(ភ្នំពេញ)៖ អគ្គលេខាធិការដ្ឋានគណៈកម្មការ គ្រប់គ្រងល្បែងពាណិជ្ជកម្មកម្ពុជា (គ.ល.ក.) បានសម្រេចដកហូតអាជ្ញាបណ្ណកាស៊ីណូ អ៉ីហ្គល ឃីង របស់ក្រុមហ៊ុន ធីអេស ចាំណុង ស៊ិនវេសរមន ឯ.ក ដែលមានទីតាំងស្ថិតនៅភូមិដូង ឃុំបឹងរាំង ស្រុកកំរៀង ខេត្តបាត់ដំបង ក្រោយពាក់ព័ន្ធការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS)។ នេះបើតាមសេចក្តីប្រកាសព័ត៌មានរបស់ អគ្គលេខាធិការដ្ឋានគណៈកម្មការ គ្រប់គ្រងល្បែងពាណិជ្ជកម្មកម្ពុជា ដែលបណ្តាញព័ត៌មាន Fresh News ទទួលបាននៅថ្ងៃទី៩ ខែឧសភានេះ។

សូមជម្រាបថា កាលពីរសៀលថ្ងៃទី៥ ខែឧសភា ឆ្នាំ២០២៦, គ.ល.ក. បានចូលរួមក្នុងប្រតិបត្តិការចុះ ត្រួតពិនិត្យជាក់ស្តែង និងចែកឆេរទីតាំង កាស៊ីណូ អ៉ីហ្គល ឃីង របស់ក្រុមហ៊ុន ធីអេស ចាំណុង ស៊ិនវេសរមន ឯ.ក ដែលសង្ស័យលបលួចប្រព្រឹត្តបទល្មើសឆបោកតាម ប្រព័ន្ធបច្ចេកវិទ្យា។

ប្រតិបត្តិការនេះ ដឹកនាំដោយក្រុមការងារទី៣ នៃក្រុមការងារចម្រុះចំណុះលេខាធិការដ្ឋាន នៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ONLINE SCAMS) (គ.ប.ច.ប.) ក្រោមកិច្ចសហការជាមួយ គណៈបញ្ជាការឯកភាពរដ្ឋបាលខេត្តបាត់ដំបង និងការសម្របសម្រួលនីតិវិធីពីព្រះរាជអាជ្ញារង នៃអយ្យការអមសាលាដំបូង ខេត្តបាត់ដំបង។

ក្នុងការចុះពិនិត្យ និងឆែកឆេរនេះ, កម្លាំងសមត្ថកិច្ច បានឃាត់ខ្លួនជនសង្ស័យសរុប ២០រូប (ចិនចំនួន ១៧ រូប និងខ្មែរ ៣ រូប) ព្រមទាំងបានដកហូតវត្ថុតាងមួយចំនួនរួមមាន កុំព្យូទ័រ All in one ចំនួន ៩៩ គ្រឿង, Laptop ចំនួន ១ គ្រឿង, ធុងកុំព្យូទ័រចំនួន ៩ គ្រឿង, Monitor ចំនួន ៨ គ្រឿង, ទូរសព្ទសរុបចំនួន ៣៣៦ គ្រឿង, ព្រមទាំង ឧបករណ៍និងសម្ភារដែលមានការពាក់ព័ន្ធផ្សេងទៀត។

លទ្ធផល នៃការពិនិត្យលម្អិតបន្ថែមលើឧបករណ៍ និងសម្ភារដែលបានដកហូតបង្ហាញថា ឧបករណ៍ទាំងនេះត្រូវបាន ប្រើប្រាស់សម្រាប់ការឆបោកតាមប្រព័ន្ធបច្ចេកវិទ្យា ក្រោមរូបភាពជាល្បិចបោកបញ្ឆោត ឱ្យធ្វើការវិនិយោគភាគហ៊ុន (Stock Investment) ដោយបានប្រើប្រាស់បណ្តាញសង្គម (Whatapp) ជាមធ្យោបាយទំនាក់ទំនងទៅជនរងគ្រោះសម្រាប់ ការផ្ទេរប្រាក់។ ទន្ទឹមនេះ, គណនីធនាគារចំនួន ១៣ និងអចលនវត្ថុចំនួន ៩ កន្លែង ដែលមានការពាក់ព័ន្ធ ត្រូវបាន ស្ថាប័នអយ្យការអមសាលាដំបូងខេត្តបាត់ដំបង ចេញដីកាសម្រេចឃាត់ទុកទ្រព្យសម្បត្តិជាបណ្តោះអាសន្ន។

ក្រោយពីបញ្ចប់ប្រតិបត្តិការ, ជនសង្ស័យ និងវត្ថុតាងទាំងអស់ត្រូវបានប្រគល់ជូនស្នងការរងទទួលផែនការងារព្រហ្មទណ្ឌ ដើម្បី សាកសួរ គ្រប់គ្រង និងកសាងសំណុំរឿង តាមនីតិវិធីជាធរមាន៕