(ភ្នំពេញ)៖ ឈប់បារម្ភលើភាពស្មុគស្មាញក្នុងការស្វែងរកសេវារដ្ឋតាមកម្មវិធីច្រើនដាច់ដោយឡែកពីគ្នា, ឈានចូលមកដល់យុគសម័យថ្មី ក្រសួងប្រៃសណីយ៍ និងទូរគមនាគមន៍ បានបញ្ចេញអាវុធឌីជីថលដ៏មុតស្រួច DG SuperApp លើការស្នើសុំបណ្ណបើកបរទម្រង់ឌីជីថល ដែលApp នេះ មិនត្រឹមតែជាច្រកចេញចូលសេវាសាធារណៈតែមួយប៉ុណ្ណោះទេ ប៉ុន្តែថែមទាំងនាំយក AI ដែលកំពុងតែពេញនិយមប្រើប្រាស់នៅលើអ៉ីនធឺណិត មកឱ្យពលរដ្ឋប្រើប្រាស់ដោយឥតគិតថ្លៃ ដើម្បីផ្លាស់ប្តូររបៀបដែលយើងសិក្សា ធ្វើការនិងរស់នៅឱ្យកាន់តែទំនើបជាងមុន។

ចំណុចដែលធ្វើឱ្យ DG SuperApp មានភាពលេចធ្លោបំផុត និងខុសប្លែកពីកម្មវិធីផ្សេងៗនោះគឺ ការដាក់បញ្ចូលនូវបច្ចេកវិទ្យាបញ្ញាសិប្បនិម្មិត (AI) ដែលកន្លងមកពលរដ្ឋអាចនឹងត្រូវបង់ប្រាក់ដើម្បីប្រើប្រាស់ ប៉ុន្តែពេលនេះនឹងផ្តល់ជូនដោយឥតគិតថ្លៃ និងគ្មានដែនកំណត់៖

• DG ChatGPT: ជាជំនួយការឆ្លាតវៃដែលមានសមត្ថភាពប្រហាក់ប្រហែលនឹង ChatGPT។ វាអាចជួយតាក់តែងអត្ថបទ វិភាគទិន្នន័យស្មុគស្មាញ និងឆ្លើយសំណួរគ្រប់វិស័យ ដែលជាឧបករណ៍ដ៏មានតម្លៃសម្រាប់សិស្ស និស្សិត និងអ្នកស្រាវជ្រាវ។

• TranslateKH: ជំនាញក្នុងការបកប្រែអត្ថបទរវាងភាសាខ្មែរ និងអង់គ្លេស ដែលត្រូវបានអភិវឌ្ឍឡើងឱ្យចំគោលដៅ និងបរិបទនៃភាសាខ្មែរយើងផ្ទាល់។

ក្រៅពីភាពឆ្លាតវៃនៃ AI ថ្នាលនេះក៏ជាមជ្ឈមណ្ឌលឌីជីថល ដែលប្រមូលផ្តុំកម្មវិធីរដ្ឋបាលសំខាន់ៗជាច្រើន (Mini Apps) មកដាក់ក្នុងកន្លែងតែមួយ ដើម្បីកាត់បន្ថយការស៊ាំញ៉ាំ៖

• Qr.gov.kh: សម្រាប់ការប្រើប្រាស់ក្នុងការបង្កើត QR កូដតាមតម្រូវការ។

• MyHealth: អនុញ្ញាតឱ្យប្រជាពលរដ្ឋចូលមើលកំណត់ត្រាការទទួលថ្នាំបង្ការរបស់ខ្លួន បានយ៉ាងងាយស្រួល។

• DG Frame: បង្ហាញស្មារតីគាំទ្ររដ្ឋាភិបាល តាមរយៈការដាក់តាំងរូបភាពក្នុងរូបស៊ុមគាំទ្រយុទ្ធនាការណ៍ និងព្រឹត្តិការណ៍នានា របស់រដ្ឋាភិបាល។

• TopUp: ផ្តល់ភាពងាយស្រួលក្នុងការបញ្ជូលលុយកាតទូរសព្ទពីគ្រប់ប្រព័ន្ធ។

• SIM Verifier: គឺជាកម្មវិធីដែលអនុញ្ញាតអោយអ្នកប្រើប្រាស់ផ្ទៀងផ្ទាត់អត្តសញ្ញាណស៊ីមកាត ដោយភ្ជាប់វាទៅនឹងគណនីធនាគារ ឬគណនីទូទាត់ប្រាក់របស់អ្នកប្រើប្រាស់។

ការមកដល់នៃ DG SuperApp នឹងជួយសម្រួលដល់ជីវភាពប្រចាំថ្ងៃរបស់មជ្ឈដ្ឋានជុំវិញ(១) មន្ត្រីរាជការ៖ បង្កើនប្រសិទ្ធភាពការងាររដ្ឋបាលតាមរយៈប្រព័ន្ធស្វ័យប្រវត្តិកម្ម។(២) ធុរជន៖ ងាយស្រួលក្នុងការទំនាក់ទំនង និងប្រើប្រាស់សេវាឌីជីថលរបស់រដ្ឋសម្រាប់ការវិនិយោគ។ (៣) សិស្ស-និស្សិត៖ មានជំនួយការ AI នៅក្បែរខ្លួនជានិច្ចសម្រាប់ការសិក្សា។
សាធារណជនអាចទាញយក DG SuperApp មកប្រើប្រាស់បានដោយងាយស្រួល និងឥតគិតថ្លៃ ដោយគ្រាន់តែចូលទៅកាន់ App Store ឬ Play Store រួចវាយពាក្យថា DG SuperApp ឬគ្រាន់តែស្កេន QR Code ដែលមាននៅលើសេចក្តីប្រកាសរបស់ក្រសួងជាការស្រេច។

នេះគឺជាមោទនភាពជាតិថ្មីមួយ ដែលបញ្ជាក់ថាបច្ចេកវិទ្យាខ្ពស់មិនមែនជារឿងឆ្ងាយដៃសម្រាប់ពលរដ្ឋខ្មែរទៀតឡើយ។ DG SuperApp នឹងក្លាយជាដៃគូដ៏សំខាន់ដែលមិនអាចខ្វះបាន ក្នុងការរុញច្រានកម្ពុជាឱ្យក្លាយជាសង្គមឌីជីថលដ៏រឹងមាំ និងរស់រវើកក្នុងពេលដ៏ខ្លីខាងមុខ៕