(ព្រៃវែង)៖ គណបក្សប្រជាជនកម្ពុជាឃុំឫស្សីស្រុក ស្រុកពាមជរ ខេត្តព្រៃវែង បានបញ្ចូល​សមាជិកបក្សថ្មីចំនួន៤៣រូប សុទ្ធសឹងជាសមាជិកមកពីគណបក្សនយោបាយដទៃ បន្ទាប់​​ពីពួកគេបានមើលឃើញថា គណបក្សប្រជាជនកម្ពុជា ជាគណបក្សបាន​បម្រើ​ប្រយោជន៍ដ៏ពិតប្រាកដជូនជាតិ និងប្រជាជន។

ពិធីប្រកាសបញ្ចូលសមាជិកថ្មីនេះ បានធ្វើឡើងនៅថ្ងៃសៅរ៍ ទី៩ ខែឧសភា ឆ្នាំ២០២៦។ លោក នួម សុខុន តំណាងឱ្យលោកបណ្ឌិត ស៊ូនី វង្សវិសិដ្ឋ ប្រធានក្រុមការងារ​គណបក្ស​ជួយមូលដ្ឋានឃុំឫស្សីស្រុក បានថ្លែងបង្ហាញអារម្មណ៍សោមនស្សរីករាយយ៉ាងក្រៃលែង បានចូលរួមជាអធិបតីក្នុងពិធីប្រកាសបញ្ចូលសមាជិកថ្មីចំនួន ៤៣រូប មកពីនិន្នាការ​នយោបាយផ្សេងៗ។

លោក នួម សុខុន បានលើកឡើងថា ការសម្រេចចិត្តរបស់សមាជិកបក្សទើបចូលថ្មីនេះ​ថា បង្ហាញពីជំនឿចិត្តលើការដឹកនាំរបស់គណបក្ស ដែលតែងតែនៅក្បែរប្រជាជនគ្រប់​កាលៈ​ទេសៈ។

លោក​ នួម សុខុន បានបញ្ជាក់ដូច្នេះ «ចាប់ពីពេលនេះតទៅ យើងគឺជាគ្រួសារតែមួយ ដែលត្រូវរួមគ្នារក្សាសន្តិភាព និងកសាង​អភិវឌ្ឍន៍ភូមិឃុំយើងឱ្យកាន់តែរីកចម្រើន។ រួបរួម​កម្លាំងដើម្បីជាតិមាតុភូមិ។ សូម​ស្វាគមន៍​យ៉ាងកក់ក្តៅចំពោះបងប្អូនសមាជិកថ្មីទាំង​៤៣រូប ក្នុងឃុំឫស្សីស្រុក។ ការចូលរួមរបស់បងប្អូន គឺជាកម្លាំងសាមគ្គីភាពដ៏រឹងមាំ ដើម្បី​បន្តថែរក្សាសុខសន្តិភាព និងសមិទ្ធផលនានាក្រោមការដឹកនាំដ៏ឈ្លាសវៃរបស់គណបក្ស​ប្រជាជនកម្ពុជា។ យើងរួមកម្លាំងគ្នា ដើម្បីអនាគតដ៏ភ្លឺស្វាងនៃកូនចៅយើង»។

លោក នួម សុខុន បានបន្តថា «រស់នៅជាមួយប្រជាជន ដោះស្រាយបញ្ហាជូនប្រជាជន។ នេះ គឺជាគោលការណ៍គ្រឹះរបស់គណបក្សប្រជាជនកម្ពុជា។ ថ្ងៃនេះ យើងមិនត្រឹមតែ​ស្វាគមន៍​សមាជិកថ្មី ៤៣ រូបប៉ុណ្ណោះទេ ប៉ុន្តែយើងក៏បានប្តេជ្ញាបន្តយកចិត្តទុក​ដាក់លើ​សុខុមាលភាពបងប្អូនដែលរងគ្រោះដោយធម្មជាតិ និងពង្រឹងប្រព័ន្ធគាំពារសង្គមក្នុងមូល​ដ្ឋាន​ឱ្យកាន់​តែប្រសើរ»។

លោក នួម សុខុន បានគូសរំលេចដែរថា ក្រោមការដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចមហាបវរធិបតី ហ៊ុន ម៉ាណែត នាយក​រដ្ឋមន្ត្រី ប្រទេសជាតិមានសន្តិភាព និងការអភិវឌ្ឍ។ សន្តិភាពនេះហើយដែល​អនុញ្ញាត​ឱ្យកម្ពុជាមានផ្លូវ ស្ពាន សាលារៀន និងមន្ទីរពេទ្យ។ ជាងនេះទៅទៀត ទោះបីជាមាន​គ្រោះ​ធម្មជាតិ ឬការលំបាកយ៉ាងណា ក៏រាជរដ្ឋាភិបាលមិនបោះបង់បងប្អូនចោលឡើយ តាមរយៈយន្តការគាំពារសង្គម និងការស្តារជីវភាពជូនប្រជាពលរដ្ឋ។

ក្នុងឱកាសនោះ លោក នួម សុខុន ក៏បានណែនាំដល់សមាជិកបក្សប្រជាជនកម្ពុជាទាំងថ្មី និងចាស់នៅក្នុងឃុំឫស្សីស្រុក រក្សាសាមគ្គីភាពផ្ទៃក្នុង និងមានជំនឿចិត្តមុតមាំលើកម្មវិធីនយោបាយបក្ស។ ធ្វើជាពល​រដ្ឋគំរូ ជួយទុក្ខធុរៈគ្នាទៅវិញទៅមកក្នុងសហគមន៍៕