(បន្ទាយមានជ័យ)៖ បញ្ជាការដ្ឋានកងរាជអាវុធហត្ថខេត្តបន្ទាយមានជ័យ នៅព្រឹកថ្ងៃចន្ទ ទី១១​ ខែឧសភា ឆ្នាំ២០២៦ បានរៀបចំត្រួតពិនិត្យចំនួនទ័ព-កូន និង នីតិវិធីដាក់យោធិន នៃកងរាជអាវុធហត្ថឱ្យចូលសោធននិវត្តន៍ ដល់នាយទាហាន នាយទាហានរង និងពលទាហាន នៃកងរាជអាវុធហត្ថខេត្តបន្ទាយមានជ័យ​។

ពិធីនេះបានធ្វើឡើងក្រោមអធិបតីភាពលោកឧត្តមសេនីយ៍ត្រី ងួន វ៉ា ស្នងការរង ស្នងការដ្ឋានកសាងកម្លាំង កងរាជអាវុធហត្ថលើផ្ទៃប្រទេស ប្រធានក្រុមការងារទី៤​ ចុះត្រួតពិនិត្យចំនួនទ័ព-កូន និងពិនិត្យស្ថានភាពយោធិន នៃកងរាជអាវុធហត្ថដល់អាយុចូលសោធននិវត្តន៍។

កិច្ចប្រជុំ​នេះក៏មានការអញ្ជើញចូលរួមពីសំណាក់លោកឧត្តមសេនីយ៍ត្រី​ បោន​ ប៊ិន​ មេ​បញ្ជាការ​កងរាជអាវុធហត្ថខេត្ត លោកមេបញ្ជាការរង​ នាយសេនាធិការ-នាយសេនាធិការរង​ មេបញ្ជាការ​មូលដ្ឋានកងរាជអាវុធហត្ថទាំង ៩ក្រុង-ស្រុក​ ដែលប្រារព្ធធ្វេីឡេីងនៅសាលប្រជុំ ធំ បញ្ជាការដ្ឋានកងរាជអាវុធហត្ថខេត្ត។

លោកឧត្តមសេនីយ៍ត្រី​ បោន​ ប៊ិន​ បានរាយការណ៍សង្ខេបពាក់ព័ន្ធទៅ​នឹងវឌ្ឍនភាពការងារបញ្ជាការដ្ឋានកងរាជអាវុធហត្ថបន្ទាយមានជ័យ​ ដែលបានចូលរួមយ៉ាងសកម្មក្នុងការអនុវត្តគោលនយោបាយ​ «ភូមិ​ ឃុំ-សង្កាត់​ មានសុវត្ថិភាព» រួមនឹងកិច្ចការសង្គមជាច្រើន។

ជាមួយគ្នានេះ កងរាជអាវុធហត្ថ​ខេត្ត​ ក៏បានចូលរួមក្នុងកិច្ចការពារបូរណភាពទឹកដីពីការឈ្លានពានពីសត្រូវប្រទេសជិតខាង​ក្នុងភូមិសាស្ត្របន្ទាត់ព្រំដែនខេត្តបន្ទាយមានជ័យ​ ដែលបណ្ដាលឱ្យមានរបួស ពិការ​ និងពលីក្នុងសមរភូមិផងដែរ។

លោកឧត្តមសេនីយ៍ត្រី ងួន វ៉ា បានផ្ដាំផ្ញើរបស់នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស នូវការដឹងគុណចំពោះកងរាជអាវុធហត្ថដែលហ៊ាន លះបង់គ្រប់បែបយ៉ាងក្នុងកិច្ចការពារបូរណភាពទឹកដីពីការឈ្លានពានរបស់សត្រូវប្រទេសជិតខាងកាលពីពេលកន្លងមក ដែលនេះសបញ្ជាក់ឱ្យឃើញយ៉ាងច្បាស់ថា​ កងរាជអាវុធហត្ថ​មិនត្រឹមតែចូលរួមការពារសន្តិសុខជូន ប្រជាពលរដ្ឋនៅមូលដ្ឋានប៉ុណ្ណោះទេ ក៏បានលះបង់យ៉ាងធំធេងតស៊ូប្រយុទ្ធការពារជាតិ ការពារប្រជាជន។

លោកឧត្តមសេនីយ៍ត្រី ងួន វ៉ា បានបញ្ជាក់ថា​ យោងតាមសេចក្តីណែនាំរបស់នាយឧត្តមសេនីយ៍ សៅ សុខា​ ចាត់ឱ្យក្រុមការងារកងរាជអាវុធហត្ថលើផ្ទៃប្រទេសចុះធ្វើធ្វេីការត្រួតពិនិត្យចំនួនទ័ព-កូន ដើម្បីធ្វេីបច្ចុប្បន្នភាព​ ដល់យោធិនដែលដល់អាយុត្រូវចូលនិវត្តន៍​៕