(សៀមរាប)៖ ក្នុងកម្មវិធីសម្ពោធសៀវភៅ «អង្គរក្នុងការចងចាំ» លោក យិត ចាន់ដារដ្ឋ អគ្គនាយករង នៃអាជ្ញាធរជាតិអប្សរា បានលើកទឹកចិត្តអ្នកនិពន្ធចងក្រងសៀវភៅ ទាក់ទងពីរមណីយដ្ឋានអង្គរ ទាំងភាសាជាតិ និងភាសាបរទេសឲ្យបានទូលំទូលាយ។

លោក យិត ចាន់ដារដ្ឋ បានគូសបញ្ជាក់ថា សៀវភៅប្រៀបដូចជាឃ្លាំងចំណេះ ជាពិសេសជាឯកសារដ៏សំខាន់សម្រាប់អ្នកជំនាន់ក្រោយ ដោយលោកគិតថារាល់ការចងក្រង និងឯកសារនានា គឺសំខាន់ដោយសារសៀវភៅ ជាអង្គចងចាំនៃបណ្ដុំបញ្ញារបស់មនុស្សដែលបានចងក្រងកត់ត្រានៅទិដ្ឋភាពជាក់ស្ដែង។

លោកបានយល់ឃើញថា សៀវភៅ «អង្គរក្នុងការចងចាំ» នឹងផ្ដល់នូវចំណេះដឹងថ្មីៗបន្ថែមទៀត ដល់អ្នកជំនាន់ក្រោយ ខណៈសៀវភៅនេះមានអត្ថប​្រយោជន៍ជាច្រើនដែលបានបង្កប់ក្នុងនោះ។

សៀវភៅ «អង្គរក្នុងការចងចាំ» ត្រូវបានសម្ពោធជាផ្លូវការហើយ នៅថ្ងៃទី១៣ ឧសភា នៅសួនរុក្ខជាតិអង្គរ លើទឹកដីសៀមរាប។ «អង្គរក្នុងការចងចាំ» គឺជាវណ្ណកម្មថ្មីមួយទៀត ដែលបានសម្រិតសម្រាំងចងក្រងឡើង ដើម្បីបង្ហាញពីរឿងរ៉ាវមួយចំនួន ជុំវិញតំបន់អង្គរលើសពីប្រាសាទ។

សៀវភៅកម្រាស់៣០០ទំព័រមួយនេះ នឹងបង្ហាញមិត្តអ្នកអានអំពីប្រវត្តិរឿងរ៉ាវ និងភាពប្រទាក់ក្រឡាគ្នារវាងអង្គរ និងមនុស្សគ្រប់រូប ជាពិសេសមនោសញ្ចេតនារបស់ក្រុមអ្នកជំនាញបរទេស និងខ្មែរចំពោះអង្គរ។ សម្រាប់ការបោះពុម្ពផ្សាយលើកដំបូងនេះ ក្រុមការងារសារព័ត៌មានឌីជីថលថ្មីៗ នឹងបោះពុម្ពផ្សាយចំនួន៥០០០ក្បាល៕