(ភ្នំពេញ)៖ កម្លាំងគណៈបញ្ជាការឯកភាពខណ្ឌច្បារអំពៅ បានចុះបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) នៅសង្កាត់វាលស្បូវ ដោយឃាត់ខ្លួនមនុស្សចំនួន ៩នាក់ និងដកហូតបានសម្ភារមួយចំនួនធំ។

ប្រតិបត្តិការនេះបានធ្វើឡើនៅថ្ងៃទី១២ ខែឧសភា ឆ្នាំ២០២៦ ក្រុមការងារចម្រុះដឹកនាំដោយលោក ម៉ូវ ម៉ានិត អភិបាលខណ្ឌច្បារអំពៅ និងដោយមានការសម្របសម្រួលផ្លូវច្បាប់ពីលោក ទិន សុចិត្រា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យទីតាំងផ្ទះលេខ២២៧ ផ្លូវលំ ភូមិព្រែកជាងព្រហ្ម សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ដែលបានយកទីតាំងខាងលើពាក់ព័ន្ធការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។

ក្នុងនោះក្រុមការងារបានត្រួតពិនិត្យរកឃើញមនុស្សចំនួន០៩នាក់, ជនជាតិចិន ចំនួន ០៨នាក់ និងជនជាតិវ៉ានូអាទូ ចំនួន ០១នាក់។

សម្ភារដកហូតមានដូចជា៖ ទូរស័ព្ទដៃចំនួន ៤១គ្រឿង, laptop ចំនួន០៧គ្រឿង, កាំភ្លើងចំនួន ០១ដើម និងគ្រាប់កាំភ្លើងចំនួន ៤៩គ្រាប់។

សន្និដ្ឋានបឋម គឺរក្សាទុកឧបករណ៍អេឡិចត្រូនិចបម្រើឱ្យអំពើការឆបោកតាមប្រព័ន្ធបច្ចេកវិទ្យា Online Scames (ក្រុមជនសង្ស័យខាងលើព្យាយាមបំផ្លាញ់វត្ថុតាង មុនពេលសមត្ថកិច្ចទៅដល់) និងប្រើប្រាស់កាន់កាប់អាវុធខុសច្បាប់៕