(កំពត)៖ ក្នុងរដូវកាលប្រមូលផលទុរេនទឹកឈូនេះ ដើម្បីបង្កើនភាពជឿជាក់របស់បងប្អូនភ្ញៀវជាតិ និងអន្តរជាតិដែលទៅកម្សាន្ត និងបានទិញទុរេនទឹកឈូយកទៅពិសារ លោក អ៉ឹម ច័ន្ទសោធន អភិបាលស្រុកទឹកឈូ បានដាក់លេខទូរសព្ទ ឲ្យរាយការណ៍ករណីសង្ស័យមានការនាំចូលទុរេនពីបរទេសដោយខុសច្បាប់។

ទន្ទឹមនឹងដាក់លេខទូរសព្ទ លោកបានណែនាំ និងចាត់ឲ្យអាជ្ញាធរភូមិ ឃុំ ប៉ុស្តិ៍នគរបាលរដ្ឋបាល បន្តផ្សព្វផ្សាយឲ្យបានទូលំទូលាយដល់បងប្អូនប្រជាពលរដ្ឋ ជាពិសេសអាជីវករលក់ទុរេនឲ្យមានសុចរិតភាព ទាក់ទងជាមួយប្រភពដើមនៃទុរេន។ ករណីមានបាតុភាព មិនប្រក្រតីណាមួយកើតឡើង ឬមានការនាំចូលទុរេនពីបរទេសដោយខុសច្បាប់ក្នុងមូលដ្ឋានស្រុក ត្រូវចាត់វិធានចំពោះអ្នកលក់ដូរ ឬអាជីវករណាដែលមានភាពទុច្ចរិតមិនស្មោះត្រង់។

លោកអភិបាលស្រុកទឹកឈូ បានបញ្ជាក់ថា «ប្រសិនបើមានករណីដូចខាងលើនេះ សូមរាយការណ៍មកកាន់ពួកយើងដែលមានលេខ 012 42 43 89 (តេលេក្រាម)។ ឆ្លៀតឱកាសនេះ សូមអញ្ជើញបងប្អូនភ្ញៀវជាតិ និងអន្តរជាតិ មកលេងកម្សាន្ត ព្រមទាំងអំពាវនាវឲ្យជួយគាំទ្រផលិតផលរបស់ខ្មែរ ជាពិសេសរដូវទុរេនទុំ នាពេលនេះ និងបន្តភោគផលផ្សេងៗដែលមានមង្ឃុត សាវម៉ៅ ដែលកំពុងរៀបនឹងប្រមូលផលនាពេលឆាប់ៗនេះផងដែរ»។

លោកអភិបាលស្រុក ក៏បានឲ្យដឹងថា សម្រាប់ស្រុកទឹកឈូ បើសិនមានការទិញទុរេនក្នុងស្រុកនេះ ហើយមានបញ្ហានោះ សូមរាយការណ៍ទៅលេខខាងលើ ដើម្បីមន្ត្រីចុះចាត់វិធានការជាមួយអ្នកលក់៕