(ព្រៃវែង)៖ លោក ម៉ុក វណ្ណា ប្រធានក្រុមការងារគណបក្សចុះមូលដ្ឋានឃុំសំរោង ស្រុកស្វាយអន្ទរ ខេត្តព្រៃវែងបានថ្លែងជំរុញដល់សមាជិក-សមាជិកាគណបក្ស ត្រូវខិតខំបម្រើប្រជាពលរដ្ឋឱ្យបានទ្វេដង ដើម្បីឱ្យប្រជាពលរដ្ឋ បន្តបោះឆ្នោតឱ្យគណបក្សប្រជាជនកម្ពុជាយកជ័យជំនៈនៅក្នុងការបោះឆ្នោតឆ្នាំ២០២៧-២០២៨បន្តទៀត។

លោក ម៉ុក វណ្ណា ជំរុញបែបនេះ ក្នុងពេលដែលលោកបានដឹកនាំក្រុមការងារបានចុះសាកសួរសុខទុក្ខប្រធានក្រុមបក្ស សមាជិក សមាជិកា ចំនួន ១១៧ នាក់ ស្រី ៧៦ នាក់នៅភូមិព្រៃឈើទាល ឃុំសំរោង នាព្រឹកថ្ងៃទី១៧ខែឧសភាឆ្នាំ២០២៦។

ពិធីសំណេះសំណាលនេះមានការចូលរួមពីលោក បណ្ឌិត ឃួន សុវណ្ណ អនុប្រធានក្រុមការងារចុះជួយឃុំសំរោង ព្រមទាំងលោក អនុប្រធានក្រុមការងារចុះជួយឃុំ និងក្រុមការងារជាច្រើនរូបទៀតផងដែរ។

លោក ម៉ុក វណ្ណា បានបន្តថា នៅគ្រប់ការបោះឆ្នោត ពោលគឺទាំងការបោះឆ្នោតក្រុមប្រឹក្សា ឃុំ សង្កាត់ ការបោះឆ្នោតតំណាងរាស្រ្ត ការបោះឆ្នោតក្រុមប្រឹក្សាខណ្ឌ ក្រុមប្រឹក្សារាជធានី គណបក្សប្រជាជនកម្ពុជា តែងទទួលបាននូវជោគជ័យយ៉ាងភ្លុកទឹកភ្លុកដី ជាប្រវត្តិសាស្ត្រ។

ដើម្បីតបស្នងដល់ពលរដ្ឋដែលជា ម្ចាស់ឆ្នោត លោក ម៉ុក វណ្ណា បានណែនាំឱ្យសមាជិក-សមាជិកា គណៈកម្មាធិការគណបក្សឃុំសំរោងទាំងអស់ត្រូវខិតខំបម្រើប្រជាពលរដ្ឋឱ្យបានទ្វេដង ដើម្បីឱ្យប្រជាពលរដ្ឋ កាន់តែមានជំនឿជឿជាក់មកលើការដឹកនាំ របស់សម្តេចធិបតី ហ៊ុន ម៉ាណែត នាយកដ្ឋមន្ត្រី ដើម្បីបន្តបោះឆ្នោតឱ្យគណបក្សប្រជាជនកម្ពុជាយកជ័យជំនះនៅក្នុងការបោះឆ្នោតនាឆ្នាំ២០២៧-២០២៨បន្តទៀត ដែលនឹងនាំឱ្យកម្ពុជាឆ្ពោះទៅរកការរីកចម្រើន យ៉ាងពិតប្រាកដ នៅឆ្នាំ២០៥០ក្លាយជាប្រទេសអ្នកមាន ដូចអរិយប្រទេស ស្របទៅតាមបំណងប្រាថ្នាចង់បានរបស់ប្រជាពលរដ្ឋ។

ក្នុងឱកាសនោះដែរ លោកម៉ុក វណ្ណា បានថ្លែងនូវការ កោតសរសើ និងវាយតម្លៃខ្ពស់ ចំពោះលទ្ធផលស្នាដៃរបស់គណៈកម្មាធិការគណបក្សឃុំសំរោងដែលបានចូលរួមចំណែក ធ្វើឱ្យគណបក្សទទួលបាននូវជ័យជម្នះ ក្នុងការបោះឆ្នោតជាបន្តបន្ទាប់នាពេលកន្លងមក រហូតធ្វើឱ្យគណបក្សប្រជាជនកម្ពុជា ទទួលបាននូវជោគជ័យ។

លោកបានគូសបញ្ជាក់ថា ការជួបជុំគ្នានេះ គឺដើម្បីពិភាក្សា ពិគ្រោះយោបល់ រកចំណុចខ្លាំង ចំណុចខ្សោយ ធ្វើយ៉ាងណា ឱ្យគណបក្សប្រជាជនកម្ពុជា សម្រេចបានមហិច្ចតារបស់គណបក្ស គឺដឹកនាំប្រទេសជារៀងរហូត។

លោក ម៉ុក វណ្ណា ស្នើឱ្យមន្ត្រីរបស់យើងបន្តការផ្តល់សេវាជូនប្រជាពលរដ្ឋឱ្យកាន់តែល្អថែមទៀត និងត្រូវសាមគ្គីផ្ទៃក្នុងឱ្យបានកាន់តែល្អនិងរឹងមាំ ដោយគិតផលប្រយោជន៍បក្សជារឿងសំខាន់៕