(បន្ទាយមានជ័យ)៖ ប្រជាពលរដ្ឋរងគ្រោះដោយសារខ្យល់កន្ត្រាក់ ចំនួន ៥៤គ្រួសារ នៅក្នុងស្រុកអូជ្រៅ ខេត្តបន្ទាយមានជ័យ ត្រូវបាន ទទួលអំណោយមនុស្សធម៌ពីសាខាកាកបាទក្រហមខេត្តបន្ទាយមានជ័យ និងទទួលបានជាសង្ក័សីសម្រាប់ជួសជុលប្រក់ផ្ទះឡើងវិញ នាថ្ងៃទី១៣ ខែឧសភា ឆ្នាំ២០២៦ ក្រោមអធិបតីភាព លោក អ៊ុំ រាត្រី ប្រធានគណៈកម្មាធិការសាខាកាកបាទក្រហមខេត្ត។

លោក អ៊ុំ រាត្រី បាននាំប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានិងលោកជំទាវបណ្ឌិត ពេជ្រ ចន្ទមុនី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជាជានិច្ចកាលសម្តេច និងលោកជំទាវ បណ្ឌិតតែងតែគិតគូរពីសុខទុក្ខ របស់បងប្អូនជានិច្ច មិនថាជិតក្តីឆ្ងាយក្តីក្នុងនាមសាខាកាកបាទក្រហមខេត្ត។

លោក អ៊ុំ រាត្រីបាន ចូលរួមសោកស្តាយទ្រព្យសម្បត្តិផ្ទះសម្បែងរបស់បងប្អូនប្រជាពលរដ្ឋដែលទទួលរងគ្រោះធម្មជាតិដោយខ្យល់កន្រ្តាក់កន្លងមក ដោយផ្ទះខ្លះរបើកដំបូលផ្ទះ ខ្លះទៀតរលំខូចខាតធ្ងន់ ប៉ុន្តែអាជ្ញាធរមូលដ្ឋានបានចុះជួយដោយផ្ទាល់បានជួយជាសង្ក័សីប្រក់ដំបូលទាន់ពេលវេលា សម្រាប់ផ្ទះបងប្អូនរងគ្រោះខ្យល់កន្ត្រាក់ស្រាល។

សូមបញ្ជាក់ថា ពលរដ្ឋរងគ្រោះក្នុងមួយគ្រួសារទទួលបានអង្ក ២៥គីឡូក្រាម, មី២០កញ្ចប់, ទឹកត្រី១យួរ, ទឹកស៊ីអ៉ីវ ១យួរ, សារុងមួយ រួមនឹងថវិកាមួយចំនួន។ ក្នុងនោះលោក អ៊ុំ រាត្រី ក៏បានផ្តល់ស័ង្កសីសរុបមានចំនួនសរុប ៥៣២សន្លឹក ជូនដល់គ្រួសាររងគ្រោះសម្រាប់ជួសជុលផ្ទះសម្បែងផងដែរ៕