(ភ្នំពេញ)៖ លោកបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានលើកឡើងថា អនាគតកម្ពុជា មិនមែនកំណត់ដោយបច្ចេកវិទ្យាតែមួយមុខទេ ប៉ុន្តែនឹងត្រូវកំណត់ដោយប្រជាជនកម្ពុជា ដែលចេះប្រើប្រាស់បច្ចេកវិទ្យា ប្រកបដោយបញ្ញាញាណ។

បន្ថែមពីនោះទៀត លោកបណ្ឌិត ជា វ៉ាន់ដេត បានបន្ដថា អនាគតកម្ពុជា មិនមែនកំណត់ដោយល្បឿននវានុវត្តន៍ទេ ប៉ុន្តែនឹងត្រូវមើលថា យើងអាចតម្រង់ទិស នវានុវត្តន៍ទាំងអស់ ឱ្យត្រូវនឹងគុណតម្លៃ និងចក្ខុវិស័យរួមរបស់យ៉ាងបានប៉ុណ្ណា។

លោកបណ្ឌិត ជា វ៉ាន់ដេត បានបន្ដទៀតថា អនាគតកម្ពុជា មិនមែនកំណត់ដោយអ្នកដែលអង្គុយចាំការរីកចម្រើនទេ ប៉ុន្តែនឹងត្រូវកំណត់ដោយ អ្នកដែលមានទឹកចិត្តមោះមុត ក្នុងការដឹកនាំឱ្យមានការរីកចម្រើនទាំងនោះ។

ការលើកឡើងបែបនេះ ធ្វើឡើងក្នុងឱកាសដែល លោកបណ្ឌិត ជា វ៉ាន់ដេត ជាស្ថាបនិករបស់សាកលវិទ្យាល័យអាមេរិកាំងភ្នំពេញ (AUPP) អញ្ជើញចូលរួមក្នុងពិធីប្រគល់សញ្ញាបត្រ ជូននិស្សិតបញ្ចប់ការសិក្សា ឆ្នាំ២០២៦ នារសៀលថ្ងៃទី០៩ ខែឧសភា ឆ្នាំ២០២៦។

ថ្លែងក្នុងពិធីនេះ លោកបណ្ឌិត ជា វ៉ាន់ដេត ក៏បានឲ្យដឹងផងដែរថា លើមាគ៌ាជាតិដែលបានដាក់ចេញ ការអប់រំដើរតួនាទីយ៉ាងសំខាន់។ សាកលវិទ្យាល័យ លែងជាស្ថាប័នសម្រាប់ តែការសិក្សាមួយមុខហើយ ប៉ុន្តែត្រូវក្លាយជាទីប្រជុំ នៃធនធានមនុស្ស នវានុវត្តន៍ និងសមត្ថភាពឌីជីថល។

លោកបណ្ឌិត ជា វ៉ាន់ដេត បានលើកឡើងថា សាកលវិទ្យាល័យមានតួនាទីបណ្តុះបញ្ញាញាណរបស់ជាតិក្នុងការ៖
* រចនាប្រព័ន្ធឌីជីថល
* យកបញ្ញាសិប្បនិម្មិតទៅប្រើប្រាស់តាមមុខងារផ្សេងៗ និង
* ដឹកនាំកាច់ចង្កូតស្ថាប័នក្នុងពិភពលោក ដែលមានការប្រែប្រួលយ៉ាងឆាប់រហ័ស។ ដូច្នេះស្ថាប័នដូចជាសាកលវិទ្យាល័យអាមេរិកាំងភ្នំពេញ មានសារៈសំខាន់មិនអាចខ្វះបាន ក្នុងការនាំយកស្តង់ដាអប់រំកម្រិតសាកល ដើម្បីបម្រើអាទិភាពជាតិ។

លោកបណ្ឌិត ជា វ៉ាន់ដេត ក៏បានផ្តាំផ្ញើនូវសារចំនួន៣ ទៅក្មួយៗនិស្សិត រួមមាន៖

ទីមួយ៖ សូមប្រុងប្រៀបដើម្បីបន្តអភិវឌ្ឍខ្លួនជាប់ជាប្រចាំ៖ ចំណេះដឹងដែលក្មួយៗទទួលបាននៅពេលនេះ ជាមូលដ្ឋានគ្រឹះដ៏រឹងមាំ។ តែបន្ថែមលើនេះ សមត្ថភាពរបស់ក្មួយៗក្នុងការរៀន សម្របខ្លួន និងវិវឌ្ឍខ្លួន នឹងកំណត់អនាគតរបស់ក្មួយៗ។

ទីពីរ៖ សូមក្មួយៗធ្វើជាអ្នកចូលរួមសកម្ម មិនមែនត្រឹមតែជាអ្នកចូលរួមអកម្មនោះទេ៖ លើផ្នែកបច្ចេកវិទ្យា ក្មួយៗ មិនត្រឹមតែក្លាយជាអ្នកប្រើបច្ចេកវិទ្យាទេ ប៉ុន្តែត្រូវជួយរិះរកដំណោះស្រាយ ដែលបង្កើតគុណតម្លៃពិតប្រាកដសម្រាប់សង្គម។

ទីបី៖ ក្នុងតួនាទីជាអ្នកដឹកនាំ សូមក្មួយៗប្រកាន់ខ្ជាប់នូវភាពសុចរិតទៀងត្រង់៖ ដោយសារនៅក្នុងពិភពឌីជីថល រូបិយបណ្ណដែលមានតម្លៃជាងគេ គឺទំនុកចិត្ត។

សូមជម្រាបថា សាកលវិទ្យាល័យអាមេរិកាំងភ្នំពេញ (AUPP) បានប្រារព្ធពិធីប្រគល់សញ្ញាបត្រ ជាលើកទី១០ ក្រោមប្រធានបទ «អបអរសាទរ១០ឆ្នាំ នៃការបណ្តុះបណ្តាល អ្នកកសាងជាតិ និងអ្នកដឹកនាំសកល»។

ក្នុងឱកាសអបអរសាទរ និស្សិតជំនាន់ទី១០នេះ សាកលវិទ្យាល័យ ក៏បានបង្ហាញសមិទ្ធផលគួរឱ្យកត់សម្គាល់ជាច្រើន ដែលឆ្លុះបញ្ចាំងពីការប្តេជ្ញាចិត្ត ក្នុងការដឹកនាំគំនិតថ្មីៗ នវានុវត្តន៍ ការអភិវឌ្ឍ និងការចូលរួមជាសកល។

ជាមួយគ្នានេះ AUPP ក៏បានដាក់ឱ្យប្រើប្រាស់កម្មវិធី AUPP Alumni App ដែលត្រូវបានអភិវឌ្ឍដោយនិស្សិតរបស់ AUPP ផ្ទាល់ ដើម្បីពង្រឹងទំនាក់ទំនងអតីតនិស្សិត បណ្តាញវិជ្ជាជីវៈ ការណែនាំ និងការកសាងសហគមន៍រយៈពេលវែងផងដែរ។

AUPP គឺជាសាកលវិទ្យាល័យតែមួយគត់ ក្នុងប្រទេសកម្ពុជា ដែលផ្តល់ជូននូវកម្មវិធីសិក្សាស្តង់ដារបែបអាមេរិក និងកម្មវិធីសញ្ញាបត្រពីរ ដែលទទួលស្គាល់ដោយសហរដ្ឋអាមេរិក។ សិស្សនិស្សិត មានឱកាសជ្រើសរើសពីមុខជំនាញ១៣មុខផ្សេងៗគ្នា នៅក្នុងមហាវិទ្យាល័យធុរកិច្ច បច្ចេកវិទ្យាឌីជីថល នីតិសាស្ត្រ និងវិទ្យាសាស្ត្រសង្គម៕