(ភ្នំពេញ)៖ គិតត្រឹមថ្ងៃទី១៥ ខែឧសភា ឆ្នាំ២០២៦ សាសនិកឥស្លាមកម្ពុជា ចំនួន៨៣០នាក់ បានធ្វើដំណើរចាកចេញពីអាកាសយានដ្ឋានអន្តរជាតិតេជោ ទៅកាន់ប្រទេសអារ៉ាប៊ីសាអូឌីត ដើម្បីធ្វើបុណ្យធម្មយាត្រាហាជ្ជ ខណៈនៅសល់ចំនួន៣៨០នាក់ទៀត នឹងបន្តចេញដំណើរជាបន្តបន្ទាប់ ដោយអ្នកចំណាយថវិកាផ្ទាល់ខ្លួនត្រូវចេញដំណើរចាប់ពីថ្ងៃ១០ រហូតដល់ថ្ងៃទី១៧ ខែឧសភា ឆ្នាំ២០២៦ ហើយអ្នកដែលទទួលបានព្រះរាជទានពីព្រះមហាត្សត្រអារ៉ាប៊ីសាអូឌីត ទាំង១០នាក់ នឹងត្រូវចេញដំណើថ្ងៃទី១៨ ខែឧសភា ឆ្នាំ២០២៦។

ក្នុងឱកាសអញ្ជើញសំណេះសំណាល និងជូនដំណើរសាសនិកឥស្លាមកម្ពុជា ចំនួន១៥៩នាក់ នាល្ងាចថ្ងៃទី១៥ ខែឧសភា ឆ្នាំ២០២៦ នៅឯអាកាសយានដ្ឋានអន្តរជាតិតេជោ លោកបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បានឲ្យដឹងថា កាលពីឆ្នាំ២០១៦ កម្ពុជាធ្លាប់ទទួលបានកូតាអ្នកទៅធ្វើធម្មយាត្រាហាជ្ជី ត្រឹម៦០០នាក់ប៉ុណ្ណោះ។ ប៉ុន្តែដោយសារកំណើនសាសនិកឥស្លាម ដែលមានបំណងទៅបំពេញកាតព្វកិច្ចហាជ្ជីកាន់តែមានការកើនឡើង សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា បានចាត់តាំងលោកបណ្ឌិត អូស្មាន ហាស្សាន់ ធ្វើការសម្របសម្រួលជាមួយ រដ្ឋមន្រ្តីហាជ្ជី និងអ៊ុំរ៉ោះអារ៉ាប៊ីសាអូឌីត ដើម្បីស្នើសុំបង្កើនចំនួនកូតាចន្លោះពី១២០០-១៥០០នាក់។ ជាលទ្ធផល ភាគីអារ៉ាប៊ីសាអូឌីតបានអនុគ្រោះ និងអនុញ្ញាតឲ្យកម្ពុជាទទួលបានចំនួនកូតាចំនួន១,២០០នាក់។

លោកទេសរដ្ឋមន្ត្រីបានបន្តថា ដោយមើលឃើញពីកំណើនអ្នកចង់ទៅធ្វើបុណ្យធម្មយាត្រាហាជ្ជី មានការកើនឡើងជាបន្តបន្ទាប់ ជាក់ស្តែងនៅឆ្នាំ២០២៦នេះ មានចំនួនរហូតដល់១,៧០០នាក់ ហើយគ្រោងនឹងធ្វើដំណើរទស្សនកិច្ចការងារ ទៅប្រទេសអារ៉ាប៊ីសាអូឌីត បន្ទាប់ពីបញ្ចប់រដូវកាលហាជ្ជីឆ្នាំនេះ ដើម្បីជួបរដ្ឋមន្ត្រីហាជ្ជី និងអ៊ុំរ៉ោះអារ៉ាប៊ីសាអូឌីត ស្នើសុំចំនួនកូតាបន្ថែម ជូនសាសនិកឥស្លាមបានទៅធ្វើហាជ្ជីនាឆ្នាំក្រោយៗ ឲ្យបានច្រើនបន្ថែមទៀតចន្លោះពី១,៥០០ ទៅ២,០០០នាក់។

លោកបានបន្ថែមថា ដោយសារតែកម្ពុជាមានសុខសន្តិភាព ទើបប្រជាពលរដ្ឋមានសេដ្ឋកិច្ចដំណើរការល្អប្រសើរជាងមុន ដែលអាចមានលទ្ធភាពទៅបំពេញកាតព្វកិច្ចបុណ្យហាជ្ជី ដោយក្នុងម្នាក់ៗ ចំណាយថវិកាចំនួន៦,២០០ដុល្លារសហរដ្ឋអាមេរិក ហើយមានចំនួនអ្នកចុះឈ្មោះសម្រាប់ឆ្នាំក្រោយ គឺមានចំនួនជិតពេញអស់ទៅហើយ។

លោកសូមបួងសួងសុំពីអល់ឡោះជាម្ចាស់ ឲ្យបងប្អូនទាំងអស់គ្នា ធ្វើដំណើរប្រកបដោយសុវត្ថិភាពទាំងទៅទាំងមក ទៅបំពេញកាតព្វកិច្ចឲ្យបានជោគជ័យ ហើយក្នុងនោះដែរ ក៏សូមឲ្យបងប្អូន កូនក្មួយទាំងអស់ ដែលបានធ្វើដំណើរពីបណ្តាខេត្តនានា ដើម្បីជូនដំណើរបងប្អូន សាច់ញតិ សូមឲ្យពេលមក និងត្រឡប់ទៅវិញ ទទួលបាននូវសុខភាពល្អ និងទទួលបាននូវសេចក្ដីសុខគ្រប់ៗគ្នា។ ជាពិសេស សូមអល់ឡោះទទួលយកនូវកាតព្វកិច្ចបុណ្យហាជ្ជីរបស់បងប្អូនយើងទាំងអស់គ្នានៅក្នុងឆ្នាំនេះ ដែលជាការបំពេញកាតព្វកិច្ចរបស់សាសនាឥស្លាម៕