(ភ្នំពេញ)៖ កម្ពុជាបានត្រៀមខ្លួនរួចជាស្រេចដើម្បីស្វាគមន៍អតីតប្រតិភូនាវាយុវជនមកពីបណ្តាប្រទេសអាស៊ាន និងជប៉ុន បន្ទាប់ពីបានទទួលទង់ជ័យ ជាសក្ខីភាពក្នុងការធ្វើជាម្ចាស់ផ្ទះរៀបចំ «មហាសន្និបាតអន្តរជាតិនៃកម្មវិធីនាវាយុវជនអាស៊ីអាគ្នេយ៍និងជប៉ុន លើកទី៣៥» ឬ 35th SIGA ដែលនឹងប្រព្រឹត្តទៅចាប់ពីថ្ងៃទី៣០ ខែមេសា ដល់ថ្ងៃទី០៤ ខែឧសភា ឆ្នាំ២០២៧ នៅខេត្តសៀមរាប ព្រះរាជាណាចក្រកម្ពុជា។

ពិធីប្រគល់និងទទួលទង់ជ័យនេះ រៀបចំនាឱកាសមហាសន្និបាតអន្តរជាតិលើកទី៣៤ (34th SIGA) នៅរដ្ឋធានីវៀងច័ន្ទ និងខេត្តវ៉ាំងវៀង សាធារណរដ្ឋប្រជាមានិតឡាវ កាលពីថ្ងៃទី០៧ ដល់ថ្ងៃទី១១ ខែឧសភា ឆ្នាំ២០២៦ ដោយគណៈប្រតិភូកម្ពុជាដឹកនាំដោយ លោកស្រី Sroy Socheath - ស្រូយ សុជាតិ អគ្គនាយកនៃអគ្គនាយកដ្ឋានយុវជន និងជាប្រធានប្រតិភូកម្ពុជា ព្រមទាំងកញ្ញា អ៊ឹម រចនា - IM Rachna ប្រធានសមាគមនាវាយុវជនអាស៊ីអាគ្នេយ៍កម្ពុជា (SIC)។

គួរកត់សម្គាល់ថា មហាសន្និបាតឆ្នាំនេះ ប្រារព្ធឡើងក្រោមមូលបទ «SSEAYP International: Enhancing Memories, Harmony & Connectivity» ដែលរៀបចំដោយសមាគមអតីតប្រតិភូឡាវ (LASSA) និងសម្ព័ន្ធយុវជនឡាវ។

ក្នុងព្រឹត្តិការណ៍នោះ គណៈប្រតិភូកម្ពុជាបានចូលរួមយ៉ាងសកម្មលើគ្រប់សកម្មភាព រួមមានការប្រជុំថ្នាក់ដឹកនាំសមាគម (COP Meeting) វឌ្ឍនភាពការងាររបស់សមាគម ជាពិសេសលើការងារមនុស្សធម៌ និងកិច្ចសហការជាមួយក្រសួងអប់រំ យុវជន និងកីឡា ក្នុងការជ្រើសរើស និងបណ្តុះបណ្តាលយុវជនកម្ពុជាឱ្យក្លាយជាទូតសុឆន្ទៈដ៏មានសមត្ថភាព។

យុទ្ធសាស្ត្រផ្សព្វផ្សាយ និងការរៀបចំដ៏រឹងមាំរបស់ក្រុមការងារកម្ពុជា ទទួលបានការកោតសរសើរយ៉ាងខ្លាំងពីសំណាក់សមាជិកដទៃទៀត ដែលជាសញ្ញាវិជ្ជមានសម្រាប់ការត្រៀមខ្លួនឆ្ពោះទៅឆ្នាំ២០២៧។

ក្នុងពិធីទទួលទង់ជ័យ SIGA ពីម្ចាស់ផ្ទះឡាវ កាលពីយប់ថ្ងៃទី១០ ខែឧសភា ឆ្នាំ២០២៦ កញ្ញា អ៊ឹម រចនា ប្រធានសមាគមនាវាយុវជនអាស៊ីអាគ្នេយ៍កម្ពុជា បានបង្ហាញការប្ដេជ្ញាចិត្តនិងការទទួលខុសត្រូវដ៏ខ្ពង់ខ្ពស់ក្នុងការបន្តបេសកកម្មពង្រឹងបណ្តាញអតីតប្រតិភូយុវជនជាង ១៣,៥០០ នាក់ក្នុងតំបន់ និងថា៖ «កម្ពុជាបានត្រៀមខ្លួនរួចជាស្រេច មិនត្រឹមតែក្នុងការរៀបចំកិច្ចប្រជុំកម្រិតតំបន់ប៉ុណ្ណោះទេ ប៉ុន្តែគឺដើម្បីបង្ហាញពីសន្តិភាព ការអភិវឌ្ឍ និងបដិសណ្ឋារកិច្ចដ៏កក់ក្តៅរបស់ខ្មែរ ទៅកាន់ពិភពលោកតាមរយៈយុវជន»។

គួរបញ្ជាក់ផងដែរថា SIGA គឺជាព្រឹត្តិការណ៍ប្រចាំឆ្នាំដ៏ធំបំផុតរបស់អតីតប្រតិភូនាវាយុវជនអាស៊ីអាគ្នេយ៍និងជប៉ុន ដើម្បីពង្រឹងបណ្តាញទំនាក់ទំនងរវាងសមាគមអតីតប្រតិភូទាំង ១១ ប្រទេស ចែករំលែកបទពិសោធន៍លើសកម្មភាពក្រោយកម្មវិធី (Post-Program Activities) ដើម្បីជួយដល់សង្គមជាតិ ព្រមទាំងផ្សព្វផ្សាយវប្បធម៌ និងទេសចរណ៍នៃប្រទេសជាម្ចាស់ផ្ទះ។

សមាគមនាវាយុវជនអាស៊ីអាគ្នេយ៍កម្ពុជា (SIC) សូមគោរពអញ្ជើញសមាជិក សមាជិកា និងដៃគូសហការទាំងអស់ ចូលរួមគាំទ្រ និងរួមចំណែកតាមគ្រប់រូបភាព ដើម្បីឱ្យមហាសន្និបាតលើកទី៣៥ ឆ្នាំ២០២៧ នៅលើទឹកដីអង្គរ ខេត្តសៀមរាប ក្លាយជាមោទនភាពជាតិ និងជាព្រឹត្តិការណ៍ដ៏ជោគជ័យជាប្រវត្តិសាស្ត្រ៕