(បាត់ដំបង)៖ លោក សុខ លូ អភិបាល នៃគណៈអភិបាលខេត្តបាត់ដំបង បានប្រាប់អង្គភាពសារព័ត៌មាន Fresh News ថា លោកគាំទ្រឱ្យមានចំណាត់ការយ៉ាងម៉ឺងម៉ាត់ លើមន្រ្តីណាដែលស្ថាប័នច្បាប់រកឃើញពាក់ព័ន្ធការលួចនាំចូលទុរេនពីថៃខុសច្បាប់ ខណៈដែលអាជ្ញាធរ និងសមត្ថកិច្ច បង្កើនការទប់ស្កាត់ការលួចនាំចូលទំនិញខុសច្បាប់ពីថៃ។

មហាជនមួយចំនួនបានផ្ទុះការចាប់អារម្មណ៍ និងរិះគន់លើបញ្ហាគ្រប់គ្រងច្រកព្រំដែននៅខេត្តបាត់ដំបង បន្ទាប់ពីមានស្ត្រីអាជីវករម្នាក់ឈ្មោះ អាឡែន លួចនាំយកទុរេនពីថៃមកកាន់កម្ពុជាបាន ទោះបីជារដ្ឋាភិបាល បានបិទទាំងស្រុងនូវច្រកព្រំដែនគោករវាងប្រទេសទាំងពីរក៏ដោយ។ ទុរេនទាំងនោះ ត្រូវបាននាំចូលតាមច្រកកាប៊ីន នាឃុំអូររំដួល ស្រុកសំឡូត ខេត្តបាត់ដំបង យកមកចែកចាយនៅកម្ពុជា ដោយបន្លំជាទុរេនខេត្តកំពង់ចាម។

ពាក់ព័ន្ធជាមួយនឹងមន្ត្រីដែលគប់គិតជាមួយអាជីវកររូបនេះ នៅមិនទាន់អាចវែកមុខបាននៅឡើយ។ តាមការបញ្ជាក់របស់លោក សុខ លូ បានឱ្យដឹងថា សាលាដំបូងខេត្តបាត់ដំបង បាននិងកំពុងស៊ើបអង្កេតដោយយកចិត្តទុកដាក់ ដើម្បីស្វែងរកអ្នកពាក់ព័ន្ធបន្ថែមទៀត។ ប្រសិនជារកឃើញមន្ត្រីដែលជាប់ពាក់ព័ន្ធនឹងករណីនេះ គឺត្រូវតែអនុវត្តតាមបទបញ្ញត្តិច្បាប់ដែលមានស្រាប់ ដោយមិនអាចរួចខ្លួននោះទេ។

អភិបាលខេត្តបាត់ដំបង បានសង្កត់ធ្ងន់ថា៖ «មនុស្សគ្រប់រូបត្រូវអនុវត្តច្បាប់ដោយស្មើភាព មិនមែនបានន័យថាប្រជាពលរដ្ឋមានបញ្ហាខុសគឺខុស ដល់មន្ត្រីរាជការមានបញ្ហារួចខ្លួន មិនត្រូវទេ អាហ្នឹងមិនមានយុត្តិធម៌សង្គមទេ។ ហើយកន្លែងនេះ ថ្នាក់ដឹកនាំយើងគ្រប់លំដាប់ថ្នាក់ លោកបានខិតខំហើយ ដើម្បីធ្វើយ៉ាងម៉េចឱ្យមានសមធម៌ក្នុងសង្គម»។

បន្ថែមពីនេះ ក្នុងការទប់ស្កាត់លំហូរទំនិញថៃដែលបានហាមឃាត់មកកាន់កម្ពុជា, លោក សុខ លូ បានគូសបញ្ជាក់ថា អាជ្ញាធរ និងកងកម្លាំងគ្រប់លំដាប់ ព្យាយាមទប់ស្កាត់ឱ្យខានតែបាននូវទំនិញថៃរត់ពន្ធខុសច្បាប់ ដែលអាចឆ្លងកាត់តាមច្រកតំបន់ និងច្រកទ្វារអន្តរជាតិ ក្នុងខេត្តបាត់ដំបង។ កន្លងទៅ អាជ្ញាធរខេត្ត ធ្លាប់បង្ក្រាបការនាំចូលទំនិញថៃរត់ពន្ធ និងតែងតែបញ្ជូនទៅកាន់តុលាការចាត់វិធានការតាមផ្លូវច្បាប់។

ជាថ្មីម្ដងទៀត លោកអភិបាលខេត្តបាត់ដំបង បញ្ជាក់ថា អាជ្ញាធរខេត្តនឹងបង្កើនការត្រួតពិនិត្យបន្ថែម គ្រប់ច្រកល្ហកទាំងអស់ ដើម្បីអនុវត្តយ៉ាងម៉ឹងម៉ាត់នូវបទបញ្ជារបស់រាជរដ្ឋាភិបាល ជាពិសេសលើមុខទំនិញដែលបានហាមឃាត់។ ប្រសិនជាបុគ្គលណាដែលល្មើសបទបញ្ជា នឹងត្រូវទទួលខុសត្រូវចំពោះមុខច្បាប់ដោយគ្មានករណីលើកលែង៕