(សៀមរាប)៖ ព្រះគ្រូវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក ក្រុងសៀមរាប ខេត្តសៀមរាប និងជាទីប្រឹក្សាពុទ្ធិកសមាគមកម្ពុជរដ្ឋ នៅរសៀលថ្ងៃទី០៩ ខែឧសភា ឆ្នាំ២០២៦ បាននាំយកសម្ភារៈប្រើប្រាស់ប្រចាំថ្ងៃ ដូចជា៖ អង្រឹង សូឡា កៅស៊ូតង់ វិទ្យុកទាក់ទង និងសម្ភារៈប្រើប្រាស់ជាច្រើនទៀតដល់វីរកងទ័ពជួរមុខ ក្នុងខេត្តឧត្តរមានជ័យ ព្រមទាំងជូនថវិកាចំនួន៥០ម៉ឺនរៀល សម្រាប់ធ្វើដំបូលរោងស្នាក់នៅផងដែរ។

ព្រះគ្រូវិចិត្រវង្សា ហែម គឹមសាន មានសង្ឃដីកាថា ក្នុងស្មារតីខ្មែររួបរួមសាមគ្គីគ្នា លើកទឹកចិត្តដល់បងប្អូនវីរកងទ័ពដែលកំពុងឈរជើងតាមបន្ទាត់ព្រំដែនការពារបូរណភាពទឹកដីពីការឈ្លានពានពីប្រទេសថៃ។ ដូច្នេះហើយទើបព្រះអង្គរួមជាមួយជាមួយញាតិញោម បាននាំយកសម្ភារប្រើប្រាស់ប្រចាំថ្ងៃជូនដល់វ៏រកងទ័ព ដែលនៅព្រំដែនកម្ពុជា-ថៃ។ ហើយការផ្តល់ជូននូវសម្ភារៈទាំងនេះ មិនមែនថា រាជរដ្ឋាភិបាលខ្វះខាតនោះទេ តែជាការចូលរួមជួយឧបត្ថម្ភបន្ថែម។

ព្រះអង្គបានបន្តថា យើងពិតជាមានមោទកភាពចំពោះវីរកងទ័ព ពោរពេញដោយឆន្ទៈ មនសិការ ស្មារតីក្លាហាន និងសេចក្តីស្មោះត្រង់ចំពោះជាតិ ដែលពួកគាត់បានសុខចិត្តយកទ្រូងពាំងគ្រាប់រំសេវ និងអាវុធគ្រប់ប្រភេទ ប្តូរយកសុខសន្តិភាពជូនប្រជាជនកម្ពុជាទាំងមូល ដែលយើងអាចសម្រានលក់ ហូបឆ្ងាញ់ ប្រកបដោយស្នាមញញឹម និងភាពកក់ក្តៅជាមួយក្រុមគ្រួសារ។

ព្រះគ្រូវិចិត្រវង្សា ក៏បានសម្តែងការគោរពដឹងគុណជានិច្ចចំពោះវីរកងទ័ពទាំងអស់ ហើយតាំងចិត្តចងចាំជានិច្ចនូវគំរូវីរភាពមិនអាចកាត់ថ្លៃបានជារៀងរហូត៕