(កំពង់ចាម)៖ លោកសន្តិបណ្ឌិត នេត សាវឿន ឧបនាយករដ្ឋមន្ត្រី ‎នៅថ្ងៃទី១២ ខែឧសភា ឆ្នាំ២០២៦ បានអញ្ជើញចុះប្រគល់ផ្ទះមួយខ្នងជាអំណោយរបស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជន និងនិវត្តជនកម្ពុជា ផ្តល់ជូនលោក យិន សំអុល ដែលជាមុខសញ្ញាគ្រួសារនិវត្តជន រស់នៅភូមិទួលបេង ឃុំក្រឡា ស្រុកកំពង់សៀម ខេត្តកំពង់ចាម។

ក្នុងឱកាសនោះ ក៏មានការចូលរួមពីលោក អ៊ុន ចាន់ដា អភិបាលខេត្តកំពង់ចាម ប្រតិភូអមលោកប្រធាន-អនុប្រធាន អ.ន.ក ខេត្តកំពង់ចាម លោកប្រធាន-អនុប្រធានលេខាធិការដ្ឋាន អ.ន.ក. ខេត្តកំពង់ចាម លោកប្រធាន អនុប្រធាន អ.ន.ក ស្រុកកំពង់សៀម និងលោកប្រធាន អនុប្រធានលេខាធិការដ្ឋាន អ.ន.ក ស្រុកកំពង់សៀម អាជ្ញាធរមូលដ្ឋាន ថ្នាក់ស្រុក ឃុំដែលពាក់ព័ន្ធជាច្រើនទៀត។
‎
‎លោកសន្តិបណ្ឌិត នេត សាវឿន បាននាំយកអំណោយមានគ្រឿងឧបភោគបរិភោគមួយចំនួន និងថវិការបស់សម្តេចតេជោ ហ៊ុន សែន ចំនួន៥០មុឺនរៀល និងថវិការបស់លោកសន្តិបណ្ឌិត នេត សាវឿន ចំនួន២០០ដុល្លារ, អង្ករចំនួន៨០គីឡូក្រាម, ទឹកបរិសុទ្ធ ៤កេស, មី ១កេស, ត្រីខ ២យួរ, ទឹកត្រី ២យួរ, ទឹកស៊ីអ៉ីវ ២យួរ, សម្ភារៈប្រើប្រាស់ និងគ្រឿងឧបភោគបរិភោគមួយចំនួនទៀត ផ្តល់ជូនលោក យិន សំអុល៕