(បាត់ដំបង)៖ សម្តេចព្រះអភិសេរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្ដេចព្រះមហាសង្ឃរាជនៃគណៈធម្មយុត្តិកនិកាយ នៃព្រះរាជាណាចក្រកម្ពុជា នាព្រឹកថ្ងៃទី១៣ ខែឧសភា ឆ្នាំ២០២៦ សព្វព្រះរាជហប្ញទ័យ យាងជាព្រះរាជធិបតីភាពក្នុងព្រះរាជពិធីប្រគល់ផ្ទះចំនួន ១០៤ខ្នង ជូនអតីតយុទ្ធជន និងនិវត្តជន និងយាងពិនិត្យដីសាងសងវត្ត ភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង។

ព្រះរាជពិធីប្រគល់ផ្ទះចំនួន១០៤ខ្នង និងពិនិត្យដីកសាងវត្ត មានការចូលរួមពីលោកកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា អ្នកឧកញ៉ា ម៉ម វណ្ណឌី ទីប្រឹក្សាសម្តេចតេជោ ហ៊ុនសែន ប្រធានព្រឹទ្ធសភា និងលោកជំទាវអ្នកឧកញ៉ា និងថ្នាក់ដឹកនាំសមាគម ថ្នាក់ដឹកនាំខេត្ត ស្រុក ឃុំ កងកម្លាំងទាំងបីប្រភេទជុំវិញខេត្ត ព្រមទាំងបងប្អូនទទួលផ្ទះទាំង១០៤គ្រួសារ។

ផ្ទះថ្មីចំនួន១០៤ខ្នង ដែលបានប្រគល់ជូនបងប្អូនអតីតយុទ្ធជន និងនិវត្តជន ក្នុងភូមិសាស្រ្តខាងលើនេះ ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់ជូនតាមរយៈអ្នកឧកញ៉ា ម៉ម វណ្ណឌី និងអ្នកឧកញ៉ា ទៀង ផល្លា។

ព្រះរាជពិធីនោះដែរ សម្តេចព្រះអភិសេរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សព្វព្រះរាជហប្ញទ័យ ប្រទានអំណោយជាគ្រឿងឧបភោគបរិភោគ និងថវិកាជូនអតីតយុទ្ធជន និងនិវត្តជនចូលរួមផងដែរ៕