(កំពង់ស្ពឺ)៖ រស់ក្នុងស្ថានភាពជាជនពិការ ដោយសារតែគ្រោះថ្នាក់ចរាចរណ៍, លោក សាម សុគន្ធា ជាអតីតកីឡាករប្រដាល់គុនខ្មែរដ៏ល្បីល្បាញមួយរូបរបស់កម្ពុជា និងត្រូវបានគេស្គាល់រហ័សនាមថាជា «រាជសីហ៍កម្ពុជា» ឬ «ស្តេចប្រដាល់»។

លោកក៏មានប្រវត្តិ នៃការប្រកួតដ៏ខ្លាំងក្លាទាំងនៅក្នុងប្រទេស និងក្រៅប្រទេស ដោយបង្ហាញនូវក្បាច់ប្រយុទ្ធដ៏ស្វិតស្វាញ និងការវាយបកដ៏មានប្រសិទ្ធភាព និងជាកីឡាករដែលមហាជនធ្លាប់បានគាំទ្រយ៉ាងខ្លាំ។

និយាយទាំងក្តុកក្តួលពេលជួបសម្ភាសន៍ជាមួយលោក ម៉ុន សំអាត ភ្នាក់ងារព័ត៌មាន Fresh News ប្រចាំខេត្តកំពង់ស្ពឺ អតីតជើងឯកកីឡាករលោក សាម សុគន្ធា បានប្រាប់ថា លោកមានដើមកំណើតកើតនៅខេត្តកំពង់ស្ពឺ ហើយបានរួមចំណែកយ៉ាងសំខាន់ក្នុងការលើកកម្ពស់វិស័យកីឡាគុនខ្មែរតាំងពីឆ្នាំ១៩៩០-៩១ ដែលមានការរីកចម្រើន និងទទួលបានការគាំទ្រពីមហាជនកន្លងមកជាច្រើនឆ្នាំ។

លោកបានរៀបរាប់ទៀតថា តែមកដល់បច្ចុប្បន្នអ្វីៗបានប្រែប្រួលស្ទើទាំងស្រុងនាពេលនេះ នោះគឺគាត់បានធ្លាក់ពិការជើងទាំង២ ដោយគ្រោះថ្នាក់ចរាចរណ៍ រស់ក្នុងជីវភាពពោះម៉ាយ ហើយរស់នៅជាមួយម្តាយចាស់ជរាទីទាល់ក្រ លំបាកយ៉ាងខ្លាំង និងកំពុងស្នាក់នៅផ្ទះម្តាយនៅភូមិអង្គស្នួល ឃុំពើក ស្រុកអង្គស្នួល ខេត្តកណ្ដាល។

ក្នុងទឹកមុខដ៏មហាក្រៀមកំ, លោក សាម សុគន្ធា បានថ្លែងទាំងក្តីអស់សង្ឃឹមថា បើទោះលោកធ្លាប់ជាកីឡាទទួលបានមេដាយមាស មេដាយប្រាក់ និងមេដាយសំរិទ្ធ របស់ប្រទេសមែនតែក្រុមគ្រួសារពិតជួបការខ្វះខាតយ៉ាងខ្លាំង រួមទាំងខ្លួនលោកបានពិកាជើងទៀត ដូច្នេះក្តីសង្ឃឹមពិតជាមានតិចតួចបំផុតក្នុងជីវត តែលោកបានបង្ហាញទឹកចិត្ត លោកនៅតែប្រឹងប្រែងតស៊ូក្តីលំបាកគង់មានថ្ងៃណាមួយថ្នាក់ដឹកនាំ ឬសប្បុរសជន និងមានចិត្តអាណិតជួយដល់ ក្រុមគ្រួសារលោកមិនខាន ៕