(តាកែវ)៖ នៅព្រឹកថ្ងៃអាទិត្យ ទី១៧ ខែឧសភា ឆ្នាំ២០២៦ ក្រុមការងារគណបក្សប្រជាជនកម្ពុជាចុះមូលដ្ឋានឃុំពត់សរ ស្រុកបាទី ខេត្តតាកែវ បានរៀបចំពិធីក្រុងពាលីបើកការដ្ឋានសាងសង់ទីស្នាក់ការគណបក្សប្រជាជនកម្ពុជាឃុំពត់សរ ក្រោមអធិបតីភាព លោក ចេង ប៉េងហាប់ អនុប្រធានក្រុមការងារគណបក្សចុះមូលដ្ឋានស្រុកបាទី និងជាប្រធានក្រុមការងារគណបក្សចុះមូលដ្ឋានឃុំពត់សរ ស្រុកបាទី ខេត្តតាកែវ ។

ពិធីនេះមានការអញ្ជើញចូលរួមពីលោក លោកជំទាវ លោក-លោកស្រី ជាអនុប្រធាន សមាជិក-សមាជិកាក្រុមការងារគណបក្សចុះមូលដ្ឋានឃុំពត់សរ លោកប្រធានគណៈកម្មាធិការគណបក្សប្រជាជនកម្ពុជាឃុំពត់សរ លោក-លោកស្រីអនុប្រធាន សមាជិក-សមាជិកាគណៈកម្មាធិការគណបក្សឃុំ ព្រមទាំងបងប្អូនប្រជាពលរដ្ឋក្នុងមូលដ្ឋានឃុំពត់សរយ៉ាងច្រើនកុះករ ។

ថ្លែងក្នុងពិធីនេះ លោក ចេង ប៉េងហាប់ បានថ្លែងរំលឹកដឹងគុណយ៉ាងជ្រាលជ្រៅបំផុតចំពោះគណបក្សប្រជាជនកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស ព្រមទាំងថ្នាក់ដឹកនាំគណបក្សប្រជាជនកម្ពុជាគ្រប់រូប ដែលបានលះបង់កម្លាំងកាយចិត្តតស៊ូក្នុងបុព្វហេតុរំដោះ ប្រទេសជាតិមាតុភូមិចេញចាកផុតពីរបបប្រល័យពូជសាសន៍ និងដឹកនាំកម្ពុជាឆ្ពោះមកកាន់ការអភិវឌ្ឍបានយ៉ាងច្រើនដូចពេលបច្ចុប្បន្ន ។

លោកថ្លែងបន្តថា ក្នុងអាណត្តិទី៧នៃរដ្ឋសភា ក្រោមការដឹកនាំរបស់គណបក្សប្រជាជនកម្ពុជា ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ថ្នាក់ដឹកនាំ និងមន្រ្តីគណបក្សគ្រប់រូបបានខិតខំអនុវត្តយ៉ាងម៉ត់ចត់នូវគោលនយោបាយរបស់គណបក្សដើម្បីរក្សាឲ្យបាននូវស្ថេរភាព និងបន្តការអភិវឌ្ឍសង្គម ទោះបីស្ថានភាពពិភពលោកបច្ចុប្បន្នកំពុងស្ថិតក្នុងវិបត្តិសាកល និងភាពមិនទាន់ប្រាកដប្រជានៅឡើយក្តី ។

លោក ចេង ប៉េងហាប់ ក៏បានគូសរំលេចផងដែរថា តបតាមអនុសាសន៍ដឹកនាំដ៏ខ្ពង់ខ្ពស់របស់ លោក គី តិច អនុប្រធានទី១ ក្រុមការងារគណបក្សចុះមូលដ្ឋានខេត្តតាកែវ និងជាប្រធានក្រុមការងារគណបក្សចុះមូលដ្ឋានស្រុកបាទី បានណែនាំឲ្យក្រុមការងារគណបក្សចុះមូលដ្ឋានឃុំទាំងអស់ក្នុងស្រុកបាទី ត្រូវយកចិត្តទុកដាក់ខ្ពស់ចំពោះ ការបំពេញការងារក្នុងមូលដ្ឋានរបស់ខ្លួន អនុវត្តឲ្យបានខ្ជាប់ខ្ជួនគោលនយោបាយគណបក្សដើម្បីរក្សាបាននូវស្នាដៃគណបក្ស និងបង្កើតនូវសមិទ្ធផលថ្មីៗជូនគណបក្ស និងប្រទេសជាតិ ហើយការសាងសង់ទីស្នាក់ការគណបក្សនាពេលនេះគឺដើម្បីឆ្លើយតបទៅនឹងតម្រូវការការងារជាក់ស្តែងក្នុងមូលដ្ឋាន និងក៏ជាសមិទ្ធផលថ្មីជូនគណបក្សផងដែរ។

សូមបញ្ជាក់ជូនផងដែរថា គម្រោងសាងសង់ទីស្នាក់ការគណបក្សប្រជាជនកម្ពុជា ឃុំពត់សរ នេះ មានទីតាំងស្ថិតក្នុងភូមិខ្លាកូន ឃុំពត់សរ ស្រុកបាទី ខេត្តតាកែវ។ អគារនេះ មានទទឹង ១០,៥ម៉ែត្រ និងបណ្តោយ ២៧ម៉ែត្រ សាងសង់លើផ្ទៃដីសរុបទំហំ២៥០៣ ម៉ែត្រការ៉េ ដឹកនាំសាងសង់ដោយឯកឧត្តម ចេង ប៉េងហាប់ ចំណាយថវិកាសាងសង់ប្រមាណ ៦ម៉ឺន ដុល្លារអាមេរិក ហើយគ្រោងនឹងបញ្ចប់នៅដើមខែកញ្ញា ឆ្នាំ២០២៦ ខាងមុខ៕