មន្ត្រីជាន់ខ្ពស់ក្រសួងអភិវឌ្ឍជនបទ ចុះត្រួតពិនិត្យ វាយតម្លៃការងារជួសជុលស្តារឡើងវិញផ្លូវក្រាលដីក្រួស ១ខ្សែ និងសំណង់សិល្បការ្យ នៅស្រុកជាំក្សាន្ត ខេត្តព្រះវិហារ
11-05-2026 19:36
(ព្រះវិហារ)៖ លោកស្រី ឯក គន្ធវារី អនុរដ្ឋលេខាធិការ តំណាងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី១១ ខែឧសភា ឆ្នាំ២០២៦នេះ បានដឹកក្រុមការងារចុះត្រួតពិនិត្យ និងវាយតម្លៃលើការងារជួសជុលស្តារឡើងវិញផ្លូវក្រាលដីល្បាយក្រួសចំនួន ១ខ្សែ ប្រវែងជិត២០គីឡូម៉ែត្រ ទទឹង ៨ម៉ែត្រ និងសំណង់សិល្បការ្យផ្សេងៗ ដែលតត្ជាបពីឃុំកន្ទួត ទៅឃុំស្រអែម នៅស្រុកជាំក្សាន្ត ខេត្តព្រះវិហារ។
នាឱកាសនោះលោកស្រី ឯក គន្ធវារី តាមរយៈផ្លូវខាងលេីនេះ ដែលសម្តេចបវរធិបតី ហ៊ុន ម៉ាណែត នាយករដ្ឋមន្រ្តី បានផ្តល់ជូនអ្នកស្រុកជាំក្សាន្តនាពេលនេះ ដេីម្បីជួយសម្រួលដល់ការធ្វើដំណើរ ការដឹកជញ្ជូនកសិផល និងការទទួលសេវាសាធារណៈនានា និងការតភ្ជាប់រវាងភូមិ-ឃុំផ្សេងៗទៀត តាមរយៈផ្លូវនេះក៏ជួយសម្រួលការធ្វើដំណើរ ការរកស៊ីទទួលទានផ្សេងៗ និងបម្រើដល់វិស័យទេចរណ៍ជាដើម។
លោកស្រីអនុរដ្ឋលេខាធិការ ក៏បានថ្លែងនូវការសាទរចំពោះសមិទ្ធផលថ្មីនេះដែលកើតចេញពីរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ ដែលជាក់ស្តែងផ្លូវ ១ខ្សែនេះ ស្ថាបនាឡើងក្រោមគោលនយោបាយ និងយុទ្ធសាស្រ្តអភិវឌ្ឍន៍ប្រទេសជាតិ ដើម្បីជំរុញការអភិវឌ្ឍសេដ្ឋកិច្ច និងសង្គមកម្ពុជា ក្នុងគោលដៅសម្រេចឱ្យបានចក្ខុវិស័យ កម្ពុជាក្លាយជាប្រទេសមានប្រាក់ចំណូលខ្ពស់ក្នុងឆ្នាំ២០៥០។
លោកស្រី ឯក គន្ធវារី បានបញ្ជាក់ថា ក្រសួងអភិវឌ្ឍន៍ជនបទដែលជាសេនាធិការរបស់រាជរដ្ឋាភិបាល បានចាប់ផ្ដើមស្ថាបនាផ្លូវក្រាលបេតុង ផ្លូវក្រាលកៅស៊ូ ផ្លូវល្បាយគ្រួស ព្រមទាំងកសាងប្រព័ន្ធហេដ្ឋារចនាសម្ព័ន្ធជាច្រើននៅតាមបណ្តាខេត្ត និងស្រុក ដែលតភ្ជាប់ពីផ្លូវជាតិ ទៅផ្លូវខេត្ត ដើម្បីជួយលើកកម្ពស់កម្រិតជីវភាពរបស់ប្រជាពលរដ្ឋនៅមូលដ្ឋាន និងជាចំណែកក្នុងការជំរុញកំណើនសេដ្ឋកិច្ចជាតិ។
ជាក់ស្តែងពីមួយអាណត្តិ ទៅមួយអាណត្តិ ក្រសួងអភិវឌ្ឍន៍ជនបទ បានប្រែក្លាយផ្លូវក្រាលក្រួសល្បាយដី ទៅជាផ្លូវក្រាលកៅស៊ូពីរជាន់ (DBST) និងផ្លូវក្រាលបេតុងបានជាច្រើនខ្សែ ក្នុងចំណោមផ្លូវជនបទដែលមានប្រមាណជាង ៥ ម៉ឺនគីឡូម៉ែត្រ នៅទូទាំងប្រទេស កិច្ចខិតខំកសាងនូវហេដ្ឋារចនាសម្ព័ន្ធនេះ បាននឹងកំពុងដើរស្របទៅនឹងគន្លឹះអាទិភាពនៃយុទ្ធសស្ត្របញ្ចកោណរបស់រាជរដ្ឋាភិបាល អាណត្តិទី៧ ដើម្បីជួយលើកកម្ពស់កម្រិតជីវភាពប្រជាពលរដ្ឋ ជាពិសេសនៅទីជនបទដែលបានកំណត់អាទិភាពគន្លឹះ៥គឺ មនុស្ស ផ្លូវ ទឹក ភ្លើង និង បច្ចេកវិទ្យាឌីជីថល។
លោកស្រី ក៏បានថ្លែងកោតសរសើរដល់កងវិស្វកម្មអង្គរក្ស សម្តេចតេជោ ហ៊ុន សែន នាយកដ្ឋានវិស្វកម្ម ក្រសួង ការពារជាតិ លើការងារជួសជុលផ្លូវក្រាលដីល្បាយក្រួសចំនួន ១ខ្សែ ប្រវែងជិត ២០គីឡូម៉ែត្រ នៅជិតព្រំដែនក្នុងស្រុកជាំក្សាន្ត ខេត្តព្រះវិហារនេះ ដោយអនុវត្តបានល្អប្រសើរ ព្រោះផ្លូវមួយខ្សែនេះមានសារៈសំខាន់សម្រួលដល់ការធ្វើដំណើររបស់ប្រជាជន និងបម្រើដល់ទេសចរណ៍ជាដើម៕
