(សៀមរាប)៖ លោក ឈិន រតនា ជំនួយការក្រសួងធនធានទឹក និងឧតុនិយម បានលើកឡើងថា ស្ថានីយកសិឧតុនិយមស្វ័យប្រវត្តិ ដែលបាននិងកំពុងដាក់ដំណើរការនៅខេត្តចំនួន៤ មានសមត្ថភាពទទួលទិន្នន័យធាតុអាកាស សម្រាប់ព្យាករអាកាសធាតុប្រចាំថ្ងៃច្បាស់លាស់ ដើម្បីកសិករងាយស្រួលក្នុងការរៀបចំផែនការដាំដុះដំណាំ​ ដែលធ្វើឱ្យការដាំដុះទទួលបានទិន្នន័យខ្ពស់។

​លោក ឈិន រតនា បានឱ្យដឹងថា ស្ថានីយឧតុនិយម បានវាស់វែងប៉ារ៉ាម៉ែត្រមួយចំនួន ដែលទាក់ទងទៅនឹងបរិយាកាសរួមមាន៖ សីតុណ្ហភាព កម្រិតទឹកភ្លៀង សម្ពាធបរិយាកាស ល្បឿនខ្យល់ សំណើមដី និងរំហួតបរិយាកាសជាដើម។ ទិន្នន័យទាំងនេះ វាអាចស្វ័យប្រវត្តិ ដោយមិនត្រូវការមនុស្សមកវាស់នោះទេ ដែលអាចប្រមូលស្វ័យទិន្នន័យជាប្រចាំរៀងរាល់១៥នាទីម្ដង ហើយទិន្នន័យត្រូវបានបញ្ចូល និងបញ្ជូនទៅនាយកដ្ឋានឧតុនិយម ដែលមាន Sover មួយចាំទទួលទិន្នន័យ។ ហើយទិន្នន័យទាំងនេះ និងត្រូវបានរក្សាទុកសម្រាប់ផ្សាព្វផ្សាយព័ត៌មានទៅដល់សាធារជន និងកសិករ ដែលត្រូវការព័ត៌មានទាក់ទងទៅនឹងឧតុនិយមផងដែរ។

លោក ឈិន រតនា បានបន្ដថា តាមរយៈទិន្នន័យទាំងនេះ សម្រាប់កសិករនឹងដឹងពី ពេលណាភ្លៀង សីតុណ្ហភាពក្ដៅ ឬត្រជាក់ សំណើមតិចឬខ្ពស់ ព្រោះព័ត៌មានទាំងនេះ ពិតជាសំខាន់ណាស់សម្រាប់កសិករ​ ដើម្បីរៀបចំផែនការសម្រាប់ដាំដុះ​។ ជាទូទៅទិន្នន័យនេះ ត្រូវបានរក្សាទុកនៅនាយកដ្ឋាន ហើយប្រសិនបើកសិករត្រូវការព័ត៌មាន ក៏អាចស្នើសុំបានផងដែរ។ ​

លោកបានបន្តទៀតថា បច្ចុប្បន្ននេះ ដោយមានការសហការជាមួយ FAO ​បានអភិវឌ្ឍរួមគ្នា ​ក្នុងនោះក្រសួងធនធានទឹក និងក្រសួងកសិកម្ម បានអភិវឌ្ឍប្រព័ន្ធព័ត៌មានផ្ដល់កសិឧតុនិយម ហើយទិន្នន័យទាំងនេះ និងបញ្ជូន​ទៅចំការអ៊ែប ដែលទទួលខុសត្រូវក្នុងការយកព័ត៌មានទៅផ្សព្វផ្សាយបន្ដ ដើម្បីភា្ជប់ជាមួយ App បន្ថែមទៀត។

បន្ថែមពីនេះ លោក ឈិន រតនា ក៏បានបញ្ជាក់ថា តាមរយៈផែនការរបស់គម្រោង ​នឹងផ្សព្វផ្សាយទៅកាន់ប្រជាជនយ៉ាងតិច៤០ម៉ឺននាក់​ ហើយគម្រោងនឹង​មានការបណ្តុះបណ្តាលជាប្រចាំដល់កសិករ ក្នុងការប្រើប្រាស់ប្រព័ន្ធទិន្នន័យ និងដើម្បីត្រៀមបង្ការទៅលើបាតុភូតអាកាសធាតុផ្សេងៗផងដែរ៕

សូមស្ដាប់ការលើកឡើងរបស់ លោក ឈិន រតនា ដូចខាងក្រោម៖