក៏បានចុះហត្ថលេខាលើអនុស្សរណៈនៃយោគយល់គ្នាជាមួយវិទ្យាស្ថានទំនាក់ទំនងអន្តរជាតិការពារជាតិនៃក្រសួងការពារប្រទេសវៀតណាមផងដែរ។

អនុស្សរណ:នៃការយោគយល់គ្នានេះ មានគោលបំណងលើកកម្ពស់កម្រិតវិទ្យាសាស្ត្រ និងការសិក្សាស្រាវជ្រាវបស់វិទ្យាស្ថានទាំងពីរ និងមានគោលដៅរួមចំណែកពង្រឹងចំណងមិត្តភាព និងការយល់ដឹងរវាងប្រជាជននៃប្រទេសទាំងពីរ ក៏ដូចជារវាងស្ថាប័នទាំងពីរផងដែរ។

អនុស្សរណៈនេះត្រូវបានចុះហត្ថលេខានៅថ្ងៃទី៧ ខែឧសភា ឆ្នាំ ២០២៦ នៅរដ្ឋធានីហាណូយ ប្រទេសវៀតណាម ដោយបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជានៃរាជបណ្ឌិត្យសភាកម្ពុជា និងឧត្តមសេនីយ៍ទោបណ្ឌិត ហ្សឿង ហ្គុយ ណាំ (Duong Quy Nam) ប្រធានវិទ្យាស្ថានទំនាក់ទំនងអន្តរជាតិការពារជាតិនៃក្រសួងការពារប្រទេសវៀតណាម៕