គ្រួសារកូនភ្លោះបីទី៤៣៥ ជាអ្នកព្រៃវែង ទទួលបានអំណោយពីសម្តេចតេជោ, សម្តេចកិត្តិព្រឹទ្ធបណ្ឌិត, សម្តេចមហាបវរធិបតី និងលោកជំទាវបណ្ឌិត (Video inside)
13-05-2026 17:51
(ភ្នំពេញ)៖ គ្រួសារសម្រាលបានកូនភ្លោះបីមួយគ្រួសារទៀតហើយ ទទួលបានអំណោយពីសម្តេចតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។ នេះជាគ្រួសារសម្រាលកូនភ្លោះ៣ ទី៤៣៥ហើយ ដែលទទួលបានអំណោយពីថ្នាក់ដឹកនាំជាតិ សម្រាលការលំបាកក្នុងជីវភាព។
អំណោយសប្បុរសធម៌របស់សម្តេចតេជោ សម្តេចកិត្តិព្រឹទ្ធបណ្ឌិត សម្តេចមហាបវរធិបតី និងលោកជំទាវបណ្ឌិត ត្រូវបានលោក សេង ទៀង នាំយកទៅប្រគល់ជូនដល់ដៃគ្រួសារកូនភ្លោះបី កំពុងសំរាកថែទាំសុខភាព ក្រោយសំរាលនៅមន្ទីរពេទ្យកាល់ម៉ែត នាព្រឹកថ្ងៃទី១៣ ខែឧសភា ឆ្នាំ២០២៦នេះ។ អំណោយរួមមានថវិកា ១០លានរៀល អង្ករ ៥០គីឡូក្រាម ទឹកដោះគោ ២កេសធំ ស្កសរ ៥គីឡូក្រាម សារុង២ និងក្រម៉ា២។
គ្រួសារកូនភ្លោះបីដែលទទួលបានអំណោយនាព្រឹកមិញនេះ ជាកូនលើកទី៣ក្នុងគ្រួសារ មានឪពុកឈ្មោះ ហេង ហ៊ៀត អាយុ ២៥ឆ្នាំ មុខរបរកម្មកររោងចក្រ ម្តាយឈ្មោះ ធួក សាវៀន អាយុ២៨ឆ្នាំ មុខរបរកម្មការិនីរោងចក្រ រស់នៅភូមិកំពង់ថ្លែង ឃុំធាយ ស្រុកបាភ្នំ ខេត្តព្រៃវែង។ កូនភ្លោះជាទារកទាំង៣នាក់ បានសម្រាលកាលពីថ្ងៃទី៧ ខែឧសភា ឆ្នាំ២០២៦ នៅមន្ទីរពេទ្យកាល់ម៉ែត្រ។
នៅចំពោះមុខក្រុមគ្រួពេទ្យ នាយករងខុទ្ទកាល័យសម្តេចមហាបវរធិបតី មានប្រសាសន៍ថ្លែងអំណរគុណជូនចំពោះក្រុមគ្រូពេទ្យទាំងអស់ នៃមន្ទីរពេទ្យកាល់ម៉ែត ដែលបានខិតខំអស់លទ្ធភាព ក្នុងការជួយសំរាលទារកភ្លោះទាំងបីនាក់ រួមទាំងមាតាកូនភ្លោះ ឱ្យមានសុខភាពល្អទាំងកូន និងម្តាយ។
លោក សេង ទៀង បានផ្តាំផ្ញើដល់ក្រុមគ្រួពេទ្យបន្តខិតខំតាមដានសុខភាពមាតា និងទារកឱ្យបានជាប់លាប់។ លោកក៏បានផ្តាំផ្ញើមាតាបិតាទារកភ្លោះ ត្រូវស្តាប់តាមការណែនាំពីក្រុមគ្រួពេទ្យ បើមានបញ្ហាអ្វីកើតឡើង និងមានអាការៈអ្វីមិនស្រួលត្រូវរាយការណ៍ជូនគ្រួពេទ្យប្រចាំការ ជៀសវាងមានគ្រោះថ្នាក់អ្វីមួយកើតឡើងកំពោះមាតា និងទារក។
លោក សេង ទៀង មានប្រសាសន៍ពាំនាំនូវការផ្តាំផ្ញើសាកសួរសុខទុក្ខ ដោយសេចក្តីនឹករលឹកយ៉ាងជ្រាលជ្រៅបំផុត ពីសម្តេចតេជោ និងសម្តេចកិត្តិព្រឹទ្ធបណ្ឌិត សម្តេចមហាបវរធិបតីនាយករដ្ឋមន្ត្រី និងលោកជំទាវបណ្ឌិត ដែលជានិច្ចកាលសម្តេច និងលោកជំទាវបណ្ឌិត តែងតែនឹករលឹកសណ្តោសប្រណី ចំពោះប្រជាពលរដ្ឋនៅគ្រប់ទីកន្លែងទាំងអស់ក្នុងប្រទេសកម្ពុជា។
នាយករងខុទ្ទកាល័យបានឱ្យដឹងដែរថា ការជួយដល់គ្រួសារមានកូនភ្លោះ៣ ឬ៤នាក់នេះ ជាការទឹកចិត្តសណ្តោសប្រណី និងគិតគូរខ្ពស់របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត តាំងពីឆ្នាំ១៩៩៩មកម្ល៉េះ។ មកដល់បច្ចុប្បន្ននេះ មានរយៈ ពេលជាង ២៧ឆ្នាំហើយ។ ២៧ឆ្នាំកន្លងមកនេះ មានគ្រួសារសម្រាលកូនភ្លោះបីនាក់ ឬបួននាក់ ចំនួន ៤៣៥គ្រួសារហើយ បានទទួលអំណោយឧបត្ថម្ភដ៏សប្បុរសធម៌ ពីសម្តេចតេជោ និងសម្តេចកិត្តិព្រឹទ្ធបណ្ឌិត ជួយទំនុកបំរុង ដោះស្រាយការលំបាកខ្វះខាតក្នុងជីវភាព ជាពិសេសការចិញ្ចឹមបីបាច់កូនភ្លោះបីនាក់។
លោក សេង ទៀង បានគូសបញ្ជាក់ផងដែរថា ការឧបត្ថម្ភទាំងអស់នេះ មិនមែនជាអំណោយរបស់រាជរដ្ឋាភិបាល អំណោយរបស់កាកបាទក្រហមកម្ពុជា ឬអំណោយរបស់គណបក្ស បម្រើឱ្យសកម្មភាពនយោបាយនោះទេ។ អំណោយទាំងអស់នេះ គឺជាអំណោយទានកើតចេញពីទឹកចិត្តប្រកបដោយការគិតគួរខ្ពស់របស់សម្តេចតេជោ និងសម្តេចកិត្តិព្រឹទ្ធបណ្ឌិត សម្តេចធិបតីនាយករដ្ឋមន្ត្រី និងលោកជំទាវបណ្ឌិត ដែលបានឈ្វេងយល់ពីការលំបាកពិតប្រាកដ ចំពោះប្រជាពលរដ្ឋសម្រាលកូនភ្លោះបី ឬបួននាក់ មិនថាមាន ឬក្រ ជាតិសាសន៍អ្វីទាំងអស់ ឱ្យតែសម្រាលនៅកម្ពុជា។
សូមបញ្ជាក់ថា ការឧបត្ថម្ភនេះ កាលពីដើមឡើយ គឺមានតែអំណោយរបស់សម្តេចតេជោ និងសម្តេចកិត្តិព្រឹទ្ធបណ្ឌិតប៉ុណ្ណោះ។ មរតកទឹកចិត្តមនុស្សធម៌ សេចក្តីអាណិតអាសូររបស់សម្តេចតេជោ និងសម្តេចកិត្តិព្រឹទ្ធបណ្ឌិត បានបង្ហូរបន្តដល់សម្តេចមហាបវរធិបតី និងលោកជំទាវបណ្ឌិតផងដែរ។
បន្ទាប់ពីឡើងកាន់ការងារជានាយករដ្ឋមន្ត្រី សម្តេចមហាបវរធិបតី និងលោកជំទាវបណ្ឌិត ក៏បន្តតាមលំអានដួងចិត្តមេត្តាធម៌របស់សម្តេចតេជោ និងសម្តេចកិត្តិព្រឹទ្ធបណ្ឌិត ហើយបានចូលរួមឧបត្ថម្ភដល់គ្រួសារសម្រាលកូនភ្លោះ៣នាក់ ឬ៤នាក់ផងដែរ។
សម្តេចមហាបវរធិបតី និងលោកជំទាវបណ្ឌិត តែងចូលរួមឧបត្ថម្ភជាថវិកាចំនួន ៥លានរៀល។ គ្រួសារខាងលើនេះ ជាគ្រួសារលើកទី១១ហើយ ដែលទទួលបានថវិកាឧបត្ថម្ភពីសម្តេចមហាបវរធិបតី និងលោកជំទាវបណ្ឌិត៕
