(ស្វាយរៀង)៖ អ្នកសារព័ត៌មានអន្តរជាតិមកពីទូរទស្សន៍ CNA និងទូរទស្សន៍ Spotlight និងអ្នកចូលរួមសំខាន់ៗ ចំនួន១៧នាក់ នៅព្រឹកថ្ងៃទី១១ ខែឧសភា ឆ្នាំ២០២៦នេះ បានចុះទៅដល់ទីតាំងឆបោកតាមបច្ចេកវិទ្យា Online Scams ដែលសមត្ថកិច្ចកម្ពុជា បានធ្វើការបង្រ្កាប និងបន្តនិតិវិធីតាមច្បាប់ នៅក្រុងបាវិត ខេត្តស្វាយរៀង។

ក្នុងឱកាសនោះ ក្រុមអ្នកសារព័ត៌មានបានថតវីដេអូ និងផ្តិតយករូបភាពតាមជំនាញវិជ្ជាជីវៈ ដោយមានការស្វាគមន៍ និងបញ្ជាក់បង្ហាញដោយក្តីរាក់ទាក់ពី លោក ប៉េង ពោធិ៍សា អភិបាលខេត្តស្វាយរៀង ព្រះរាជអាជ្ញាអមសាលាដំបូងខេត្ត ស្នងការនគរបាល និងអាជ្ញាធរពាក់ព័ន្ធ បង្ហាញនូវកិច្ចការងារដែលកម្ពុជា កំពុងខិតខំធ្វើបានយ៉ាងល្អ និងបន្តធ្វើ ក្នុងកិច្ចការបង្រ្កាបអំពើឆបោកងតាមប្រព័ន្ធបចេ្ចកវិទ្យា។

ជាមួយគ្នានេះ លោកអភិបាលខេត្ត បានផ្តល់បទសម្ភាសដោយបញ្ជាក់ ពីការបើកចំហលើបញ្ហា និងកិច្ចការងារដែលអាជ្ញាធរបានធ្វើ តាមរយៈការពង្រឹងការអនុវត្តច្បាប់ ពិសេសច្បាប់ស្តីពី ការប្រឆាំងការឆបោកតាមប្រព័ន្ធបច្ចេកវិទ្យា ដើម្បីបោសសំអាតអំពើឆបោក អនឡាញទាំងនេះឲ្យអស់ពីខេត្តស្វាយរៀងនិងមិនឲ្យបទល្មើសនេះត្រឡប់មកវិញឡើយ៕