(កំពង់ស្ពឺ)៖ ក្រោមការចង្អុលបង្ហាញតម្រង់ទិស ប្រកបដោយគុណធ៌មរបស់នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ព្រមទាំងមានការណែនាំដោយផ្ទាល់ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ នៅថ្ងៃទី១៣ ខែឧសភា ឆ្នាំ២០២៦​​ លោកឧត្តមសេនីយ៍ ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ​ ក្នុងស្មារតីមនុស្សធម៌ ជួយគ្នាក្នុងគ្រាលំបាក​​​ បានបន្តអញ្ជើញដឹកនាំក្រុមការងារ កងរាជអាវុធហត្ថ ខេត្តកំពង់ស្ពឺ និងក្រុមការងារសហភាពសហព័ន្ធយុវជនកម្ពុជា ខេត្តកំពង់ស្ពឺ ព្រមទាំងក្រុមស្ម័គ្រចិត្តមកពីកាកបាទក្រហម ខេត្តកំពង់ស្ពឺ និងមានការចូលរួម ពីសំណាក់ប្រធាន គណៈបញ្ជាការឯកភាពក្រុងឧដុង្គម៉ែជ័យ ​ចូលរួម​ថែមទៀត​ផង​ ចុះ​សួរ​សុខទុក្ខ​ប្រជាពលរដ្ឋដែលមានជីវភាពខ្វះខាត ជួបការលំបាកចំនួន២គ្រួសារ។

គ្រួសារទី១៖ មានឈ្មោះ លន់ ផុន ស្រី អាយុ៨៣ឆ្នាំ រស់នៅភូមិវិហារខ្ពស់ សង្កាត់វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ​ និងគ្រួសារទី២៖ ប្ដីឈ្មោះ រីន វ៉ាន់ដា អាយុ៣៥ឆ្នាំ ប្រពន្ធឈ្មោះ ហ៊ន សៅឡេង អាយុ៣១ឆ្នាំ មានកូន២នាក់ កូនស្រីទី ១ឈ្មោះ វ៉ាន់ដា លីហ្សា អាយុ៦ឆ្នាំ និងកូនស្រីទី២ ឈ្មោះ វ៉ាន់ដា បេឡា អាយុ៣ឆ្នាំ​ បច្ចុប្បន្ន​រស់នៅក្នុងភូមិធ្លាចាស់ សង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ។

ស្ថិតក្នុងពេលនោះដែរ​ លោកឧត្តមសេនីយត្រី ម៉េង ស្រ៊ុន​​ បានសំណេះសំណាល​ សម្តែងនូវក្តីអាណិតអាសូរ និង​ជាពិសេស​បានឧបត្ថម្ភក្នុងមួយគ្រួសារ ទទួលបានថវិកា ចំនួន៣០០,០០០រៀល និងសម្ភារៈគ្រឿងឧបភោគបរិភោគមួយចំនួន មានដូចជា (អង្ករ, ទឹកក្រូច, ទឹកបរិសុទ្ធ, ទឹកត្រី, ទឹកស៊ីអ៊ីវ, ត្រីខ ដែលសរុបជាថវិកាអស់ចំនួន៩៤៨,០០០រៀលបន្ថែមទៀតផង។

គួររំលឹកផងដែរថា លោកឧត្តមសេនីយត្រី ម៉េង ស្រ៊ុន មេបញ្ជាការ​​​​ តែងតែបរិច្ចាកនូវថវិការផ្ទាល់ខ្លួន និងធ្វើការចែករំលែកស្បៀងអាហារ សម្លៀកបំពាក់ ធ្វើទីជម្រកសម្រម និងសម្ភារៈប្រើប្រាស់ចាំបាច់ផ្សេងៗ ដល់បងប្អូនប្រជាពលរដ្ឋគ្រួសារណា ដែលមានជីវភាពខ្វះខាត និងជួបការលំបាកខ្លាំង ក្នុងជីវភាពរស់នៅប្រចាំថ្ងៃ ក្នុងមូលដ្ឋានខេត្តកំពង់ស្ពឺ​ និងក្នុងមូលដ្ឋានតាមបញ្តាខេត្តផ្សេងៗទៀតផង។

ដោយក្នុងសកម្មភាពមនុស្សធម៌ដ៏ឧត្តុង្គឧត្តម បានបង្ហាញពីក្តីមេត្តាករុណា និងសាមគ្គីភាពក្នុងសង្គម ពិសេសបានបណ្តុះស្មារតីសាមគ្គីភាព និងសេចក្តីស្រឡាញ់រវាងមនុស្សជាតិ ថែមទៀតផង៕