(សៀមរាប)៖ និស្សិតកម្ពុជា ៤ រូប ក្នុងនោះស្រ្តី ៣រូប នឹងត្រៀមបន្តទៅសិក្សាថ្នាក់អនុបណ្ឌិតផ្នែកនៅប្រទេសចិន លើជំនាញ កសិឧតុនិយម និងជលសាស្ត្រឧតុនិយមនៅសាកលវិទ្យាល័យវិទ្យាសាស្រ្តបច្ចេកវិទ្យាព័ត៌មានណានជីន ដើម្បីរួមចំណែកបង្កើនធនធាន និងពង្រឹងសមត្ថភាពជាតិក្នុងវិស័យអាកាសធាតុ ឧតុនិយម និងកសិឧតុនិយមនៅកម្ពុជា។

និស្សិតទាំង៤រូបមាន កញ្ញា រ័ត្ន សុវណ្ណអរិយា វ័យ២២ ឆ្នាំ, លោក គង់ សេរីមង្គល អាយុ២៦ឆ្នាំ, កញ្ញា ជា សុធារ័ត្ន អាយុ២៧ឆ្នាំ និង កញ្ញា សុខ សិរិតា អាយុ២៣ឆ្នាំ។ ពួកគេនឹងត្រៀមចេញដំណើរទៅសិក្សានៅប្រទេសចិន ក្នុងខែកញ្ញា ខាងមុខនេះ។

អាហារូបករណ៍ដែលផ្តល់ឱ្យនិស្សិតកម្ពុជាទាំង៤រូបទៅសិក្សានៅប្រទេសចិន លើជំនាញកសិឧតុនិយម និងជលសាស្ត្រឧតុនិយម ធ្វើឡើងតាមរយៈគម្រោង គជ់ ដែលអនុវត្តដោយក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ដោយទទួលបានថវិកាពីមូលនិធិបៃតង និងព្រមទាំងទទួលបានជំនួយបច្ចេកទេសពីអង្គការស្បៀង និងកសិកម្មនៃសហប្រជាជាតិ (FAO)។

លោកស្រី Rebekah Olivia Bell តំណាងអង្គការ FAO ប្រចាំនៅកម្ពុជា បានឱ្យដឹងថា ការផ្តល់អាហារូបករណ៍ដល់និស្សិតកម្ពុជាទាំង៤រូបទៅសិក្សាកសិឧតុនិយម និងជលសាស្ត្រឧតុនិយមនេះ ដោយមើលឃើញពីសារៈសំខាន់នៃជំនាញឧតុនិយម ដើម្បីឱ្យពួកគេសិក្សា និងក្រេបយកចំណេះដឹងថ្មីៗពីផ្នែកឧតុនិយម មកចូលអភិវឌ្ឍណ៍វិស័យកសិកម្ម ធនធានទឹកនៅកម្ពុជា។ នៅពេលដែលពួកគេត្រឡប់មកវិញ ពួកនឹងជួយដល់ការអភិវឌ្ឍន៍វិស័យធនធានទឹក កសិកម្ម ជាពិសេសជួយដល់កសិករ ក្នុងការបន្សាំខ្លួនទៅនឹងការប្រែប្រែអាកាសធាតុ។

លោកបណ្ឌិត អឿង ចន្ថា អនុរដ្ឋលេខាក្រសួងធនធានទឹក និងឧតុនិយម មានប្រសាសន៍ថា ជំនាញកសិឧតុនិយមគឺជាជំនាញដ៏សំខាន់ និងជាជំនាញកម្រមួយមួយនៅកម្ពុជាដែលពិបាកក្នុងការបណ្តុះបណ្តាលធនធានមនុស្ស។ការបញ្ជូននិស្សិតទៅសិក្សាជំនាញនេះ នឹងអាចជួយដល់កសិករនៅពេលអនាគត ជួយគាំទ្រវិស័យកសិកម្មនៅកម្ពុជា ឱ្យកាន់តែមានទំនើបកម្ម ឱ្យការដាំដុះកាន់តែទទួលបានទិន្នផលខ្ពស់។

និស្សិតដែលត្រៀមទៅបន្តការសិក្សា នៅប្រទេសចិន ក្នុងជំនាញ កសិឧតុនិយម បាននិយាយថា កសិឧតុនិយម និងជលសាស្ត្រឧតុនិយម គឺជាជំនាញដ៏សំខាន់មួយចំនួន ដែលរួមចំណែកក្នុងការក្នុងអភិវឌ្ឍន៍វិស័យកសិកម្មនៅកម្ពុជា នឹងជួយដល់កសិករ ក្នុងការបន្សាំជាមួយនឹងការប្រែប្រួលអាកាសធាតុ។ ពួកគេសង្ឃឹមថា បន្ទាប់ពីបញ្ចប់ការសិក្សា នាំយកចំណេះដឹងទាំងនេះ មកជួយវិស័យកសិកម្មនៅកម្ពុជា ជាពិសេសកសិករឱ្យយល់ដឹងកាន់តែច្បាស់ពីបញ្ហាអាកាសធាតុ និងការដាំដុះ៕

សូមទស្សនាការលើកឡើងទាំងស្រុងដូចតទៅ៖