(រតនគិរី)៖ នៅព្រឹកថ្ងៃទី១៦ ខែឧសភា ឆ្នាំ២០២៦ នាយឧត្តមសេនីយ៍ ជៀង​ អំ​ សមាជិកគណៈកម្មាធិការកណ្តាល និងជាប្រធានក្រុមការងារបក្សចុះមូលដ្ឋានខេត្តរតនគិរី បានអញ្ជើញជាអធិបតីក្នុងកិច្ចប្រជុំត្រួតពិនិត្យផែនការឆ្ពោះ ទៅកាន់ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៦ ឆ្នាំ២០២៧ ដែលប្រារព្ធធ្វើឡើងនៅទីស្នាក់ការគណបក្សខេត្តរតនគិរី សាលប្រជុំលោកព្រឹទ្ធាចារ្យ ប៊ូ ថង។

កិច្ចប្រជុំនេះមានការអញ្ជើញចូលរួមពីសំណាក់លោក ញ៉ែម សំអឿន ប្រធានគណបក្សខេត្ត សមាជិកគណៈអចិន្ត្រៃយ៍គណៈកម្មាធិការគណបក្សខេត្ត​ សមាជិកគណៈកម្មការធិការគណបក្សខេត្ត​ ប្រធាន និងអនុប្រធានគណៈ កម្មាធិការគណបក្ស​ (ក្រុង​ស្រុក​) ប្រធាន​ និងអនុប្រធានសាខាបក្សមន្ទីរអង្គភាព​ ប្រធានក្រុមការងារគណបក្ស (​ថ្នាក់ខេត្ត​) ចុះមូលដ្ឋានក្រុង​ ស្រុក​ ឃុំ​ សង្កាត់ ប្រធានក្រុមការងារគណបក្ស (​ថ្នាក់​ ក្រុង​ ស្រុក​) ចុះមូលដ្ឋានឃុំ​សង្កាត់​ និងប្រធានគណៈកម្មាធិការគណបក្សឃុំ​ សង្កាត់​ ជាច្រើនរូបផងដែរ។

លោក ញ៉ែម សំអឿន បានថ្លែងថា ក្រោមមាគ៌ាដឹកនាំរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំដ៏ឆ្នើម និងប្រកបដោយគតិបណ្ឌិត និងមានកម្មវិធីនយោបាយត្រឹមត្រូវ បានធ្វើឱ្យគណបក្ស ប្រជាជនកម្ពុជា មានការសាមគ្គីភាព ឯកភាពផ្ទៃក្នុង រឹងមាំ ធ្វើជាមូលដ្ឋានបង្អែកក្នុងការដឹកនាំ កសាង និងអភិវឌ្ឍន៍ខេត្ត ឱ្យមានការរីកចំរើន ឈានឡើង រួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋ។

លោកសូមថ្លែងអំណរគុណនាយឧត្តមសេនីយ៍ ជៀង​ អំ​ លោក លោកស្រី អនុប្រធានក្រុមការងារ គណបក្សចុះមូលដ្ឋានខេត្ត រួមទាំងប្រធាន អនុប្រធាន ក្រុមការងារគណបក្សចុះមូលដ្ឋានក្រុមប្រឹក្សា ឃុំ សង្កាត់ ទាំងអស់ដែលបានចូលរួមយ៉ាងសកម្ម ក្នុងការជួយកសាងហេដ្ឋារចនាសម្ព័ន្ធរូបវន្ត លើគ្រប់វិស័យជួយឧបត្ថម្ភ គាំទ្រ ទាំងថវិកា និង សម្ភារៈដល់បណ្តាមូលដ្ឋាន រួមចំណែកធ្វើឱ្យខេត្តរតនគិរី មានការរីកចំរើនជាបន្តបន្ទាប់ ឥតឈប់ឈរ។

ក្នុងឱកាសនោះនាយឧត្តមសេនីយ៍ ជៀង​ អំ​ បានកោតសសើរចំពោះសមាជិកសមាជិកា សកម្មជន និងអ្នកគាំទ្រគណបក្សប្រជាជនកម្ពុជាខេត្តរតនគិរីទាំងអស់ ដែលបានបោះឆ្នោតជូនគណបក្សប្រជាជនកម្ពុជាកន្លងមក ដើម្បីបុព្វហេតុ កសាង និងអភិវឌ្ឍប្រទេសកម្ពុជាយើងកាន់តែរីកចម្រើនឈានឡើង តទៅថ្ងៃអនាគត និងមានសុខសន្តិភាពពេញលេញបរិបូរណ៍។

នាយឧត្តមសេនីយ៍ ជៀង អំ បានបន្ថែមថា កត្តាដែលនាំឱ្យគណបក្សប្រជាជនកម្ពុជា ទទួលបានជ័យជម្នះ ក្នុងការបោះឆ្នោតកន្លងមកនេះ គឺគណបក្សប្រជាជនកម្ពុជា មានសម្តេចតេជោ ហ៊ុន សែន ជាប្រមុខដឹកនាំដ៏ត្រឹមត្រូវ និងប្រកបដោយគតិបណ្ឌិត មានអង្គការចាត់តាំង រចនាសម្ព័ន្ធគ្រប់គ្រង ដឹកនាំត្រឹមត្រូវ ចាប់តាំងពីថ្នាក់លើ រហូតដល់ថ្នាក់មូលដ្ឋាន មានកម្មវិធី នយោបាយត្រឹមត្រូវ សមស្របទៅនឹងសេចក្តីត្រូវការចាំបាច់របស់ប្រជាពលរដ្ឋ នៅមូលដ្ឋាន ដោយគណបក្សប្រជាជនកម្ពុជាគ្រប់ថ្នាក់មានការសាមគ្គីភាព ឯកភាពផ្ទៃក្នុងរឹងមាំ មន្ត្រីថ្នាក់ដឹកនាំគណបក្សប្រជាជនកម្ពុជាគ្រប់រូបខិតខំយកចិត្តទុកដាក់បំពេញ ការងារតាមតួនាទី ភារកិច្ច ធ្វើអំពើល្អ ជូនគណបក្ស ក៏ដូចជាប្រជាជន និងប្រទេសជាតិ។

ក្នុងឱកាសនោះនាយឧត្តមសេនីយ៍ ជៀង​ អំ​ ក៏បានជំរុញបងប្អូនសមាជិកសមាជិការបក្ស ចូលរួមសហការជាមួយសមត្ថកិច្ច អនុវត្តគោលនយោបាយភូមិឃុំមានសុវត្ថិភាពទាំង៧ចំណុច ពិសេសបញ្ហាល្បែងស៊ីសង និងចូលរួមគោរពច្បាប់ចរាចរណ៍ផ្លូវគោកទាំងអស់គ្នា។

សូមបញ្ជាក់ថា ក្នុងឱកាសនេះក៏មានការសម្រេចចាត់តាំងលោក ខាំ ខឿន ជាអនុប្រធានក្រុមការងារចុះមូលដ្ឋានខេត្ត និងលោក ម៉ៅ សារី ជាសមាជិកក្រុមការងារគណបក្សចុះមូលដ្ឋានខេត្តរតនគិរីផងដែរ៕