(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា ទោះបីជាមានសង្ឃឹម១ភាគរយ នៃការចរចាដោះស្រាយដោយសន្តិវិធី ក៏យើងនៅតែធ្វើដែរ ដែលនេះជាជម្រើសប្រសើរជាងច្បាំងគ្នា ដែលបណ្តាលឱ្យប្រជាជនរងគ្រោះកាន់តែច្រើនឡើង។

សម្តេចមហាបវរធិបតី ហ៊ុន ម៉ាណែត បានថ្លែងដូចនេះនៅព្រឹកថ្ងៃទី១៥ ខែឧសភា ឆ្នាំ២០២៦នេះ នាឱកាសដែលសម្តេចអញ្ជើញជាអធិបតីភាពក្នុងពិធីអបអរសាទរទិវាអតីតយុទ្ធជន និងនិវត្តជនកម្ពុជា លើកទី១៩ ថ្ងៃទី១២ ខែឧសភា។

សម្តេចបានបញ្ជាក់ដូច្នេះថា៖ «សង្គ្រាមខ្មែរឆ្អែតឆ្អន់ហើយ យើងព្យាយាមគេច យើងព្យាយាមដោះស្រាយដោយមិនចាំបាច់ចំណាយជីវិតប្រជាជន ​នៅក្នុងបុព្វហេតុការពារទឹកដី មិនមែនបានន័យថា យើងដោះស្រាយដោយមិនច្បាំងគ្នាយើងប្រគល់ដីឱ្យគេលត់ជង្គង់ស៊ីញ៉េ​កាត់នោះទេ គឺត្រូវដោះស្រាយតាមផ្លូវច្បាប់ ដោះស្រាយតាមយន្តការការទូត ឱ្យអស់លទ្ធភាព។ ទោះបីជានៅមានសង្ឃឹម ទ្វារមិនទាន់បិទទាំងស្រុង នៅបើកតែ១ភាគរយ ក្នុងការចូលទៅដោះស្រាយដោយសន្តិវិធី គឺយើងត្រូវតែប្រើវាឱ្យអស់លទ្ធភាព ជាជាងច្បាំងគ្នា»។​

សម្តេចបានលើកឡើងថា មានបណ្ឌិតមួយនៅក្រៅប្រទេសមិនយល់ អំពីន័យរបស់សម្តេច ដែលមានបំណងចង់ដោះស្រាយបញ្ហាដោយសន្តិវិធី ដោយខ្លួនគេមានការភាន់ច្រឡំថា សម្តេចនិយាយថា សង្ឃឹមជោគជ័យតែ១ភាគរយទៅវិញ។ សម្តេចបានហៅបណ្ឌិតទាំងនោះថា ជាបណ្ឌិតស៊ីអារម្មណ៍។ សម្តេចបានពន្យល់ថា​ ប្រសាសន៍របស់សម្តេចគឺចង់សំដៅថា បើការទ្វារចរចានៅសល់ត្រឹម១ភាគរយ នោះយើងនៅតែចរចាដែរ ប៉ុន្តែឥឡូវទ្វារចរចាទ្វេភាគីពេលនេះបានបិទ នោះមានតែការប្រើប្រាស់យន្តការ UNCLOS។

សម្តេចបានបន្ថែមថា អញ្ចឹងមានន័យថា ទ្វារទ្វេភាគីហ្នឹងវាបិទហើយ ដែលយើងត្រូវទៅអនុវត្តតាមផ្លូវច្បាប់ ទៅការសម្របសម្រួលដោយចាប់បង្ខំ ដើម្បីដោះស្រាយតាមតម្លាភាព និងយុត្តិធម៌ ឱ្យស្មើភាពគ្នា នៅមុខច្បាប់ នេះជាជំហរបស់រដ្ឋាភិបាល។ បើថៃមិនទាន់លុប MoU 2001 យើងនៅតែដោះស្រាយតាមផ្លូវចរចា ប៉ុន្តែពេលនេះ គឺបិទហើយ។ នៅព្រំដែនគោក នៅមាន MoU 2000 ដែលយើងនៅតែបន្តអនុវត្ត៕