(កណ្ដាល)៖ លោកស្រី យក់ សម្បត្ដិ រដ្ឋលេខាធិការក្រសួងសុខាភិបាល បានដឹកនាំប្រតិភូសុខាភិបាល ដោយមានការចូលរួមពីក្រុមការងារនៅព្រលានយន្ដហោះ និងផ្នែកពាក់ព័ន្ធ ចុះពិនិត្យមើលទីតាំងសុខាភិបាល ផ្នែកចត្តាឡីស័ក ដើម្បីត្រៀមបង្ការ និងទប់ស្កាត់ ការនាំចូល នូវជំងឺឆ្លង Hantavirus នៅអាកាសយានដ្ឋានអន្តរជាតិ តេជោ ស្ថិតនៅស្រុកកណ្តាលស្ទឹង ខេត្តកណ្តាល នាថ្ងៃទី៨ ខែឧសភា ឆ្នាំ២០២៦។

ក្រោមការណែនាំដ៏ខ្ពង់ខ្ពស់ពីលោកសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល, បន្ទាប់ពីលោកស្រី យក់ សម្បត្ដិ ចុះពិនិត្យទីតាំងខាងលើរួចលរាល់ ក៏បានផ្តល់អនុសាសន៍ រួមទាំងវិធានការសំខាន់ៗមួយចំនួន រួមមាន៖
* កំណត់ជាក់លាក់ និងតាមដានយ៉ាងយកចិត្តទុកដាក់នូវកំដៅគ្រប់អ្នកដំណើរចូលទាំងអស់នៅទីតាំងអ្នកដំណើរមកដល់
* ត្រៀមជាស្រេចក្នុងករណីសង្ស័យដោយអនុវត្តវិធានសុខាភិបាល ជាធរមាន
* ពង្រឹងប្រព័ន្ធឆ្លើយតបបន្ទាន់ និងទូរស័ព្ទ Hotlines 115 និងបានធ្វើការសាកល្បងជាបន្តបន្ទាប់
* ក្នុងករណីមានការរកឃើញណាមួយ ដោយត្រៀមមន្ទីរពេទ្យជាតិ តេជោសន្តិភាព សម្រាប់ការដាក់នៅដាច់ដោយឡែក (Isolation) និងព្យាបាលអ្នកជំងឺបន្ទាន់
* ត្រៀមក្រុមពេទ្យ ដោយរៀបចំតាមផ្នែកនីមួយៗ សម្រាប់ការធ្វើតេស្តវិភាគសំណាក (Sample Testing Screening) និងព្យាបាល
* ត្រៀមឧបករណ៍ និងសម្ភារ មន្ទីរពិសោធន៍ ព្រមទាំងឱសថ និង PPE
* នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បន្តរៀបចំជាសារអប់រំផ្សព្វផ្សាយដល់ប្រជាពលរដ្ឋ និងអ្នកដំណើរអំពីវិធានការផ្សេងៗ។ ក្រុមការងារពាក់ព័ន្ធទាំងអស់ត្រូវបន្តធ្វើការតាមដានយ៉ាងយកចិត្តទុកដាក់ និងផ្ដល់ព័ត៌មានឱ្យបានទាន់ពេល វេលា។

សូមជម្រាបថា មេរោគ Hantavirus ជាប្រភេទមេរោគកាចសាហាវដែលភាគច្រើនចម្លងពីសត្វកកេរដូចជាកណ្ដុរ ប៉ុន្តែអាចចម្លងពីមនុស្សទៅមនុស្សបានក្នុងករណីកម្រ។ វាបង្កជា ជំងឺរោគសញ្ញាសួតហង់តាវីរុស (Hantavirus Pulmonary Syndrome - HPS) ដែលមានរោគសញ្ញាដំបូងដូចជំងឺផ្ដាសាយ មុននឹងវិវឌ្ឍយ៉ាងលឿនទៅជាបញ្ហាសួតធ្ងន់ធ្ងរ និងពិបាកដកដង្ហើម ហើយបច្ចុប្បន្ន មិនទាន់មានថ្នាំព្យាបាលជាក់លាក់ សម្រាប់ជំងឺនេះទេ គឺមានតែការថែទាំទ្រទ្រង់តាមរោគសញ្ញា។ អង្គការសុខភាពពិភពលោក (WHO) បានបញ្ជាក់ពីការរកឃើញ ករណីវិជ្ជមាន ៥នាក់ និងអ្នកស្លាប់ ៣នាក់ ដោយសារមេរោគ Hantavirus នៅលើកប៉ាល់ទេសចរណ៍ MV Hondius នាពេលថ្មីៗនេះ ដែលនាំឱ្យបណ្ដាប្រទេសជាច្រើនដាក់ចេញវិធានការតាមដានអ្នកដំណើរ។ ថ្វីដ្បិតតែមានការផ្ទុះឡើងនេះក៏ដោយ WHO បានវាយតម្លៃថា ហានិភ័យចំពោះសុខភាពសាធារណៈជារួមនៅមានកម្រិតទាប ប៉ុន្តែបានជូនដំណឹងដល់ប្រទេសចំនួន ១២ ដើម្បីតាមដានករណីសង្ស័យ និងបានណែនាំវិធានការបង្ការដូចជាការពាក់ម៉ាស ស្រោមដៃ និងលាងសម្អាតដៃនៅពេលសម្អាតកាកសំណល់សត្វកកេរ៕