(សៀមរាប)៖ អាជ្ញាធរជាតិអប្សរា បានចេញសេចក្ដីជូនដំណឹង ស្តីពីការអនុវត្តវិធានការនានា នារដូវវស្សា និងផ្សេងៗ ក្នុងរមណីយដ្ឋានអង្គរ បេតិកភណ្ឌពិភពលោក ដើម្បីធានាបាននូវសុវត្ថិភាព ជូនភ្ញៀវទេសចរជាតិ/អន្តរជាតិ និងសាធារណជនទាំងអស់ក្នុងដំណើរកំសាន្ត និងឆ្លងកាត់។

ក្នុងគោលបំណងរក្សាឱ្យបាននូវបទពិសោធន៍ទស្សនា ប្រកបដោយភាពសប្បាយរីករាយ និងក្នុងគោលដៅបង្ការផលប៉ះពាល់ ព្រមទាំងធានាបាននូវសុវត្ថិភាពជាអតិបរមា នារដូវវស្សា ជូនភ្ញៀវទេសចរជាតិ/អន្តរជាតិ និងសាធារណជនទាំង អស់ក្នុងដំណើរកំសាន្ត និងឆ្លងកាត់រមណីយដ្ឋានអង្គរ បេតិកភណ្ឌពិភពលោក អាជ្ញាធរជាតិអប្សរា សូមរំលឹកអំពី វិធានការគួរអនុវត្តមួយចំនួន ដូចខាងក្រោម៖

១៖ សុវត្ថិភាពពីបាតុភូតធម្មជាតិ
* គ្រោះថ្នាក់ពីដើមឈើ៖ សូមកុំចតយានយន្តគ្រប់ប្រភេទក្រោមដើមឈើនៅពេលខ្យល់កន្ត្រាក់ ឬភ្លៀង ខ្លាំងដែលអាចបណ្តាលឱ្យសភាពដីទន់ជ្រាយខ្លាំង បង្កទៅជាការបាក់មែក ឬរលំដើមឈើ ជាយថាហេតុ
* ប្រយ័ត្នផ្គររន្ទះ៖ ក្នុងករណីមេឃខ្មៅ ធ្លាក់ភ្លៀង ឬមានផ្គររន្ទះខ្លាំង សូមចៀសវាងការប្រើឧបករណ៍អេឡិច ត្រូនិច និងកុំជ្រកក្រោមដើមឈើធំៗ

២-ការរៀបចំខ្លួន និងសម្លៀកបំពាក់
* ស្បែកជើង៖ គួរប្រើប្រាស់ស្បែកជើង ដែលមានសភាពស្អិតល្អ ពីព្រោះថ្មប្រាសាទអាចនឹងមានសភាព រអិលខ្លាំងនៅពេលសើម
* អាវភ្លៀង និងឆ័ត្រ៖ គួរត្រៀមអាវភ្លៀង ឬឆ័ត្រ ដែលមិនមានចុងស្រួចខ្លាំង (អាចប៉ះពាល់ថ្ម និងចម្លាក់ ប្រាសាទ) និងចៀសវាងប្រើប្រាស់សម្ភារទាំងនោះ ដែលមានស្លាកសញ្ញា (Logo) តំណាងឱ្យការ ផ្សព្វផ្សាយផលិតផលគ្រឿងស្រវឹង ផ្ទុយពីគោលការណ៍គ្រប់គ្រងបេតិកភណ្ឌពិភពលោក
* គោរពក្រមសីលធម៌៖ ស្លៀកពាក់ឱ្យបានសមរម្យ និងអនុវត្តវិធានផ្សេងៗទៀត ដូចមានកំណត់ក្នុង ក្រមប្រតិបត្តិអង្គរ ជូនភ្ជាប់មកជាមួយសេចក្តីជូនដំណឹងនេះ

៣-ផ្សេងៗ
* ការការពារសត្វល្អិត៖ គួរលាបថ្នាំការពារសត្វល្អិត ដោយសាររដូវវស្សា អាចនឹងមានសត្វល្អិតច្រើន នៅតំបន់មានព្រៃ
* គោរពស្លាកសញ្ញាព្រមាននានា៖ អនុវត្តទៅតាមស្លាកសញ្ញាឱ្យដំណឹងនានា ជាពិសេសគោរពតាមការ ណែនាំរបស់ភ្នាក់ងារទេសចរណ៍ និងភ្នាក់ងារសណ្តាប់ធ្នាប់ប្រចាំការនៅតាមទីតាំងនីមួយៗ
* អំពីសត្វស្វា៖ ចៀសវាងជាដាច់ខាតការផ្តល់ចំណី និងការប៉ះពាល់ផ្ទាល់ជាមួយសត្វស្វាពីព្រោះសកម្ម ភាពទាំងនេះ នឹងផ្តល់ផលអាក្រក់ ច្រើនជាងផលល្អ ធ្វើឱ្យរំខានដល់ឥរិយាបថ ធម្មជាតិរបស់សត្វ ធ្វើឱ្យ សត្វពឹងផ្អែកលើមនុស្ស និងអាចបង្កជាបញ្ហាសុខភាពធ្ងន់ធ្ងរ ដូចជាបង្កើនហានិភ័យនៃជំងឺ ការប្រឈម មុខដាក់គ្នារវាងមនុស្ស និងសត្វ ប្រកបដោយគ្រោះថ្នាក់ជាដើម។ តាមរយៈនេះសូមទុកឱ្យសត្វរស់នៅ តាមបែបធម្មជាតិ មានសុខភាពល្អ និងមានសេរីភាព -ល-៕