(សៀមរាប)៖ អាយុកាលរាប់រយឆ្នាំ ប្រាសាទបុរាណមួយចំនួន ឬផ្នែកខ្លះបានបាក់បែក និងជួលរលំ ដូច្នេះទាមទារឲ្យមានការថែទាំ និងជួសជុលឡើងវិញ ប៉ុន្ដែត្រូវអនុលោមទៅតាមធម្មនុញ្ញអង្គរដែលបានកំណត់អំពីលក្ខខណ្ឌ នៃការយកថ្មថ្មីដើម្បីជំនួសថ្មចាស់ដែលបានបាក់បែក ខូចគុណភាព ប្រើប្រាស់លែងបានក្នុងការធានាដល់តួប្រាសាទទាំងមូល។

នេះបើតាមការឲ្យដឹងពីលោក សោម សុផារ៉ាត់ ប្រធាននាយកដ្ឋានអភិរក្សប្រាសាទ និងបុរាណវិទ្យា ថ្លែងប្រាប់ក្រុមអ្នកសារព័ត៌មាន ក្នុងដំណើរទស្សនកិច្ចស្ដីពី «បេតិកភណ្ឌ» លើកទី២។

អ្នកជំនាញរូបនេះ បានអះអាងថា មុននឹងយកថ្មថ្មី មកជួសជុលជំនួសថ្មប្រាសាទបុរាណនោះ គឺត្រូវឆ្លងកាត់ការវាយតម្លៃជាមុនសិន ជាពិសេសត្រូវគោរពតាមលក្ខខណ្ឌ ដែលបានកំណត់ក្នុងធម្មនុញ្ញអង្គរ បានន័យថា មន្ត្រីជំនាញត្រូវពិនិត្យលទ្ធភាពប្រើប្រាស់ថ្មបុរាណឲ្យអស់លទ្ធភាពសិន មុននឹងសម្រេចយកថ្មថ្មីមកជំនួស។ បើតាមធម្មនុញ្ញអង្គរ ការយកថ្មថ្មីមកជំនួស មិនឲ្យលើសពី២៥ភាគរយឡើយ។

លោក សោម សុផារ៉ាត់ បានថ្លែងយ៉ាងដូច្នេះថា «រាល់ការជួសជុល គឺត្រូវតែគោរពតាមលក្ខខណ្ឌធម្មនុញ្ញអង្គរ ថ្មថ្មី យើងប្រើប្រាស់នៅក្នុងកម្រិត។ ឧទាហរណ៍ ប្រាសាទមួយរលំ នៅពេលយើងផ្គុំឡើងវិញយើងត្រូវរកថ្មចាស់ឲ្យអស់លទ្ធភាព នៅពេលថ្មចាស់ដែលរកឃើញហើយ ប៉ុន្ដែបាត់ខ្លះដែលយើងត្រូវផ្គុំដើម្បីទ្រទ្រង់ចាស់ដាក់ទៅវិញ។ ចំណុចនេះគឺជាលក្ខខណ្ឌ ដែលគេកំណត់ភាគរយនៃការប្រើប្រាស់ថ្មថ្មី ក្នុងធម្មនុញ្ញអង្គរ»។

បើតាមលោក សោម សុផារ៉ាត់, នៅក្នុងប្រាសាទមានថ្ម៣ប្រភេទ ដើម្បីយកមកធ្វើប្រាសាទ នោះគឺ ថ្ម ថ្មពួក និងថ្មបាយក្រៀម។ នៅពេលអ្នកជួសជុលឃើញថ្មបាក់បែក មិនមានគុណភាពសម្រាប់ទ្រទ្រង់ទម្ងន់ទៅលើវិញទេ អាចជំនួសដោយថ្មថ្មីបាន។ បើថ្មបាក់បែកអ្នកជួលជុលឃើញថា គុណភាពអាចប្រើប្រាស់វិញបាន គឺយកមកតភ្ជាប់គ្នាប្រើប្រាស់ឲ្យអស់លទ្ធភាព ប៉ុន្ដែបើគុណភាពថ្មចាស់អស់ យើងជំនួសដោយថ្មថ្មី។

សូមជម្រាបថា អ្នកសារព័ត៌មានជាតិ និងអន្តរជាតិ មកពីបណ្ដាស្ថាប័នជាង១០អង្គភាព បានធ្វើដំណើរទស្សនកិច្ចស្តីពី «បេតិកភណ្ឌ» រយៈពេល៣យប់ ៤ថ្ងៃ នៅលើទឹកដីអង្គរ។ ក្រុមអ្នកសារព័ត៌មាន បានសិក្សាស្វែងយល់បន្ថែមពីប្រវត្តិសាស្រ្ត វប្បធម៌ អរិយធម៌ ប្រពៃណី និងបេតិកភណ្ឌនៅរមណីយដ្ឋានអង្គរ ជាពិសេសជំរុញដល់ការផ្សព្វផ្សាយទេសចរណ៍វប្បធម៌ ប្រវត្តិសាស្រ្ត និងធម្មជាតិឲ្យកាន់តែទូលំទូលាយថែមទៀត។

ចំពោះការសិក្សាពី «បេតិកភណ្ឌ» លើទឹកដីអង្គរនេះ ក្រុមអ្នកសារព័ត៌មាន បានត្រូវចុះទៅកាន់ទីតាំងមន្ត្រីអាជ្ញាធរជាតិអប្សរា កំពុងអនុវត្ត និងបំពេញការងារផ្ទាល់តែម្ដង៕