(ស្ទឹងត្រែង)៖ មន្ត្រីមន្ទីរបរិស្ថាន និងមន្ទីររ៉ែ និងថាមពលខេត្តស្ទឹងត្រែង មានការចូលរួមពី​កម្លាំងប្រដាប់អាវុធផងដែរ បានចុះទៅបំផ្លាញកន្លែងរករ៉ែមាសមួយកន្លែងស្ថិតក្នុងឧទ្យាន​ជាតិ​​វើនសៃ-សៀមប៉ាង ភូមិសាស្រ្តគិរីបាសក្រោម ឃុំសន្តិភាព ស្រុក​សៀម​ប៉ាង ខេត្ត​ស្ទឹងត្រែង។ ប្រតិបត្តិការណ៍ខាងលើនេះ បានធ្វើឡើងក្រោយពីមានសេចក្តីរាយការណ៍​ថា មានជនជាតិវៀតណាមច្រើននាក់ ទៅសម្ងំរករ៉ែមាសនៅទីនេះ។

ប្រភពបានបញ្ជាក់ថា កាលពីយប់ថ្ងៃទី៧ ខែឧសភា ឆ្នាំ២០២៦ មន្ទីររ៉ែ និងថាមពល​ខេត្ត​ស្ទឹងត្រែង បានរាយការណ៍ថា មានជនជាតិវៀតណាម ជាច្រើននាក់ ធ្វើអាជីវកម្មរ៉ែមាស​អនាធិបតេយ្យនៅចំណុចភ្នំតូច។ បន្ទាប់ពីទទួលបានព័ត៌មាន​នៅថ្ងៃ​ទី៨ ខែឧសភា ឆ្នាំ​២០២៦ លោក ស៊ឹម ប៉ូលីន ប្រធានការិយាល័យឧទ្យានជាតិ បាន​ដឹក​នាំមន្ត្រីចំនួន​៣នាក់ សហការជាមួយមន្ត្រី នៃមន្ទីររ៉ែ និងថាមពលខេត្តចំនួន២នាក់ កម្លាំងកងរាជអាវុធ​ហត្ថស្រុកសៀមប៉ាងចំនួន២នាក់ កម្លាំងផ្នែកសឹរងស្រុកសៀមប៉ាង ចំនួន២នាក់ សហ​គមន៍​តំបន់ការពារធម្មជាតិអូរចាយ និងអូកាពីនចំនួន៥នាក់ បាន​ចុះ​ទៅត្រួតពិនិត្យ ទប់ស្កាត់ បង្ក្រាបបទល្មើសធ្វើអាជីកម្មរ៉ែអនាធិបតេយ្យនោះ។

ប្រភពបន្តថា ក្រុមការងារបានចុះដល់ចំណុចភ្នំតូច ស្ថិតក្នុងឧទ្យានជាតិ​វើន​សៃ-សៀម​ប៉ាង ភូមិសាស្រ្តគិរីបាសក្រោម ឃុំសន្តិភាព ស្រុក​សៀម​ប៉ាង ខេត្តស្ទឹងត្រែង តែ​ពុំឃើញ​មាន​សកម្មភាពធ្វើអាជីកម្មរ៉ែអនាធិប​តេយ្យ​នោះ​ទេ។ ក្រុមការងារបានបន្តរុករកជុំវិញ​ទី​តាំង​ភ្នំតូចនោះ ឃើញមានរោងប្រក់​តង់កៅស៊ូ​មួយ​កន្លែង ក្រុមការងារ​បាន​ត្រួតពិនិត្យ​ឃើញ​មានស្លាកស្នាមរុករករ៉ែមាស​ដោយ​ដៃ។ បន្ទាប់ពីពិនិត្យឃើញបែបនេះ ក្រុមការងារ បានប្រមូលយកឆាងចំនួន២ ប៉ែលចំនួន២ ឆ្នាំងបាយ១ ឆ្នាំងសម្ល១ និងរុះរើរោងតង់​កៅ​ស៊ូនោះដុតបំផ្លាញចោល៕