(ភ្នំពេញ)៖ លោក សោម ចិន សមាជិករដ្ឋសភា និងជាអ្នកតំណាងរាស្ត្រមណ្ឌលខេត្តកំពត បានកោតសរសើរគំរូវីរភាពរបស់សម្ដេចធិបតី ហ៊ុន ម៉ាណែត នាយករដ្ឋមន្រ្តី និងសម្ដេចរដ្ឋសភាធិបតី ឃួន សុដារី ប្រធានរដ្ឋសភា ដែលបានធ្វើសកម្មភាពឆ្លើយតបនឹងការឈ្លានពានរបស់ថៃ ដោយតម្កល់ផលប្រយោជន៍ជាតិ និងប្រជាជនជាតិជាធំ។

នេះជាការថ្លែងរបស់លោកតា សោម ចិន នៅក្នុងរដ្ឋសភាលើការពិភាក្សា និងអនុម័តជាផ្លូវការនូវសេចក្តីព្រាងច្បាប់ស្តីពី «កាតព្វកិច្ចយោធា» កាលពីថ្ងៃទី១២ ខែឧសភា ឆ្នាំ២០២៦។

សម្រាប់សម្តេចធិបតី ហ៊ុន ម៉ាណែត, លោក សោម ចិន បានសម្តែងការអាណិតចំពោះការខំប្រឹងប្រែង និងគិតគូដឹកនាំប្រទេសរហូតសក់ប្រែពណ៌សទៅហើយ។ សម្តេចធិបតីនាយករដ្ឋមន្រ្តី ធ្លាប់បានលើកឡើងថា នៅពេលដោះស្រាយបញ្ហាព្រំដែនចប់ សម្តេចនឹងលាបសក់ពណ៌ខ្មៅវិញឲ្យដូចសម្តេចពុក ហ៊ុន សែន។

លោក សោម ចិន បច្ចុប្បន្នជាអនុប្រធានគណៈកម្មការទី៨ នៃរដ្ឋសភា (គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី)។ ជាឪពុករបស់លោក សោម ពិសិដ្ឋ អភិបាលខេត្តកែប, លោក សោម ចិន គឺជាឥស្សរជននយោបាយ និងជាមន្ត្រីជាន់ខ្ពស់មួយរូបរបស់កម្ពុជា។

បទពិសោធន៍ការងារ លោកជាអតីតអភិបាលខេត្តកំពត និងបានចូលរួមយ៉ាងសកម្មក្នុងសកម្មភាពនយោបាយ ការពារជាតិ និងកិច្ចការសង្គមជាច្រើន ជាពិសេសចាប់តាំងពីប្រទេសជាតិនៅក្នុងដំណាក់កាលសង្គ្រាម រហូតទទួលសន្តិភាពពេញលេញក្រោមការដឹកនាំរបស់សម្តេចតេជោ ហ៊ុន សែន៕