(កណ្ដាល)៖ ឆ្លងចរន្តអគ្គិសនី បង្កជាអគ្គិភ័យបានលេបត្របាក់ផ្ទះ ១ខ្នង បណ្ដាលឱ្យកូនម្ចាស់ផ្ទះម្នាក់ដែលខំពន្លត់ភ្លើងរងរបួសត្រូវបញ្ជូនទៅព្យាបាលនៅមន្ទីរពេទ្យ។ ហេតុការណ៍នេះបានកើតឡើងនៅថ្ងៃទី១២ ខែឧសភា ឆ្នាំ២០២៦ នៅចំណុចភូមិលេខ៣សង្កាត់ ស្វាយរលំក្រុងតាខ្មៅ ខេត្តកណ្ដាល។

បើតាមលោកវរសេនីយ៍ឯក អៀង ធារី នាយការិយាល័យបង្ការ និងពន្លត់អគ្គិភ័យ នៃស្នងការដ្ឋាននគរបាលខេត្តកណ្ដាល បានឱ្យដឹងថា ករណីនេះកើតឡើង មូលហេតុបណ្តាលមកពីឆ្លងចរន្តអគ្គិសនី (ទុស្សេខ្សែភ្លើងព្រោះខ្សែភ្លើងត មានព្រីបំបែកមានសភាពចាស់ ទើបឆ្លងចរន្តឆេះរាលដាលតែម្តង)។

ម្ចាស់ផ្ទះមានឈ្មោះ អ៉ិត ម៉ក់ ភេទប្រុស អាយុ៥៩ឆ្នាំ និងប្រពន្ធឈ្មោះ ទូច ហន ភេទស្រី អាយុ៧១ឆ្នាំ មុខរបរលក់ដូរ មានសមាជិករស់នៅជាមួយគ្នាចំនួន២១នាក់ ស្រី០៩នាក់។

លោកបានបន្តថាសម្ភារៈខូចខាតរួមមាន៖ ផ្ទះ១ខ្នង ទំហំ១០ម៉ែត្រ គុណ១០ម៉ែត្រ ធ្វើពីឈើ ប្រក់សង្ក័សី ជញ្ជាំងឈើលាយ ស័ង្កសី រៀបបេតុងផ្នែកក្រោមផ្ទះពាក់កណ្ដាល (ឆេះខូចខាតទាំងស្រុង), គ្រឿងអលង្កាកា (ផ្លាកទីន ០១ជី), ទូរស័ព្ទស្មាតហ្រូន (០៦គ្រឿង) កុំព្យូទ័រដេសថប់ (០១គ្រឿង) និងសម្ភារៈសំលៀកបំពាក់ឯកសារប្រើប្រាស់សំគាល់ខ្លួន
ឆេះខូចខាតទាំងស្រុង។

លោកបានបញ្ជាក់ថា ការអន្តរាគមន៍ប្រើប្រាស់មធ្យោបាយជួយសង្គ្រោះរថយន្តពន្លត់អគ្គីភ័យ០២គ្រឿង របស់ស្នងការដ្ខានខេត្តកណ្ដាល និងប្រើទឹក ០២សុីទែន ទើបអាចគ្រប់គ្រងបានទាំងស្រុង៕