ទីភ្នាក់ងារកយកា បណ្តុះបណ្តាលជំនាញឯកទេស ស្តីពីសេដ្ឋកិច្ចវិលជុំ និងការគ្រប់គ្រងឥន្ធនៈដល់មន្ត្រីកម្ពុជា
11-05-2026 10:35
(ភ្នំពេញ)៖ ការិយាល័យទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំប្រទេសកម្ពុជា បានរៀបចំកម្មវិធីតម្រង់ទិសមុនការចេញដំណើរកាលពីថ្ងៃទី០៨ ខែឧសភា ឆ្នាំ២០២៦ ជូនដល់មន្ត្រីរាជការមកពីក្រសួងបរិស្ថាន និងក្រសួងរ៉ែ និងថាមពល។
មន្ត្រីទាំងនោះនឹងត្រូវចូលរួមក្នុងកម្មវិធីកសាងសមត្ថភាពជំនាញឯកទេស នៅសាធារណរដ្ឋកូរ៉េ ដែលត្រូវបានរៀបចំឡើងដើម្បីដោះស្រាយបញ្ហាប្រឈមសំខាន់ៗ ផ្នែកហេដ្ឋារចនាសម្ព័ន្ធ និងបរិស្ថាននៅក្នុងប្រទេសកម្ពុជា។
កម្មវិធីតម្រង់ទិសនេះ គឺជាការត្រៀមលក្ខណៈចុងក្រោយសម្រាប់វគ្គបណ្តុះបណ្តាលពីរផ្សេងគ្នា ស្ថិតក្រោមកម្មវិធីបណ្ថុះបណ្ថាលរបស់ KOICA ដែលមានគោលបំណងចែករំលែកបទពិសោធន៍ និងជំនាញបច្ចេកទេសរបស់ប្រទេសកូរ៉េ ជូនដល់អ្នករៀបចំគោលនយោបាយកម្ពុជា រួមមាន៖
១៖ មន្ត្រីចំនួន ១៥រូប មកពីក្រសួងបរិស្ថាន នឹងចូលរួមក្នុងវគ្គបណ្តុះបណ្តាលក្រោមប្រធានបទ «ការកសាងសមត្ថភាពលើការអនុវត្តសេដ្ឋកិច្ចវិលជុំ តាមរយៈការគ្រប់គ្រងសំណល់ប្រកបដោយចីរភាព»។ កម្មវិធីនេះ ផ្តោតសំខាន់លើការផ្លាស់ប្តូរពីការគ្រប់គ្រងសំណល់តាមបែបប្រពៃណី ទៅជាប្រព័ន្ធវិលជុំ ដោយសង្កត់ធ្ងន់លើការកែច្នៃឡើងវិញ បច្ចេកវិទ្យាទាញយកថាមពលពីសំណល់ និងអនាម័យទីប្រជុំជន។
២៖ មន្ត្រីចំនួន ៣រូបផ្សេងទៀត មកពីក្រសួងរ៉ែ និងថាមពល នឹងចូលរួមក្នុងវគ្គបណ្តុះបណ្តាលដែលផ្តោតលើ «ការកសាងសមត្ថភាពសម្រាប់ការគ្រប់គ្រងគុណភាព និងការបែងចែកឥន្ធនៈរថយន្ត»។ វគ្គបណ្តុះបណ្តាលនេះ ផ្តល់នូវការបណ្តុះបណ្តាលបច្ចេកទេសលើស្តង់ដារឥន្ធនៈ ការធ្វើតេស្តក្នុងមន្ទីរពិសោធន៍ និងការកំណត់បទប្បញ្ញត្តិលើបណ្តាញចែកចាយ ដើម្បីធានានូវសន្តិសុខថាមពល និងកាត់បន្ថយការភាយឧស្ម័នពីយានយន្ត។
កម្មវិធីបណ្តុះបណ្តាលទាំងនេះ ត្រូវបានរៀបចំឡើងស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។ តាមរយៈការវិនិយោគលើវិស័យទាំងនេះ KOICA និងដៃគូពាក់ព័ន្ធ មានគោលបំណងបង្កើតឱ្យមានអត្ថប្រយោជន៍រយៈពេលវែងសម្រាប់សង្គមកម្ពុជា រួមមាន សុខភាពបរិស្ថាន ប្រសិទ្ធភាពសេដ្ឋកិច្ច ការការពារអ្នកប្រើប្រាស់ និងសកម្មភាពឆ្លើយតបនឹងការប្រែប្រួលអាកាសធាតុ។
ក្នុងមតិស្វាគមន៍បើកកម្មវិធី លោកស្រី LEE Sejin អនុប្រធានតំណាងការិយាល័យ KOICA ប្រចាំប្រទេសកម្ពុជា បានអបអរសាទរដល់សិក្ខាកាមទាំងអស់ និងបានយកចិត្តទុកដាក់លើសារៈសំខាន់នៃការកសាងសមត្ថភាព ក្នុងការសម្រេចបាននូវគោលដៅអភិវឌ្ឍន៍របស់ប្រទេសកម្ពុជា។ លោកស្រីក៏បានបញ្ជាក់ជាថ្មីនូវការប្តេជ្ញាចិត្តជាបន្តបន្ទាប់របស់ KOICA ក្នុងការអភិវឌ្ឍធនធានមនុស្ស។
ក្នុងអំឡុងពេលនៃកម្មវិធីតម្រង់ទិសនេះ សិក្ខាកាមទទួលបាននូវទិដ្ឋភាពទូទៅនៃសកម្មភាពការងាររបស់ KOICA នៅក្នុងប្រទេសកម្ពុជា សេចក្តីណែនាំអំពីកម្មវិធី និងព័ត៌មានជាក់ស្តែងផ្សេងៗ ដើម្បីសម្រួលដល់ការស្នាក់នៅក្នុងប្រទេសកូរ៉េ។
តំណាងមកពីក្រសួងទាំងពីរ បានចែករំលែកអំពីរបៀបដែលវគ្គបណ្តុះបណ្តាលនេះ នឹងចូលរួមចំណែកដល់ការងាររបស់ពួកគេ។ បន្ថែមពីនេះ ពួកគេក៏បានពិភាក្សាអំពីស្ថានភាពបច្ចុប្បន្ន និងផែនការអភិវឌ្ឍន៍នាពេលអនាគតរបស់ក្រសួងសាមីនីមួយៗផងដែរ។
សិក្ខាកាមទាំងអស់បានសម្តែងនូវការអរគុណយ៉ាងជ្រាលជ្រៅចំពោះ KOICA និងរដ្ឋាភិបាលកូរ៉េ សម្រាប់ការគាំទ្រដ៏សប្បុរសនេះ និងបានចូលរួមយ៉ាងសកម្មនៅក្នុងវគ្គតម្រង់ទិសនេះ៕
