(ភ្នំពេញ)៖ កិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការ សមាគមអតីតយុទ្ធជន និងនិវត្តជនកម្ពុជា រួមជាមួយថ្នាក់ដឹកនាំសមាគម នៅព្រឹកថ្ងៃទី៩ ខែឧសភា ឆ្នាំ២០២៦ បានចូលរួមពិធីប្រគល់-ទទួលថវិកា៥០០,០០០ដុល្លារ ពីលោកអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាល ក្រុមហ៊ុន ជីប ម៉ុង គ្រុប សម្រាប់សាងសង់ផ្ទះចំនួន១០០ខ្នង ជូនអតីតយុទ្ធជន និងនិវត្តជន ជាអំណោយដ៏ថ្លៃថ្លារបស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងជាអនុប្រធានទី១ សមាគមអតីតយុទ្ធជន និងនិវត្តជនកម្ពុជា។

លោក គន់ គីម បានថ្លែងថា តាងនាមសម្តេចតេជោ ហ៊ុន សែន ប្រធានព្រឹទ្ធសភា និងជាប្រធាន សមាគមអតីតយុទ្ធជន និងនិវត្តជនកម្ពុជា សូមថ្លែងអំណរគុណយ៉ាងជ្រាលជ្រៅ ជូនចំពោះថ្នាក់ដឹកនាំ ក្រុមហ៊ុន ជីប ម៉ុង ដែលតែងតែបរិច្ចាគថវិការួមចំណែកជាមួយរាជរដ្ឋាភិបាល ដូចជាក្នុងគ្រាកើតមានគ្រោះមហន្តរាយ និងជួយឧបត្ថម្ភដល់ជនភៀសសឹកជាដើម។

លោក គន់ គីម បន្ដទៀតថា ថវិកាឧបត្ថម្ភរបស់ក្រុមហ៊ុន ជីប ម៉ុង គឺជាសកម្មភាពមនុស្សធម៌ដ៏មានអត្ថន័យ ចំពោះការធ្វើពលិកម្ម និងតស៊ូបម្រើជាតិ មាតុភូមិ និងប្រជាជន ពីសំណាក់បងប្អូនអតីតយុទ្ធជន និងនិវត្តជន។

លោកអ្នកឧកញ៉ា លាង ឃុន បានថ្លែងថា ការឧបត្ថម្ភថវិកា ៥០០,០០០ដុល្លារ សម្រាប់សាងសង់ផ្ទះចំនួន ១០០ខ្នង ដើម្បីឆ្លើយតបដល់ការពលី បុព្វហេតុជូនជាតិមាតុភូមិ និងប្រជាជនរបស់អតីតយុទ្ធជនគ្រប់រូប។

លោកអ្នកឧកញ៉ា លាង ឃុន ថ្លែងបន្តថា ជាក់ស្តែង កាលពីខែកុម្ភៈ ឆ្នាំ២០២៥ ក្រុមហ៊ុន ជីប ម៉ុង បានឧបត្ថម្ភថវិកាសាងសង់ផ្ទះចំនួន ១០០ខ្នង ជូនអតីតយុទ្ធជន ស្ថិតក្នុងខេត្តកំពង់ធំ ដើម្បីបង្ហាញពីការគោរព ដឹងគុណដល់ការពលីរបស់បងប្អូនអតីតយុទ្ធជននៅទូទាំងប្រទេស៕