(កំពត)៖ ប្រជាពលរដ្ឋចំនួន៤គ្រួសារ បានរួមគ្នាដាក់ពាក្យស្នើសុំអន្តរាគមន៍ទៅអភិបាលក្រុងបូកគោ ខេត្តកំពត ឱ្យទប់ស្កាត់លោក វិញ ហួរ និងលោកស្រី ហ្វ៊ូ ឆេងសៀង ដែលបានធ្វើរបងចូលមកក្នុងដីរបស់ពួកគាត់ ដែលមានទីតាំងនៅព្រែកអំពិល សង្កាត់កោះតូច ក្រុងបូកគោ ខេត្តកំពត។

យោងតាមលិខិតស្នើសុំអន្តរាគមន៍របស់ប្រជាពលរដ្ឋទាំង៤គ្រួសារ ដែលបណ្តាញព័ត៌មាន Fresh News ទទួលបាននៅថ្ងៃទី១២ ខែឧសភា ឆ្នាំ២០២៦ បានឱ្យដឹងថា កាលពីអំឡុងខែមិថុនា ឆ្នាំ២០២១ ពួកគាត់បានទិញដី ស្ថិតនៅភូមិព្រែកអំពិល ឃុំកោះតូច ក្រុងបូកគោ ខេត្តកំពត ពីឈ្មោះ វង្ស គឹមហាន ភេទប្រុស និងឈ្មោះ ហាន វិរិយា ភេទស្រី ដូចខាង ក្រោម៖

*ដីទំហំ ១២,០០០ម៉ែត្រការ៉េ ផ្អែកតាមលិខិតផ្ទេរសិទ្ធិកាន់កាប់ ចុះថ្ងៃទី២៣ ខែមិថុនា ឆ្នាំ២០២១ រវាងលិខិតផ្ទេរសិទ្ធិកាន់កាប់ ចុះថ្ងៃទី១០ ខែមិថុនា ឆ្នាំ២០២១ រវាងឈ្មោះ វង្ស គឹមហាន, ឈ្មោះ ឈិន សុង បញ្ជាក់ដោយលោកមេឃុំកោះតូច ឈ្មោះ ឈូក ថូ។

ឈ្មោះ វង្ស គឹមហាន, ឈ្មោះ ហាន វិរិយ៉ា និងឈ្មោះ អ៊ុយ បូរ៉ា បញ្ជាក់ដោយលោកមេឃុំកោះតូច ឈ្មោះ ឈូក ថូ

*ដីទំហំ ៨,០០០ម៉ែត្រការ៉េ ផ្អែកតាមលិខិតផ្ទេរសិទ្ធិកាន់កាប់ ចុះថ្ងៃទី២៣ ខែមិថុនា ឆ្នាំ២០២១ រវាង ឈ្មោះ វង្ស គឹមហាន, ឈ្មោះ ហាន វិរិយ៉ា និងឈ្មោះ ហួត ខាក់, ឈ្មោះ សុខ ទ្រី បញ្ជាក់ដោយ លោកមេឃុំកោះតូច ឈ្មោះ ឈូក ថូ

*ដីទំហំ ៥,០០០ ម៉ែត្រការ៉េ ផ្អែកតាមលិខិតផ្ទេរសិទ្ធិកាន់កាប់ ចុះថ្ងៃទី២៣ ខែមិថុនា ឆ្នាំ២០២១ រវាង ឈ្មោះ វង្ស គឹមហាន, ឈ្មោះ ហាន វិរិយ៉ា និងឈ្មោះ ឡាង សីលា, ឈ្មោះ ហ៊ុល វុត្ថា បញ្ជាក់ ដោយលោកមេឃុំកោះតូច ឈ្មោះ ឈូក ផូ។

បច្ចុប្បន្ននេះ ពួកគាត់បានសាងសង់លំនៅឋាន និងកំពុងអាស្រ័យផលលើទីតាំងដីខាងលើនេះ ព្រមទាំងបានតភ្ជាប់បណ្តាញអគ្គិសនី ទឹកប្រើប្រាស់រួចរាល់ផងដែរ។

ស្រាប់តែចុងក្រោយនេះ ពួកគាត់ទទួលបានព័ត៌មានថា មានសំណើសុំចុះបញ្ជីដីធ្លីរបស់ឈ្មោះ វិញ ហ៊ូរ និងឈ្មោះ ហ៊ូ ឆេងសៀង ទំហំ២៧៥,៤០២៥ហិកតា ដែលមានទីតាំងស្ថិតនៅភូមិព្រែកអំពិល សង្កាត់កោះតូច ក្រុងបូកគោ ខេត្តកំពត ដែលមានទីតាំងដីមួយចំណែក ជាន់នឹងទីតាំងដីរបស់ពួកគាត់ខាងលើ ដោយពុំបានជូនដំណឹងមកពួកគាត់ដែលជាម្ចាស់ដីនោះទេ៕