(ព្រះសីហនុ)៖ កងរាជអាវុធហត្ថខេត្តព្រះសីហនុ នៅថ្ងៃទី១២ ខែឧសភា ឆ្នាំ២០២៦ បានបញ្ជូនជនសង្ស័យចំនួន០៣នាក់ ទៅកាន់សាលាដំបូងខេត្តព្រះសីហនុ ពាក់ព័ន្ធករណីឆបោកតាមប្រព័ន្ធបច្ចេកវិទ្យា (Scam Online)។

ប្រតិបត្តិការបង្ក្រាបបទល្មើស Scam Online នេះបានធ្វើឡើងក្រោមបទបញ្ជាដ៏ម៉ឺងម៉ាត់របស់នាយឧត្តមសេនីយ៌ សៅ សុខា អគ្គមេបញ្ជាការរងកងយោធពលខេមភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស, លោក ម៉ាង ស៊ីណេត ប្រធានគណៈបញ្ជាការឯកភាពខេត្ត និងលោកឧត្តមសេនីយ៌ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ក្រោមការសម្របសម្រួលនីតិវិធីដោយលោក កង ធីរ៉េម ព្រះរាជអាជ្ញារងនៃអយ្យការ អមសាលាដំបូងខេត្ត។

ក្រោយទទួលបញ្ជារប​ស់ថ្នាក់ដឹកនាំ, កាលពីថ្ងៃទី២៦ ខែមេសា ឆ្នាំ២០២៦ កម្លាំងជំនាញមន្ទីរស្រាវជ្រាវព័ត៌មានសន្តិសុខដឹកនាំដោយលោកវរសេនីយ៍ឯក សុង កុសល បានចុះប្រតិបត្តិការត្រួតពិនិត្យឆែកឆេរ នៅទីតាំងផ្ទះល្វែង១កន្លែង ស្ថិតនៅក្រុមទី១៧ ភូមិ៥ សង្កាត់៤ ក្រុងខេត្តព្រះសីហនុ រកឃើញជនសង្ស័យជាជនជាតិខ្មែរចំនួន៩នាក់។

ក្នុងនោះវត្ថុតាងដែលដកហូតរួមមាន៖ ទូរសព្ទដៃ សំរាប់ធ្វើប្រតិបត្តិការឆបោកចំនួន៣៣គ្រឿង, កុំព្យូទ័រលើតុចំនួន០១គ្រឿង, កំព្យូទ័រយួរដៃ០២គ្រឿង, ទូរសព្ទផ្ទាល់ខ្លួនជនសង្ស័យចំនួន១០គ្រឿង, ម៉ូតូចំនួន០៤គ្រឿង។

បន្ទាប់មកកម្លាំងអាវុធហត្ថបន្តស្រាវជ្រាវរហូតដល់ថ្ងៃទី១ ខែឧសភា ឆ្នាំ២០២៦ កម្លាំងបានស្វែងរកជនសង្ស័យដែលជាមេក្លោងជាជនជាតិចិន២នាក់ និងស្ត្រីខ្មែរម្នាក់ទៀត ដែលពាក់ព័ន្ធនិងការចាត់ចែងរៀបចំ និងផ្តល់ប្រាក់ដល់ក្រុមជនជាតិខ្មែរ៩នាក់ខាងលើ។

ក្រោយពីបានធ្វើការសាកសួរ និងស្តាប់ចម្លើយជនជាតិខ្មែរទាំង៩នាក់ ពួកគេសុទ្ធតែបានចាញ់បោកមេខ្យល់នាំមកធ្វើការនៅទីតាំងខាងលើ ដោយមេខ្យល់ជនជាតិចិនសន្យាផ្តល់ប្រាក់ខែ៤០០ដុល្លារ ដោយគ្រាន់តែបង្កើតគណនី ក្លែងក្លាយស្វែងរកមិត្តតែប៉ុណ្ណោះ។ ក្រោមហេតុផល ពួកគេជាជនរងគ្រោះចាញ់ឆបោកពីជនជាតិចិន ទើបតំណាងអយ្យការសម្រេចឲ្យធ្វើកិច្ចសន្យាអប់រំណែនាំ វិលត្រទ្បប់ទៅលំនៅដ្ឋានវិញ។

រីឯជនសង្ស័យចំនួន៣នាក់ រួមមាន៖

*ទី១៖ ឈ្មោះ YANG HONG PENG អាយុ៣៧ឆ្នាំ ជនជាតិចិន មុខរបរបើកម៉ាត ស្រុកកំណើត ខេត្តហ្វូជៀន ប្រទេសចិន
*ទី២៖ ឈ្មោះ PENG YAOWEI ភេទប្រុស អាយុ២៤ឆ្នាំ ជនជាតិចិន មុខរបរមិនពិតប្រាកដ ស្រុកកំណើតនៅខេត្តយូណាន ប្រទេសចិន
*ទី៣៖ ឈ្មោះ សៀក លាវ ភេទស្រី អាយុ២៦ឆ្នាំ ជនជាតិខ្មែរ មុខរបរបុគ្គលិកផ្សារទំនើប ស្រុកកំណើត ភូមិទ្វីខាងត្បូង សង្កាត់អណ្តូងខ្មែរ ក្រុងកំពត ខេត្តកំពត។

ក្នុងករណីនេះពាក់ព័ន្ធឆបោកតាមប្រព័ន្ធបច្ចេកវិទ្យា កម្លាំងសមត្ថកិច្ចជំនាញកសាងសំណុំរឿងបញ្ចូនទៅកាន់សាលាដំបូងខេត្ត ចាត់ការតាមនិតិវិធី។

អភិបាលខេត្តព្រះសីហនុ តែងតែក្រើនរំលឹកដល់បងប្អូនប្រជាពលរដ្ឋខ្មែរ កុំជឿលុងតាមការអូសទាញពីឧក្រិដ្ឋជនរកការងារឲ្យធ្វើ ការឆបោកតាមប្រព័ន្ធបច្ចេកវិទ្យា ដែលអាចប្រឈមទោសទណ្ឌ។ «សូមរួមគ្នាបោសសម្អាតការឆបោកតាមប្រព័ន្ធព័ត៌មានវិទ្យាចេញពីផ្ទះយើង»។ នេះជាការទទូចជាញឹកញាប់របស់អភិបាលខេត្តព្រះសីហនុ៕