(ភ្នំពេញ)៖ គិតត្រឹមថ្ងៃទី១៧ ខែឧសភា ឆ្នាំ២០២៦ សាសាសនិកឥស្លាមកម្ពុជា ចំនួន១២០០នាក់ហើយ ដែលបានចេញដំណើរទៅធ្វើបុណ្យហាជ្ជ នៅឯប្រទេសអារ៉ាប៊ីសាអូឌីតក្នុងចំណោម១២១០នាក់ ខណៈនៅសល់១០នាក់ទៀត ដែលទទួលបានព្រះរាជទាន ពីព្រះចៅសាល់ម៉ាន ព្រះមហាក្សត្រ នៃព្រះរាជាណាចក្រអារ៉ាប៊ីសាអូឌីត និងព្រះរាជទាយាទ ម៉ូហាំម៉ាត់ ពិន សាលម៉ាន នាយករដ្ឋមន្ត្រីនៃព្រះរាជាណាចក្រអារ៉ាប៊ីសាអ៊ូឌីត នឹងចេញដំណើរនៅថ្ងៃទី១៨ ខែឧសភា ឆ្នាំ២០២៦។

នេះបើតាមការបញ្ជាក់របស់លោកបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ក្នុងឱកាសអញ្ជើញសំណេះសំណាល និងជូនដំណើរសាសនិកឥស្លាមចំនួន ១៧០ នាក់ នារសៀលថ្ងៃទី១៧ ខែឧសភា ឆ្នាំ២០២៦ នៅអាកាសយានដ្ឋានអន្តរជាតិតេជោ។

ក្នុងឱកាសនោះ ទេសរដ្ឋមន្ត្រី បាននាំមកនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលលោកតែងតែគិតគូរអំពីសុខទុក្ខរបស់ប្រជាជនយើងជាទូទៅ ហើយថ្ងៃនេះ បានចេញទៅ ដើម្បីប្រតិបត្តិបុណ្យហាជ្ជ គឺលោកសូមផ្ដាំផ្ញើសួរសុខទុក្ខមកដល់បងប្អូនយើងទាំងអស់គ្នា ឲ្យទទួលបាននូវសេចក្តីសុខសប្បាយ។

លោកក៏បានសូមថ្លែងអំណរគុណចំពោះសម្តេចតេជោ ហ៊ុន សែន អតីតនាយករដ្ឋមន្ត្រី ដែលជានិច្ចកាល លោកតែងតែបានដោះស្រាយនូវបញ្ហាជាច្រើន ជាពិសេសនាពេលកន្លងមកពាក់ព័ន្ធនឹងចំនួនកូតាអ្នកទៅធ្វើបុណ្យហាជ្ជដែលរដ្ឋាភិបាលប្រទេសអារ៉ាប៊ីសាអ៊ូឌីត បានដាក់កម្រិតសម្រាប់ប្រទេសកម្ពុជាមានតែ ៦០០នាក់ប៉ុណ្ណោះ។ ដូច្នេះហើយ សម្តេចតេជោ បានចាត់លោកទេសរដ្ឋមន្ត្រី អូស្មាន ហាស្សាន់ ដែលជាសេនាធិការ ដើម្បីធ្វើការទំនាក់ទំនងជាមួយក្រសួងហាជ្ជី នៃប្រទេសអារ៉ាប៊ីសាអ៊ូឌីតជាបន្ទាន់។ បន្ទាប់ពីបានពិនិត្យមើលជាក់ស្តែង ដែលកម្ពុជាធ្លាប់បានជួបប្រទះនូវសង្គ្រាម ខកខានមិនបានចូលរួមប្រតិបត្តិបុណ្យហាជ្ជជាង២០ឆ្នាំ ក្រោយមកសម្តេចតេជោ បានធ្វើឲ្យមានសុខសន្តិភាព ព្រមទាំងសុខដុមនីយកម្មជាតិសាសន៍ និងសាសនា ទើបក្រសួងហាជ្ជីនៃប្រទេសអារ៉ាប៊ីសាអ៊ូឌីត បានសម្រេចឲ្យចំនួន១២០០នាក់ ដោយមិនកំណតកូតាឡើយ។

ទេសរដ្ឋមន្ត្រីបានបន្តថា ដោយមើលឃើញពីកំណើនអ្នកចង់ទៅធ្វើបុណ្យធម្មយាត្រាហាជ្ជ មានការកើនឡើងពីមួយឆ្នាំទៅមួយឆ្នាំ ជាក់ស្តែងនៅឆ្នាំ២០២៦នេះ មានចំនួនរហូតដល់១៧០០នាក់ ហើយបានបញ្ជាក់ថា គាត់គ្រោងនឹងធ្វើដំណើរទស្សនកិច្ចទៅប្រទេសអារ៉ាប៊ីសាអូឌីត បន្ទាប់ពីបញ្ចប់រដូវកាលហាជ្ជីឆ្នាំនេះ ដើម្បីជួបរដ្ឋមន្ត្រីក្រសួងហាជ្ជី និងអ៊ុំរ៉ោះអារ៉ាប៊ីសាអូឌីត ដើម្បីស្នើសុំចំនួនកូតាបន្ថែមជូនសាសនិកឥស្លាមកម្ពុជា បានទៅធ្វើបុណ្យហាជ្ជនៅឆ្នាំក្រោយៗ ឲ្យបានច្រើនបន្ថែមទៀតចន្លោះពី១៥០០ ទៅ២០០០នាក់។

លោកបានបន្ថែមថា ដោយសារតែកម្ពុជាមានសុខសន្តិភាព ទើបប្រជាពលរដ្ឋមានសេដ្ឋកិច្ចល្អប្រសើរជាងមុន ដែលអាចមានលទ្ធភាពទៅបំពេញកាតព្វកិច្ចបុណ្យហាជ្ជដោយក្នុងម្នាក់ៗចំណាយថវិកាចំនួន៦,២០០ដុល្លារសហរដ្ឋអាមេរិក ហើយមានចំនួនអ្នកចុះឈ្មោះសម្រាប់ឆ្នាំក្រោយ ជិតពេញអស់ទៅហើយ។

សូមជម្រាបជូនថា ការទៅចូលរួមប្រតិបត្តិបុណ្យហាជ្ជ គឺជាកាតព្វកិច្ចទី៥ ក្នុងចំណោមកាតព្វកិច្ចទាំង៥ របស់សាសនាឥស្លាម។ ជារៀងរាល់ឆ្នាំ សាសនិកឥស្លាម នៅទូទាំងពិភពលោក ពីគ្រប់ទិសទីជាង២លាននាក់ បានអញ្ជើញទៅប្រារព្វបុណ្យនេះនៅឯទីក្រុងម៉ាក្កះ ប្រទេសអារ៉ាប៊ីសាអូឌីត ហើយសម្រាប់អ្នកដែលគ្មានលទ្ធភាព ការទៅធ្វើបុណ្យនេះ មិនជាប់ជាកាតព្វកិច្ចសម្រាប់គេទេ៕